Шүүхийн шийдвэр: 8 сар хорих, 3 жил тэнсэн, 300 цагийн нийгмийн ажил
“Friends” цувралын од Мэттью Перрид кетамин борлуулсан Калифорнийн эмч найман сар хоригдох ял авлаа. Мөн гурван жилийн хугацаатай тэнсэн харгалзах, 300 цаг олон нийтийн сайн дурын ажил хийх шийтгэл ногдуулсан байна. Ингэснээр мансууруулах бодис хэтрүүлэн хэрэглэсний улмаас нас барсан жүжигчний үхэлтэй холбоотой хэргээр ял сонссон хүний тоо хоёр болжээ.
Марк Чавес хэрхэн кетамин олж авсан нь ил болов
Доктор Марк Чавес нь 2023 онд Лос Анжелест гэртээ нас барсан Мэттью Перригийн үхэлтэй холбоотой хар тамхины хэрэгт буруугаа хүлээсэн таван хүний нэг гэж мэдээлэгдэв. Тухайн хүмүүсийн дунд өөр нэг эмч болон “Кетамины хатан хаан” хэмээн нэрлэгддэг наймаачин ч багтсан байна. Сан Диегод ажиллаж байсан Чавес кетаминыг эмнэлэг болон бөөний худалдаа эрхлэгчээс хуурамч жор ашиглан олж авсан гэж тогтоогджээ.
Нийлүүлэлтийн сүлжээ, мөрдөн шалгалтын дүгнэлт ба цаашдын ял оноолт
Өөр нэг эмч Сальвадор Пласенсиад мөн худалдсан гэдгээ хүлээн зөвшөөрсөн бөгөөд Пласенсиа нь уг кетаминыг Мэттью Перрид нийлүүлдэг байсан гэж дурдав. Пласенсиад энэ сарын эхээр 30 сарын хорих ял оноосон байна.
Хоёр жилийн турш үргэлжилсэн холбооны мөрдөн шалгалтаар Перри Холливудад үйл ажиллагаа явуулдаг хууль бус далд сүлжээгээр дамжин кетамин олж авч байсан нь тогтоогдсон гэж мэдээлжээ. Кетаминыг мэс заслын үеийн мэдээ алдуулалт болон сэтгэл гутрал, сэтгэлийн түгшүүр, өвдөлт намдаах эмчилгээнд ашиглагддаг. Донтолт, сэтгэл гутралын асуудалтай тэмцэж байсан Перрид уг бодисыг эмчилгээний хүрээнд жороор бичиж өгдөг байсан ч тэр удалгүй заасан хэмжээнээс илүүг хайж эхэлсэн байна.
Үүний улмаас жүжигчин Перри кетамин авах зорилгоор хоёр эмч, хамт амьдарч байсан туслах, Эрик Флеминг гэх хүн, мөн “Кетамины хатан хаан” гэгддэг Жасвин Сангха нарыг хамарсан хар тамхины сүлжээнд татагдан орсон гэж мэдээлэв. Сүүлд дурдсан гурван хүнд ойрын саруудад ял оноохоор төлөвлөж байгаа аж.
Перригийн задлан шинжилгээгээр түүний цусанд кетамины өндөр агууламж илэрсэн нь үхлийн шалтгаан болсон гэж тогтоосон. Прокуроруудын мэдээлснээр Перригийн туслах Кеннет Ивамаса нь Чавес, Пласенсиа нартай хамтран жүжигчнийг нас барахаас өмнөх хэдэн долоо хоногт 50 мянга гаруй ам.долларын кетаминаар хангаж байсан гэжээ. 2024 оны аравдугаар сард байгуулсан гэм буруугаа хүлээх хэлэлцээрийн хүрээнд Чавес кетаминыг хуучин эмнэлгээсээ болон бөөний худалдаа эрхлэгчээс хуурамч жороор авснаа хүлээн зөвшөөрсөн байна.
