Рэппер Jay-Z ирэх хоёрдугаар сард болох NFL-ийн аварга шалгаруулах “Super Bowl” тэмцээний завсарлагын шоу үзүүлбэрийг гүйцэтгэхээр болжээ. Энэ талаар Америкийн Үндэсний Хөлбөмбөгийн Лиг албан ёсоор мэдэгдсэн байна.
Jay-Z-ийн үүсгэн байгуулсан “Roc Nation” компани 2019 оноос хойш “Super Bowl”-ийн завсарлагын шоуны зохион байгуулалтад оролцож, жил бүр тайзан дээр гарах гол уран бүтээлчдийг сонгоход чухал үүрэг гүйцэтгэж ирсэн юм.
Гэхдээ Jay-Z өөрөө өмнө нь “Super Bowl”-ийн завсарлагын шоуны гол тайзан дээр уран бүтээлээ толилуулж байгаагүй. Тиймээс энэ удаагийн тоглолт нь түүний карьерын онцгой үйл явдлуудын нэг болох төлөвтэй байна.
Beyoncé зочин уран бүтээлчээр оролцох уу?
NFL-ийн мэдэгдэлд Jay-Z тайзан дээр ганцаараа гарах эсэхийг тодорхой дурдаагүй байна. Харин түүний хамт хэн зочин уран бүтээлчээр оролцох бол гэсэн таамаг хэдийн эхэлжээ.
NFL-ийн мэдэгдэлд:
“Энэхүү том тоглолтын завсарлагын үеэр Jay-Z хэнийг зочин уран бүтээлчээр урих бол гэсэн хүлээлт одоо эхэлж байна. Мэдээж хэрэг, түүний эхнэр Бейонсе энэ жагсаалтын эхэнд бичигдэх нь дамжиггүй”
гэжээ.
Ирэх жилийн “Super Bowl LXI” тэмцээн хоёрдугаар сарын 14-нд Лос-Анжелес хотын ойролцоо зохион байгуулагдана.
Jay-Z өнгөрсөн амралтын өдрүүдэд “Super Bowl” болох цэнгэлдэх хүрээлэнд хоёр удаа тоглолт хийсэн байна. Эдгээр тоглолт нь түүний анхны студийн цомог “Reasonable Doubt”-ын 30 жилийн ойд зориулсан аялан тоглолтын нэг хэсэг байжээ.
“Энэ бүхэн үнэхээр урт зам байлаа”
Жинхэнэ нэр нь Шон Картер болох Jay-Z өөрийн карьерын замналыг эргэн дурсаж:
“‘Reasonable Doubt’ цомгоос эхлээд ‘Super Bowl’-ын завсарлагын тайзан дээр гарах хүртэлх энэ бүхэн үнэхээр урт зам байлаа”
гэж мэдэгджээ.
Тэр цааш нь:
“Дэлхийн хамгийн том тайзан дээр хөгжим, хөдөлмөр, соёлын 30 жилийн түүх өрнөх гэж байна. Энэхүү аялал нь мөрөөдөл биелэхийн бодит жишээ байх болно”
хэмээн хэлсэн байна.
NFL-ийн комиссар Jay-Z-ийн оролцоог онцлов
NFL-ийн комиссар Рожер Гүүдэлл ч Jay-Z-ийн тоглолтын талаар байр сууриа илэрхийлжээ.
Тэр:
“Түүний авч ирэх ур чадвар, бүтээлч байдал, соёлын нөлөөллийг дэлхий даяар хөгжөөн дэмжигчид мэдрэх болсонд би маш их баяртай байна”
гэжээ.
Мөн “Roc Nation”-тай хамтын ажиллагаа эхлэх үедээ Jay-Z-г нэг өдөр өөрөө энэ тайзан дээр гараасай гэж хүсэж байснаа онцолж:
“Бид ‘Roc Nation’-тай шоуг зохион байгуулах гэрээ байгуулах үед надад ганцхан хүсэлт байсан. Тэр нь Jay-Z өөрөө хэзээ нэгэн цагт, өөрт нь тохиромжтой гэж үзсэн мөчдөө тайзан дээр гараасай гэсэн хүсэлт байлаа”
хэмээн ярьсан байна.
Ингэснээр Jay-Z олон жилийн турш “Super Bowl”-ийн завсарлагын шоуны ард ажилласныхаа дараа эцэст нь өөрөө дэлхийн хамгийн том хөгжмийн тайзнуудын нэгэнд гол уран бүтээлчээр гарахаар болж байна.
