Цахим спортын Counter-Strike 2 тоглоомын шилдэг багуудын өрсөлдөж буй Esports World Cup 2025 тэмцээн Саудын Арабын Эр-Рияд хотноо үргэлжилж байна.
Манай улсын «The MongolZ» баг шөвгийн дөрөвт дэлхийн аварга Францын «Team Vitality» багийн эсрэг Bo3 (гурван map-аар ялагч тодруулах) журмаар тоглож, 2:1 харьцаатай хожлоо.
Өнгөрсөн долоо хоногт болсон BLAST Bounty 2025 Season 2 Finals-ийн шөвгийн дөрөвт ч манай баг Францчуудыг 2:0-ээр ялж байсан билээ.
Тоглолтын явц
- Mirage map дээр манай баг довтлогчоор эхэлж, 7:5 харьцаагаар тал солив. Үргэлжлүүлэн хамгаалах талаас ердөө гурван үе алдсанаар 13:8-аар ялалт байгууллаа.
- Dust II map дээр Францчуудын сонголт давамгайлж, манай баг хамгаалах талаас 4:8-аар хоцорсон. Довтлохдоо таван үе авсан ч хангалтгүй байсан тул 9:13-аар ялагдав.
- Шийдвэрлэх Nuke map дээр манай баг хамгаалагчоор найман үеийн давуу тал авч, довтлогчийн гар бууны үеийг эхнээс нь авснаар 13:7-аар хожиж, финалын эрхээ авлаа.
Финалын тоглолт
«The MongolZ» баг маргааш 18:00 цагаас Саудын Арабын «Team Falcons» болон Туркийн «Aurora Gaming» багийн аль хожсонтой нь финалд Bo5 журмаар тоглоно.
Өмнөх учрал
Энэ удаагийн тоглолт нь хоёр багийн томоохон тэмцээн дээрх 11 дэх уулзалт байлаа. Үүнээс Францчууд 9 удаа ялалт байгуулсан бол манай баг хоёр дахь удаагаа өрсөлдөгчөө буулган авч чадлаа.
Францын «Team Vitality» энэ оны эхний хагаст оролцсон бүх тэмцээндээ түрүүлсэн бөгөөд хамгийн сүүлд BLAST.tv Austin Major 2025 буюу дэлхийн аваргад аваргалсан хүчирхэг баг юм.
