Японы охидын AKB48 хамтлагийн гишүүн Мэй Ханадагийн эргэн тойрон дахь дуулиан улам өргөжиж байна. 2026 оны зургаадугаар сард түүнийг шүтэн бишрэгчтэйгээ нууцаар уулзсан гэх үндэслэлээр гэрээг нь цуцалж, хамтлагаас хассан нь AKB48-ийн 21 жилийн түүхэн дэх хамгийн маргаантай үйл явдлын нэг болжээ.
Одоо Мэй Ханада болон “DH Co., Ltd” агентлагийн хоорондын маргаан цахим орчны шүүмжлэлээр хязгаарлагдахгүй, шүүхийн шатанд шилжихээр байна. Талуудын мэдэгдэл зөрүүтэй байгаа бөгөөд Ханада агентлагийн удирдлагуудаас дарамт, зохисгүй асуулт, үсээ хусах шаардлага тавьсан гэж мэдэгдсэн бол агентлаг үүнийг үгүйсгэжээ.
“DH Co., Ltd” агентлагийн зүгээс Ханада 2025 оны 12 дугаар сараас ажилдаа байнга хоцорч, биеийн байдлаар шалтаглан үүргээ тасалдуулсан гэж тайлбарласан байна. Мөн 2026 оны тавдугаар сард түүнд эмчилгээний албан ёсны чөлөө олгосон ч энэ хугацаанд тодорхой нэг шүтэн бишрэгчтэйгээ нууцаар тогтмол уулзаж байсныг тогтоосон гэжээ.
Агентлаг мэдэгдэлдээ:
“2025 оны 12 дугаар сараас эхлэн, Ханада ажилдаа байнга хоцорч, бие муу хэмээн шалтаг тоочдог болсон. 2026 оны тавдугаар сард бид түүнд эмчилгээний албан ёсны чөлөө олгосон. Энэ чөлөөний үеэр удирдлагаас Мэй Ханада нэгэн тодорхой шүтэн бишрэгчтэй нууцаар байнга уулзаж байгааг тогтоосон. Энэ нь хамтлагийн бусад гишүүдийн аюулгүй байдал, хамтлагийн дүрэм журмыг бүдүүлгээр зөрчсөн хэрэг байлаа. Үзэгчдийн итгэлийг хөсөрдүүлсэн хэрэг гэж үзсэн. Түүнийг хамтлагт эргүүлэн авчрах талаар ярилцах гэсэн боловч Ханада болон өмгөөлөгч нь бүрэн татгалзсан” хэмээн дурдсан байна.
Харин агентлагийн мэдэгдлээс хэдхэн цагийн дараа буюу энэ сарын 23-нд Мэй Ханада 9 минутын видео мэдэгдэл хийжээ. Тэрээр амны хаалттай, маш богино үстэй, уйлсан байдалтай сууж, өөрийн байр сууриа олон нийтэд хүргэсэн нь Японы цахим орчинд хүчтэй хэлэлцүүлэг өрнүүлсэн байна.
Мэй Ханадагийн мэдэгдэлд:
“Тиймээ, би дүрэм зөрчсөнөө хүлээн зөвшөөрч байна. Weverse-д өөрийн байршлаа үлдээж, фенүүддээ “хөөцөлдөн, нуугдаж” тоглож байсан. Нэг удаа гудамжинд үнэхээр фентэйгээ уулзсан, гар барьсан. Гэхдээ ямар нэг романтик холбоо, ойр дотнын зүйл байгаагүй. Харин агентлагийн менежерүүд хэргийг шалгаж байхдаа надад дандаа бэлгийн хүчирхийллийн шинжтэй асуултууд тавьж байсан. Тэд миний үгэнд итгэлгүй “Чи тэрэнтэй унтсан биз дээ”, “Уулздаг чинь үнэн биз дээ” гэж дарамталж байлаа. Агентлагийн удирдлагаас надад “AKB48-т үлдэхийг хүсэж байвал үнэнч, шударга гэдгээ нотлон, үсээ бүрэн хус” гэсэн тулган шаардлага тавьсан.Харин одоо тэд ийм шаардлага тавиагүй гэж ярьж байна. Би үнэн мөний төлөө тэмцэнэ” гэжээ.
Ханадагийн хэлснээр тэрээр айж, эргэлзсэн тул 3 долоо хоног бодох хугацаа хүссэн байна. Эцэст нь үсээ хусуулж, тайзан дээр дахин гарах боломжтой гэж бодсон ч сэтгэл зүйн хувьд үүнийг давж чадаагүй гэж ярьжээ.
Энэхүү мэдэгдлийн дараа олон нийт Ханадагийн талд байр сууриа илэрхийлж, цахим орчинд “DH Co., Ltd” агентлагийг хүчтэй шүүмжилж эхэлсэн байна. Харин агентлаг “үсээ хус” гэсэн шаардлага хэзээ ч тавиагүй гэж мэдэгдээд, уг асуудлаар шүүхэд хандахаа зарлажээ.
Маргааны гол агуулга:
- Мэй Ханада шүтэн бишрэгчтэйгээ уулзсан дүрэм зөрчсөнөө хүлээн зөвшөөрсөн
- Тэрээр романтик холбоо, ойр дотнын харилцаа байгаагүй гэж мэдэгдсэн
- Агентлагийн менежерүүд зохисгүй, бэлгийн шинжтэй асуулт тавьсан гэж буруутгасан
- AKB48-д үлдэхийн тулд үсээ бүрэн хусах шаардлага тавьсан гэж мэдэгдсэн
- “DH Co., Ltd” агентлаг уг шаардлагыг үгүйсгэж, шүүхээр заргалдахаа мэдэгдсэн
Мэй Ханада цааш нь “Надад одоо амь наснаас өөр алдах зүйлгүй болсон. Хамтлагийн бусад охидын эсрэг хийж байсан хууль бус зүйлүүдийн баримт надад байгаа. Энэ бол боолын хөдөлмөр” хэмээн мэдэгдсэн байна. Энэ үг нь зөвхөн түүний хувийн маргаан бус, Японы айдол индустрийн дотоод нөхцөл, хөдөлмөрийн харилцааны асуудлыг дахин сөхөхөд хүргээд байна.
Одоогоор Японы телевиз, радио, шоу бизнесийн салбарт Ханадаг оролцуулахгүй байх хандлага ажиглагдаж байгаа бөгөөд түүнийг ямар нэгэн ажилд урих нь багассан гэж мэдээлж байна. Гэсэн ч хуульч, өмгөөлөгчдийн үзэж буйгаар хэрэв Ханада үсээ хусах шаардлага тавьсныг нотлох видео, аудио баримт гаргаж чадвал шүүхэд давуу байдалтай оролцох боломжтой аж.
Ийнхүү AKB48-ийн гишүүн асан Мэй Ханадагийн асуудал жирийн нэг сахилгын маргаанаас хальж, агентлагийн дарамт, хөдөлмөрийн нөхцөл, уран бүтээлчдийн эрхийн тухай өргөн хүрээний хэлэлцүүлэг болон хувирч байна. Шүүхийн шатанд ямар баримт дэлгэгдэхээс энэ дуулианы цаашдын өрнөл ихээхэн хамаарах юм.
