Казино дээр болсон маргааны дараа Bronx-ийн репперийг эмх замбараагүй байдал үүсгэсэн хэргээр буруутгав
Реппер Lil Tjay Флорида мужийн нэгэн казинод Offset-тэй холбоотой буудлагын хэргийн дараа баривчлагдаж, албан ёсоор хэрэг үүсгэгджээ.
Уг хэрэг дөрөвдүгээр сарын 6-ны даваа гарагт Seminole Hard Rock Hollywood казинод болсон бөгөөд мөрдөн байцаагчдын мэдээлснээр хэрэг гарахаас өмнө хоёр уран бүтээлч хоёулаа тухайн газар байсан аж. Дараа нь нөхцөл байдал хурцдаж, маргаан ноцтой түвшинд хүрсэн байна.
Албаныхны мэдээлснээр Lil Tjay буюу Tione Jayden Merritt /жинхэнэ нэрээрээ/ казиногийн гадна саатуулагдсан байна. Seminole-ийн цагдаагийн газраас өгсөн мэдэгдэлд Bronx-ийн репперийг Флоридагийн хуулиар нэгдүгээр зэргийн зөрчилд тооцогддог эмх замбараагүй байдал үүсгэсэн хэрэгт буруутган шалгаж байгаа гэжээ.
Эхний үеийн цуурхлуудаар түүнийг буудлагатай илүү шууд холбоотой мэтээр ойлгуулж байсан ч албаныхан түүнд одоогоор галт зэвсэгтэй холбоотой ямар нэгэн зүйл ангиар хэрэг үүсгээгүй байна.
Цагдаагийн мэдэгдэлд, “Merritt-ийг өнгөрсөн шөнө орой Broward County шоронд саатуулсан. Хэргийн газар саатуулагдсан өөр нэг хүнд одоогоор хэрэг үүсгээгүй. Энэ хэрэгт холбоотой нэг буюу хэд хэдэн нэмэлт этгээдийг тогтоох мөрдөн шалгах ажиллагаа үргэлжилж байна” гэж дурджээ.
Буудах хэрэгтэй холбоотой ташаа мэдээллүүд тарсан ч өмгөөлөгч нь шууд няцаав
Broward County Sheriff’s Office-ийн бүртгэлээс харахад Lil Tjay эмх замбараагүй байдал үүсгэсэн хэрэгтэй холбоотой 500 ам.долларын барьцаатайгаар түр саатуулагдсан бөгөөд мягмар гарагт суллагдсан байна. Түүнд мөн тусдаа замын хөдөлгөөний зөрчилтэй холбоотойгоор 2500 ам.долларын барьцаа тогтоожээ.
Цагдаагийн мэдэгдэл нь Offset-тэй холбоотой буудлага болон Lil Tjay-ийн баривчилгаа хоорондоо холбоотой байж болзошгүй гэсэн олны таамгийг улам баталгаажуулсан байна. Ялангуяа тэдний хооронд мөрийтэй тоглоомын өртэй холбоотой өмнөх зөрчил байсан гэх яриа энэ хардлагыг улам нэмэгдүүлжээ.
Гэвч анхны зөрүүтэй мэдээллүүд нөхцөл байдлыг нэлээд будлиулсан байна. Зарим эх сурвалж Lil Tjay өөрөө Offset руу буудсан, бүр өөрөө ч бас буудуулсан гэж ташаа мэдээлэл түгээжээ.
Эдгээр яриаг түүний өмгөөлөгч Dawn M. Florio эрс няцаасан байна. Тэр цахим орчинд тарж буй худал мэдээллийн эсрэг байр сууриа илэрхийлж, “Сeminole Hard Rock Hollywood-ийн valet хэсэгт болсон, хуучин Migos хамтлагийн гишүүн Offset амь насанд аюулгүй гэмтэл авсан буудлагын хэрэгт Lil Tjay оролцсон гэх худал цуурхлын талаар бид энэ мэдэгдлийг гаргаж байна” хэмээн мэдэгджээ.
Ийнхүү Lil Tjay буудлагын хэргийн төвд нэр холбогдоод байгаа ч одоогоор түүнд зэвсэг хэрэглэсэнтэй холбоотой ял оноогоогүй бөгөөд мөрдөн шалгах ажиллагаа үргэлжилсээр байна.
