Жүжигчний үг Оскарын шагналын хувь заяанд нөлөөлөх үү
30 настай Холливудын жүжигчин Тимоти Шаламе сүүлийн өдрүүдэд хэлсэн үгнээсээ болж олон нийтийн анхаарлын төвд орлоо. Түүний мэдэгдэл олон нийтийн сүлжээнд хүчтэй маргаан үүсгэж, зарим хэрэглэгч болон урлагийн салбарын төлөөлөгчид энэ дуулиан ирэх Оскарын шагналын дүн дээр хүртэл нөлөөлж магадгүй гэж үзэж байна.
Жүжигчин дуурь болон балетын урлагийн талаар хэлсэн үг нь шүүмжлэл дагуулж, олон уран бүтээлч түүний байр суурийг эсэргүүцэн дуугарчээ.
Дуурь, балетыг сонирхол буурч буй урлаг гэж тодорхойлсон нь маргаан дагуулав
Variety болон CNN-ийн хамтран зохион байгуулсан хэлэлцүүлгийн үеэр Тимоти Шаламе жүжигчин Мэттью Макконахитэй ярилцахдаа дуурь болон балетыг хүмүүсийн сонирхол буурч буй урлагийн төрөл гэж тодорхойлсон байна.
Тэрээр кино урлаг ийм зам руу орж болохгүй гэж үзэж байгаагаа хэлж, зарим уран бүтээлчид хүмүүсийн сонирхол багассан ч тухайн урлагийг үргэлжлүүлэхийг хүсдэг гэж ярьжээ.
Би балет, дуурь эсвэл түүнтэй төстэй салбарт ажиллахыг хүсэхгүй. Хүмүүс үргэлжлүүлэхийг шаардаж байдаг ч үнэндээ хэнд ч сонирхолгүй болсон зүйлс байдаг гэж Тимоти Шаламе хэлсэн байна.
Жүжигчин дараа нь хэлсэн үгээ хошигнон тайлбарлав
Ярилцлагын үеэр жүжигчин өөрийн хэлсэн үг маргаан үүсгэж магадгүйг ойлгосон бололтой. Тэрээр балет болон дуурийн уран бүтээлчдэд хүндэтгэлтэй ханддагаа онцолж, дараах байдлаар нэмж хэлжээ.
Балет, дуурийн уран бүтээлчдэд би маш их хүндэтгэлтэй ханддаг. Гэхдээ би одоо хэлсэн үгнээсээ болоод үзэгчдээс 14 цент алдчих шиг боллоо. Ямар ч шаардлагагүй байж өөрийгөө гал руу түлхчихлээ гэж жүжигчин инээмсэглэн хэлсэн байна.
Гэвч энэ тайлбар нь нөхцөл байдлыг намжаагаагүй бөгөөд харин ч шүүмжлэлийг улам нэмэгдүүлжээ.
Алдартнууд болон урлагийнхан жүжигчнийг шүүмжилж эхэллээ
Гурван удаа Оскарт нэр дэвшиж байсан нэр хүндтэй жүжигчний үг дэлхийн олон театрын уран бүтээлчдийн эсэргүүцэлтэй тулгарсан байна.
Дуурь, балетыг хамгаалж дараах алдартнууд байр сууриа илэрхийлжээ
- Вупи Голдберг
- Жейми Ли Кёртис
- Ева Мендес
Тэд Шаламе-г бардам зан гаргасан, урлагийг өнгөцөөр дүгнэсэн гэж шүүмжилсэн байна.
Чи бүжигчдийн гэр бүлээс гаралтай хүн. Тиймээс өөр урлагийг ингэж шүүмжлэх нь хүмүүсийн хувьд таагүй сонсогдоно. Магадгүй чи хэлэх үедээ үүнийг анзаараагүй байх. Дараа нь би асуудалд орчихлоо гэж ойлгосон ч 14 цент гэж хэлснээр байдлыг улам дордуулсан. Хүмүүс уурлах үед энэ нь 14 центээс хамаагүй илүү үнэтэй тусна шүү гэж Вупи Голдберг мэдэгджээ.
Сошиал сүлжээнд жүжигчнийг шоолсон бичлэгүүд тархав
Маргаан сошиал сүлжээнд өргөн хүрээнд тархжээ. Балетын уран бүтээлчид болон хэрэглэгчид жүжигчнийг элэглэсэн бичлэг, зураг нийтэлж эхэлсэн байна.
