Porsche найм дахь жилдээ №1 байр сууриа хамгаалав
2025 оны дэлхийн хамгийн тансаг, премиум брэндүүдийн жагсаалтыг олон улсын зөвлөх байгууллага Brand Finance шинэчлэн танилцуулжээ. Судалгаагаар Porsche 41.1 тэрбум ам.долларын үнэлгээгээр найм дахь жилдээ дараалан “хамгийн үнэ цэнтэй” тансаг, премиум брэндээр нэрлэгдсэн байна.
Chanel 45 хувиар өсөж, хоёрдугаарт гарч ирэв
Энэ удаагийн хамгийн анхаарал татсан өөрчлөлт нь Chanel-ийн огцом өсөлт байлаа. Тус брэндийн үнэлгээ 45 хувиар нэмэгдэж, 37.9 тэрбум ам.долларт хүрснээр Louis Vuitton-ийг ардаа орхиж, хоёрдугаар байранд оржээ.
Бусад брэндүүдийн байр, өсөлт бууралтын дүр зураг
Жагсаалтын дээд хэсэгт Hermès дөрөвдүгээр байраа хадгалсан бол Dior 18 хувийн өсөлт үзүүлж, зургаадугаарт бичигдсэн байна. Мөн Rolex-ийн үнэлгээ 36 хувиар өсөж, хоёр байраар урагшлан тавдугаарт оржээ.
Cartier болон Ferrari тус бүр нэг байр ахиж, долоо, наймдугаар байранд жагссан байна. Харин Gucci 24 хувиар буурсан ч топ 10-д үлдсэн хэвээр байгаа талаар дурджээ. Үүн дээр нэмээд Guerlain 23 хувиар өсөж, 2021 оноос хойш анх удаа тансаг, премиум ангиллын топ 10-т дахин багтсан нь онцлог өөрчлөлтөд тооцогдож байна.
Судалгааг Brand Finance хийжээ
Энэхүү чансааг брэндийн үнэ цэнэ болон санхүүгийн нөлөөллийг үнэлдэг олон улсын зөвлөх байгууллага Brand Finance гаргасан бөгөөд 2025 оны тансаг, премиум брэндүүдийн өрсөлдөөнд өсөлт, байр солилцоо нэлээд идэвхтэй өрнөснийг энэ удаагийн үр дүн харууллаа.
