Тэйлор Свифтийн “Шоучин бүсгүйн үдэшлэг” кино театруудыг дахин аварч байна

Концертын киноноос шинэ хэлбэрт шилжсэн нь

Дэлхийн супер од Тэйлор Свифт кино театруудад дахин эрч хүч өгч байна. Түүний 2023 онд гарсан Eras Tour концертын кино нь бокс оффисын олон дээд амжилтыг тогтоож, салбарын хямралын үед үзэгчдийг дахин татаж чадсан билээ. Харин одоо тэрээр шинэ төсөлтэйгөөр үзэгчдийн өмнө гарч ирж байна.

Шинэ бүтээл болох “The Official Release Party of a Showgirl” нь уламжлалт киноноос өөр бүтэцтэй. Энэхүү 89 минутын эвент нь Свифтийн 12 дахь студийн цомог Life of a Showgirl-ийн хөгжмийн клип, тайзны арын дүрс бичлэг, тайлбаруудаар дүүрэн байх аж. “Eras Tour”-ын кино шиг энэ нь зөвхөн хөгжим бус үзэгчдэд зориулсан онцгой туршлага болж хувирч байна.

Шинжээчдийн тооцоолсноор нээлтийн эхний өдрүүдэд энэхүү бүтээл 35-40 сая ам.долларын орлого олох магадлалтай бөгөөд энэ нь тухайн төрлийн уран бүтээлийн хувьд асар том амжилт хэмээн үнэлэгдэж байна.

Сүүлийн саруудын “аврагч” кинонууд

Свифтийн бүтээл нь кино салбарт үзэгчдийн урсгалыг нэмэгдүүлж буй хэд хэдэн амжилттай бүтээлүүдийн үргэлжлэл болж байна. Тэдгээрээс дурдвал:

• Crunchyroll-ын Demon Slayer: Infinity Castle — 70 сая ам.долларын орлого
• Warner Bros-ын The Conjuring: Last Rites — 84 сая ам.долларын дебют
• Netflix-ийн KPop Demon Hunters — хоёрхон өдөрт 18 сая ам.доллар, платформын хамгийн амжилттай кино
• A24-ын Materialist — 103 сая ам.доллар
• Zak Cregger-ийн Weapons — 263 сая ам.доллар
• Final Destination: Bloodlines — 313 сая ам.долларын амжилт

Эдгээр бүтээлүүд нь бүгд үзэгчдийг театрт татаж, салбарын сэргэлтийг бий болгож байна.

Салбарын өөдрөг төлөв

Regal компанийн гүйцэтгэх захирал Эдуардо Акунагийн хэлснээр, 2025 он бол дунд төсөвтэй кинонуудын хувьд “гайхалтай жил” болж байгаа аж. “Хүмүүс өвөрмөц, утга учиртай түүхтэй уран бүтээлийг тэсэн ядан хүлээдэг. Энэ нь тэднийг буйдангаасаа босож кино театрт очих шалтгаан болдог” хэмээн тэр онцолсон байна.

Хэдийгээр зуны оргил үеэс хойш кино театруудын орлого буурсан ч жилийн дүнгээр өнгөрсөн оныхоос давж байгаа нь салбарын ирээдүйд өөдрөг хандлага төрүүлж байна.