Эпик төгсгөлийн эхний дүр төрх ил болов
2026 онд дэлхий даяар хамгийн их хүлээгдэж буй бүтээлүүдийн нэг “Dune: Part 3” кино энэ оны арванхоёрдугаар сард нээлтээ хийхээр болж, анхны трейлер болон дүрийн постеруудыг албан ёсоор танилцууллаа.
Энэхүү кино нь Фрэнк Хербертийн 1965 оны шинжлэх ухааны уран зөгнөлт зохиолоос сэдэвлэсэн бөгөөд найруулагч Дени Вильнёвийн бүтээсэн “Dune” цувралын төгсгөлийн хэсэг болж байна. 2021 онд эхний анги, 2024 онд хоёрдугаар анги гарч, нийт 1.125 тэрбум ам.долларын орлого олж, найман Оскарын шагнал хүртсэн нь тус цувралын амжилтыг баталсан юм.
Шинэ анги нь бүх эрх мэдлийг гартаа авсан Пол (Тимоти Шаламе) зайлшгүй хувь тавилантайгаа нүүр тулж, дайн, улс төр, шашин, эрх мэдлийн томоохон зөрчил дунд хэрхэн оршихыг харуулна.
Трейлер ба шинэ дүрүүдийн анхаарал татсан өөрчлөлт
Нээлтэд гарсан трейлер Пол болон Чани (Зендаяа) хоёр ирээдүйн хүүхдээ нэрлэж буй мөчөөр эхэлж, улмаар 17 жилийн дараах үйл явдлыг харуулдаг. Пол аль хэдийн “Muad’Dib” нэрээр эзэн хааны сэнтийд сууж, ирээдүйг харах чадвартай, асар их хүч бүхий нэгэн болж хувирсан байна.
Дайн, эмх замбараагүй байдал үргэлжилж буй энэ үед тэрээр улс төр, шашин, эрх мэдлийн төвд орж, хурцадмал байдал нэмэгдэж буйг харуулжээ. “Би үхлээс айхгүй” хэмээн хэлж буй хэсэг, мөн Чани түүний эсрэг байр суурьтай болсон дүрслэл нь тэдний харилцаанд ямар өөрчлөлт гарсныг сонирхол татахуйц болгож байна.
Найруулагч Дени Вильнёв энэ бүтээлийн талаар “Өмнөх ангиудаас илүү хүчтэй үйл явдал, хурцадмал байдал, өрнөлтэй кино болно” гэж онцолсон байна.
Мөн гаргасан дүрийн постерууд нь хувь заяаг шийдэх мөчид тулсан баатруудын шийдэмгий төрхийг харуулжээ. Тимоти Шаламе, Зендаяа нараас гадна Флоренс Пью, Ребекка Фергюсон, Аня Тейлор-Жой, Хавьер Бардем зэрэг өмнөх ангиудын жүжигчид эргэн нэгдсэн байна.
Үүнээс гадна эхний ангид нас барсан Данкан дүрээрээ Жейсон Момоа эргэн гарч ирж, фенүүдийн сонирхлыг татжээ. Мөн шинэ дүрүүдэд Айзек Де Банколе, Роберт Паттинсон нар нэгдэж, шинэ дайсан болон өргөжсөн үйл явдлыг илтгэж байна.
“Dune: Part 3” кино 2026 оны арванхоёрдугаар сард кино театруудад нээлтээ хийхээр төлөвлөгдөөд байна.