Зарим хэрэглэгчид Шаламе рэп уншиж буй бичлэгийг тараасан бол, нөгөө хэсэг нь түүний оюутан байхдаа балетын хичээлд сууж байсан үеийн зургуудыг нийтэлжээ.
Сиднейн дуурийн театр хүртэл энэ шуугианыг ашиглан сонирхолтой сурталчилгаа эхлүүлсэн байна. Тус театр Кармен дуурийн тасалбарыг Timothy гэсэн промокодоор 14 хувийн хямдралтай худалдаалах аян зарлаж, дараах байдлаар бичжээ.
Тимми чи ч бас энэ кодыг ашиглаж болно гэж театрын ажилтнууд сошиал сүлжээнд хошигнон бичсэн байна.
Дуурь, балетын урлагийг хамгаалсан олон мэдэгдэл гарлаа
Жүжигчин Жейми Ли Кёртис дуурь болон балетыг дэмжсэн нийтлэл хуваалцсан бол дуучин Doja Cat мөн жүжигчний үгийг шүүмжилжээ.
Түүний нийтлэлийг Ева Мендес, Хелен Хант зэрэг алдартнууд дэмжиж лайк дарсан байна.
Хүмүүст огт хамаагүй гэж байхгүй. Бүжигчдэд хамаатай, дуучдад хамаатай, үзэгчдэд ч хамаатай. Үзэгчид одоо ч байдаг. Та яг одоо дуурийн театрт орвол бүх суудал дүүрэн байхыг харах болно. Тоглолтын үеэр хэн ч дуугарахгүй, учир нь хүмүүс энэ урлагт асар их хүндэтгэлтэй ханддаг. Хүн сайхан хувцаслаад очоод сууж чимээгүй үздэг. Магадгүй үүнээс суралцах зүйл бий байх гэж Doja Cat хэлжээ.
Мөн Лондоны Ковент Гарден театр болон Нью Йоркийн Метрополитен дуурийн театр ч өөрсдийн байр суурийг илэрхийлсэн байна.
Орой бүр хүмүүс Хааны дуурийн театрт балет дуурь үзэхээр ирдэг. Хөгжим түүх тайзны амьд тоглолтын ид шидийг мэдрэхийн тулд ирдэг. Хэрэв хүсвэл манай хаалга танд үргэлж нээлттэй гэж тэд сошиал сүлжээнд мэдэгджээ.
Урлагийн төлөөлөгчид жүжигчний үгийг хурцаар шүүмжиллээ
Хоёр удаагийн Грэмми шагналт дуурийн дуучин Изабель Леонард ийм амжилттай жүжигчин урлагийн талаар ийм явцуу бодолтой байгаад ихэд гайхсан гэдгээ илэрхийлжээ.
Мөн дуурийн дуучин Дипа Жонни жүжигчний хэлсэн үгэнд сэтгэл дундуур байгаагаа хэлсэн бол Бразилийн балетмейстер Виктор Каишета балет болон дуурь хэдэн зууны турш оршин тогтнож ирснийг онцлон тэмдэглэсэн байна.
Балет дуурь хэдэн зууны турш амьдарч ирсэн урлаг. Таны кино 300 жилийн дараа үзэгдэх болов уу гэж Виктор Каишета асуужээ.
Мөн сэтгүүлч театрын шүүмжлэгч Иэн Браун жүжигчнийг хурцаар шүүмжилсэн байна.
Тэр үнэхээр тэнэг хүн шиг санагдаж байна. Миний бодлоор энэ мэдэгдэл түүнд хожим заавал эргэж тусна гэж тэр хэлжээ.
Шуугиан Оскарын дүнд нөлөөлж магадгүй
Интернэт орчинд өрнөсөн маргааны улмаас жүжигчний нэр хүндэд тодорхой хэмжээгээр сөрөг нөлөө үзүүлж эхэлсэн байна.
Тимоти Шаламе энэ жил Марти Гайхамшигт киноны гол дүрээр Оскарт нэр дэвшээд байгаа. Гэвч дуулианы дараа түүний ялалт байгуулах магадлал буурч магадгүй гэж шинжээчид үзэж байна.
The Guardian хэвлэлийн мэдээлснээр зарим шинжээчид одоо шагналыг жүжигчин Майкл Б Жордан авах боломж илүү болсон гэж үзэж байгаа бөгөөд бооцооны компаниуд түүний ялалтын магадлалыг 34 хувь гэж үнэлжээ.
Мөн сошиал сүлжээнд Шаламе-ийн Instagram хуудсыг дагахаа болих хүмүүсийн тоо нэмэгдэж байгаа аж.
