Пуэрто-Рикогийн алдарт дуучин Bad Bunny “Порто-Рико” хэмээх түүхэн драм киноны гол дүрд тоглохоор болжээ. Энэ нь түүний “Хурдны галт тэрэг” (Bullet Train) болон “Халуун мөрөөр” (Caught Stealing) кинонуудаас хойшхи дэлгэцийн хамгийн том дүр болох юм.
Киноны найруулагчаар “Residente” нэрээрээ алдартай Рене Перес Жоглар ажиллах бөгөөд энэ нь түүний найруулагчийн анхны бүрэн хэмжээний бүтээл болно. Киноны гол дүрүүдэд Холливудын нэрт жүжигчид болох Эдвард Нортон, Хавьер Бардем болон Вигго Мортенсен нар тоглохоор болсон нь олны анхаарлыг татаж байна. “Порто-Рико” киног “Карибын тэнгисийн туульсын вестерн” болон Пуэрто-Рико улсын үүсэл гарлын тухай “бодит явдлаас сэдэвлэсэн, сонирхолтой түүх” хэмээн тодорхойлж байгаа ч албан ёсны үйл явдлын товчлол хараахан гараагүй байна.
Зохиолыг Перес Жоглар “Бердмэн” (Birdman) болон “Амилсан чөтгөр” (The Revenant) кинонуудаараа Оскарын шагнал хүртсэн Александер Динеларистай хамтран бичжээ. Харин гүйцэтгэх продюсероор нэрт найруулагч Алехандро Гонсалес Иньярриту ажиллаж байна.
Киноны продюсероор “1868 Studios” болон “The Painted Veil”, “Motherless Brooklyn” кинонуудаараа танигдсан “Class 5 Films” компаниуд ажиллах аж.
“Энэхүү кино нь ‘Загалмайлсан эцэг’-ээс эхлээд ‘Нью-Йоркийн бүлэглэлүүд’ хүртэлх бидний дуртай тэрхүү сонгодог кинонуудын уламжлалыг хадгалсан бүтээл болно. Түүхэн цаг үе, дүрүүд болон драм нь үзэгчдийг байлдан дагуулахаас гадна Америк маягийн идеализмын цаана нуугдсан тэрхүү сүүдэр шиг түүхийг эргэн харахад хүргэнэ” гэж Эдвард Нортон онцолжээ.
