Жоли харшаа 29.9 сая ам.доллароор худалдахаар болжээ
Холливудын алдарт жүжигчин Анжелина Жоли Лос Анжелес дахь олон жил амьдарсан харшаа худалдаанд гаргасан нь олны анхаарлыг татаж байна.
New York Post-ын мэдээлснээр, Жоли уг үл хөдлөх хөрөнгийг энэ сарын 4-нд зах зээлд байршуулжээ. Харшийн үнэ 29.9 сая ам.доллар гэж тогтоосон байна.
Тэрээр уг байшинг 2017 онд хуучин нөхөр Брэд Питт-ээс салсныхаа дараахан 24.5 сая ам.доллароор худалдан авч, түүнээс хойш өөрийн оршин суух газар болгон ашиглаж байжээ.
“Хүүхдүүд маань 18 нас хүрмэгц би явна” гэж хэлж байв
Анжелина Жоли 2024 онд The Hollywood Reporter-т өгсөн ярилцлагадаа Лос Анжелест үлдэх болсон шалтгаанаа тайлбарлаж байсан.
Түүний хэлснээр, Брэд Питттэй хийсэн салалтын гэрээний нөхцөлийн дагуу хүүхдүүд нь насанд хүртлээ Калифорнид байх шаардлагатай байжээ.
“Би Лос Анжелес хотод өссөн, гэхдээ би зөвхөн салалтын улмаас энд үлдэж байна. Хүүхдүүд маань 18 нас хүрмэгц би явна”
Камбож руу нүүх магадлалтай
Жоли ирээдүйд очих газраар том хүү Мэддоксын төрсөн нутаг болох Камбожийг нэрлэж байжээ.
Түүний Лос Анжелес дахь харшаа худалдаанд гаргасан нь АНУ-аас нүүх төлөвлөгөө нь ойртож байж магадгүй гэсэн таамгийг нэмэгдүүлж байна.
Домогт найруулагчийн амьдарч байсан түүхэн харш
Жолигийн худалдаанд гаргасан уг харш нь Холливудын домогт кино найруулагч Сесил Б. ДеМиллтэй холбоотой түүхэн үл хөдлөх хөрөнгө юм.
ДеМилл 1916 оноос 1959 онд нас барах хүртлээ энэ байшинд амьдарч байжээ.
Ойролцоогоор 11 мянган хавтгай дөрвөлжин фут талбай бүхий уг харшид 16 угаалгын өрөө, фитнес өрөө, цайны газар, усан бассейн, усан оргилуур, дөрвөн задгай зуух, том дарсны зоорь болон харуул хамгаалалтын пост багтдаг байна.
