27 настай Бруклин Бекхэм 31 настай эхнэр, жүжигчин Никола Пельтцийн талаар гадаад төрх, биеийн хэлбэртэй холбоотойгоор шүүмжилсэн хүмүүсийн эсрэг байр сууриа илэрхийлжээ.
Бруклин өөрийн инстаграм хуудсандаа хоол хийх мастер класс үзүүлсэн шинэ бичлэг нийтэлсний дараа нэгэн хэрэглэгч сэтгэгдэл үлдээж, эхнэрийнх нь төрхийг шүүмжилсэн байна. Тэр хэрэглэгч: “Чи эхнэр чинь ямар муу харагдаж байгаад санаа зовж байгаа бүх хүнд хариулж байна уу? Тэр өөрөө өөрийгөө ил гаргаж байгаа болохоор түүнийг хоолло” гэж бичжээ.
Үүний дараа Бруклин шууд хариу өгсөн байна.
“Миний эхнэрийн талаар хэзээ ч битгий ярь. Тэр үнэхээр үзэсгэлэнтэй, харин чи эмэгтэй хүний биеийн талаар сэтгэгдэл бичих ёсгүй. Энэ бол ичгүүртэй” гэж тэр бичжээ.
Сүүлийн үед Никола Пельтцийг анорекситой байж магадгүй гэх таамаг цахим орчинд хүчтэй тархсан. Тэрээр бүрэн нүцгэн зургаа нийтэлсний дараа зарим хэрэглэгч түүний “эрүүл бус харагдаж байна” гэх төрхийг идэвхтэй хэлэлцэж эхэлсэн юм.
Сэтгэгдэл бичсэн хүмүүсийн дунд “Бүгд туранхай байхыг хүсдэгийг ойлгож байна. Гэхдээ гоолиг байх, өвчтэй харагдах хоёр өөр зүйл. Түүний хувьд хоёр дахь нь шиг байна”, “Анорекси юм уу?”, “Тэр үзэсгэлэнтэй, гэхдээ хэт туранхай байдал нь санаа зовоож байна. Энэ аль хэдийн эрүүл бус харагдаж байна” гэх мэт сэтгэгдлүүд гарчээ.
Гэхдээ Никола Пельтцийн биеийн жин, төрхийг ингэж хэлэлцэж байгаа нь анхны тохиолдол биш. Энэ оны эхээр ч хүмүүс түүний огцом турсан байдлыг анзаарч, нөхөр нь эцэг эхтэйгээ муудалцсантай холбоотой стрессээс болсон байж магадгүй гэж таамаглаж байсан.
Зарим нь харин түүний жингийн өөрчлөлтийг шинэ уран бүтээлтэй нь холбон тайлбарласан юм. Никола “Прима” драмд балетчин бүсгүйн дүр бүтээж байгаа бөгөөд уг дүрдээ бэлтгэхийн тулд хатуу хоолны дэглэм барьж, балетын бэлтгэл хийсэн тул жин хассан байж болзошгүй гэж үзжээ.
Никола Пельтц, Бруклин Бекхэм нар 2022 онд Florida-д тансаг хуримаа хийсэн билээ. Тус хуримд 300 зочин оролцсоны дотор Ева Лонгория, Серена Уильямс болон Бруклины гэр бүлийнхэн байсан юм.
Харин хос өнгөрсөн наймдугаар сард хуримын тангаргаа дахин шинэчилж, хоёр дахь ёслолоо хийсэн ч энэ удаа Бекхэмийн гэр бүлийг уриагүй байна.
Энэ оны нэгдүгээр сард Дэвид болон Виктория Бекхэмийн ууган хүү Бруклин эцэг эхтэйгээ дахин харилцахыг хүсэхгүй байгаагаа мэдэгдсэн. Тэрээр тэднийг өөрийнх нь амьдралыг хянах гэж оролддог гэж буруутгаж, мөн Виктория эхнэр Никола Пельтцтэй хийсэн анхны хуримын бүжгийг нь сүйтгэсэн гэж бичиж байв.
Бруклин тухайн үед: “Тэр бүх хүний нүдэн дээр надтай маш зохисгүй байдлаар бүжиглэсэн. Би амьдралдаа хэзээ ч тийм эвгүй, доромжлогдсон мэдрэмж авч байгаагүй” гэж мэдэгдсэн байна.
Түүнээс хойш Бруклин олон нийтийн сүлжээндээ гэр бүлийнхнээ бүгдийг нь хаасан гэх мэдээлэл гарсан. Дүү Харпер нь түүнтэй уулзахыг оролдсон ч түүний байр суурь өөрчлөгдөөгүй бололтой.
Саяхан мөн Бруклин, Никола нар анхны хуримынхаа ойг цаашид тэмдэглэхгүй болсон гэх мэдээлэл гарсан. Учир нь тэдний үзэж буйгаар тэр хуримыг Виктория сүйтгэсэн гэжээ.
Ийнхүү Бруклин Бекхэм энэ удаа гэр бүлийн маргаанаас гадна эхнэрийнх нь биеийн төрхийг шүүмжилсэн хэрэглэгчдэд шууд хариу өгч, эмэгтэй хүний биеийг олон нийтээр хэлэлцэх ёсгүй гэдгийг онцолсон байна.
