Жүжигчин Kim So Hyun Between Steps цувралын дүр, Choo Young Woo-той бүтээсэн дэлгэцийн хайр дурлал болон дүрээ амилуулахад тулгарсан сорилтын талаар Cosmopolitan сэтгүүлд өгсөн шинэ ярилцлагадаа дэлгэрэнгүй ярьжээ.
Аравдугаар сарын 5-нд нээлтээ хийсэн тус цувралд Kim So Hyun амьдралынхаа чиглэлийг алдсаны дараа шинэ зам хайж буй магистрын оюутан Im Yoo Jin-ий дүрийг бүтээдэг. Харин Choo Young Woo өвчний улмаас нэг хөлөө алдсан, өмнө нь усанд сэлэлтийн тамирчин байсан докторант Park Min Jae-ийн дүрд тогложээ.
Between Steps нь ирээдүй нь тодорхой бус хоёр залуу хайр дурлал, амьдралын сонголттойгоо хэрхэн нүүр тулж байгааг өгүүлдэг.
“Нэг нь зайлсхийдэг, нөгөө нь түгшүүртэй хүн шиг харагддаг”
Kim So Hyun Yoo Jin, Min Jae хоёрын харилцааг зан төлөв, сэтгэлзүйн хувьд эрс ялгаатай хоёр хүний хайр дурлал гэж тодорхойлжээ.
Тэрээр инээмсэглэн:
“Тэдний болзож байгааг харахад нэг нь харилцаанаас зайлсхийдэг, нөгөө нь түгшүүртэй хүн шиг санагддаг. Манай цуврал олон янзаар тайлбарлах боломжтой. Жүжигчид, найруулагч An Pan Seok, зураглаач гээд бүгд зохиолыг өөр өөр өнцгөөс харж байсан. Бид өөрсдийн тайлбарууд огтлолцох дундын цэгийг байнга хайсаар цувралаа дуусгасан”
гэж ярьсан байна.
Түүний хэлснээр дүрүүдийн харилцааг нэг утгаар тайлбарлахын оронд үзэгч өөрийн өнцгөөс ойлгох боломжийг бүтээл зориуд нээлттэй үлдээжээ.
“Буруу тогловол таагүй дүр болж харагдаж магадгүй гэж бодсон”
Kim So Hyun анх зохиолыг уншихдаа Im Yoo Jin-ий дүрийг хэрхэн хүлээж авах бол гэдэгт санаа зовж байснаа мөн хэлжээ.
“Анх зохиолыг уншихдаа ‘Хэрэв би болгоомжгүй тогловол энэ дүр жаахан таагүй харагдаж магадгүй’ гэж бодсон. Тэгээд санаа зовж байгаагаа найруулагчид хэлсэн. Харин тэр дүрийг байгаагаар нь тогло гэж хэлсэн. Илүү таалагддаг хүн болгох гэж оролдох юм бол Yoo Jin-ийг онцгой болгож байгаа зүйл нь алга болно гэсэн”
хэмээн жүжигчин дурссан байна.
Ингээд тэрээр дүрийнхээ сул талыг зориудаар зөөлрүүлэх бус, сэтгэл хөдлөлийг нь бодитоор гаргахад анхаарчээ.
“Би Yoo Jin-ийн мэдрэмжийг байгаагаар нь мэдэрч, илэрхийлэхийг хичээсэн. Надад ч өөртөө таалагддаггүй хэсэг, хэнд ч харуулдаггүй эмзэг байдал бий. Хүн бүрт тийм тал байдаг, Yoo Jin ч ялгаагүй. Би түүнийг өөрийн хэмжүүрээр шүүхийн оронд байгаагаар нь хүлээн зөвшөөрч, тэгж дүрслэхээр шийдсэн. Энэ нь дүрийг илүү олон талтай болгосон гэж боддог”
гэж Kim So Hyun ярьжээ.
Choo Young Woo-той зориуд бага зэрэг зай барьжээ
Жүжигчин мөн зураг авалтын үеэр өөрийгөө тайван байлгах чадвараа өөрийн давуу талын нэг гэж үздэгээ хэлсэн байна. Маш их сандарсан, түгшсэн үедээ ч сэтгэл хөдлөлөө ил гаргалгүй тогтвортой байж чаддаг нь хамт ажилладаг хүмүүст таалагддаг байж магадгүй гэж тэр үзжээ.
Kim So Hyun мөн Choo Young Woo-той хэрхэн дэлгэцийн хослол бүрдүүлсэн талаараа ярьсан байна.
Хоёр жүжигчин нас чацуу боловч цувралын дүрүүдийн хувьд ахлах, дүүгийн харилцаатай бөгөөд Yoo Jin Min Jae-д нэлээд хүндэтгэлтэй ханддаг аж.
“Бидний хооронд бага зэрэг зай байх нь зүгээр гэж бодсон. Хэт дотно болчихвол тэр чөлөөтэй, дассан харилцаа жүжиглэлтэд өөрийн эрхгүй харагдаж магадгүй”
гэж Kim So Hyun тайлбарлажээ.
Давталт багатай зураг авалт тэдний химийг илүү бодит болгожээ
Kim So Hyun, Choo Young Woo хоёр зураг авалтын өмнө хэт олон удаа давтаж бэлтгэл хийхээс зайлсхийсэн байна.
Үүний шалтгааныг Kim So Hyun:
“Найруулагч тухайн мөчид аяндаа гарч ирдэг жинхэнэ сэтгэл хөдлөл, хариу үйлдлийг илүүд үздэг байсан болохоор бид нэг их давталт хийдэггүй байлаа. Аз болоход Choo бид хоёр маш сайн зохицсон. Урьдчилж ярилцаагүй байсан ч бие биенийхээ импровизацад аяндаа хариу үзүүлдэг байсан. Энэ үнэхээр сонирхолтой туршлага болсон”
хэмээн ярьжээ.
Түүний хувьд Yoo Jin-ийн төгс бус зан чанарыг нуухын оронд бүрэн хүлээн зөвшөөрсөн нь дүрийг илүү бодит, олон давхаргатай болгосон бол Choo Young Woo-той үүссэн байгалийн хими нь Between Steps-ийн хайр дурлалын шугамыг илүү амьд болгожээ.
Kim So Hyun-ы зураг авалт болон бүрэн ярилцлага Cosmopolitan сэтгүүлийн 2026 оны арваннэгдүгээр сарын дугаарт нийтлэгдсэн бөгөөд тус дугаар аравдугаар сарын 22-ноос худалдаанд гарсан байна.
