“Kryptonite”, “Here Without You”-гийн дуулиант хоолой намжлаа
Дэлхийд танигдсан рок хамтлаг 3 Doors Down-ын тэргүүн дуучин, фронтмэн Брэд Арнольд хорт хавдрын улмаас 47 насандаа таалал төгсжээ. “Kryptonite”, “Here Without You” зэрэг олон сая хүний сэтгэлд хоногшсон дууны хүчтэй, танигдам хоолой эзгүй болсон нь рок хөгжим сонирхогчдын хувьд том гарз болж байна. Онош тавигдсанаас хойш ердөө есхөн сарын дараа тэр өвчний улмаас хорвоог орхижээ.
Хожуу шатны тунгалаг эсийн бөөрний хавдар, цуцлагдсан аялан тоглолт
2025 оны тавдугаар сард Арнольд өөрийн цахим хуудсаар дамжуулан хорт хавдартай болсноо олон нийтэд анх мэдэгдэж байв. Тэр үед эмч нар түүнд тунгалаг эсийн гаралтай бөөрний хорт хавдрын хожуу шатны онош тавьж, хавдар нь уушгинд нь аль хэдийн үсэрхийлсэн байсныг илрүүлсэн байна.
Өвчний хурдтай хүндрэл, эмчилгээний хүндрэлээс шалтгаалан 3 Doors Down хамтлаг 2025 оны зуны бүх аялан тоглолтоо бүрэн цуцалсан. Урьдчилан зарлагдсан тоглолтуудад очихоор тасалбар авсан мянга мянган фенүүдийн хувьд энэ нь гунигтай мэдээ байсан ч хамтлагийн гишүүд фронтмэнийхээ эрүүл мэндийг нэгдүгээрт тавихаас өөр сонголтгүй байгаагаа онцолж байлаа.
Хамтлагийнхны сүүлчийн үг: “Тэр зүгээр нэг гишүүн биш, ах дүү байсан”
Бямба гарагт Брэд Арнольдын таалал төгссөн тухай мэдээг 3 Doors Down хамтлаг албан ёсны мэдэгдлээр баталгаажуулав. Тэд мэдэгдэлдээ:
“Брад бол зүгээр л хамтлагийн гишүүн биш, бидний хувьд ах дүү, урам зоригийн эх үүсвэр байсан”
хэмээн дурссан нь түүний хамт олон дундах байр суурь, хувь хүний үнэ цэнийг илтгэж байна.
1996 онд АНУ-ын Миссисипи мужид байгуулагдсан 3 Doors Down хамтлагт Брэд Арнольд анх бөмбөрчин, тэргүүн дуучин гэсэн хос үүрэгтэйгээр нэгдсэн. 2000 онд тэдний гаргасан “The Better Life” цомог рок ертөнцөд томоохон дуулиан тарьж, хамтлагийг олон улсын тайзан дээр гаргасан бөгөөд Арнольдын хоолойг дэлхий даяар танигдах эхлэл болсон юм.
Түүний богинохон мэт санагдах ч нөлөөтэй карьер, рок хөгжимд үлдээсэн мөр нь “Kryptonite”-ийн эхний тактаас л фенүүдийн зүрхэнд үргэлж амьдрах болно.
