50 настай Анджелина Жоли, 42 настай Луи Гаррел нарыг романтай гэж хардаж байсан ч тэд хамт биш гэж мэдээлэгдлээ. Жүжигчний ойрын хүрээнийхэн “Кутюр” кинонд хамт тоглосон хоёр уран бүтээлчийн харилцааг үгүйсгэж, Жоли Брэд Питтээс салснаасаа хойш “хэнтэй ч болзоогүй” гэж онцолсон байна.
People-д ярьсан эх сурвалжийн хэлснээр Жоли, Гаррел хоёр шинэ кинонд гол дүр бүтээсэн ч “зүгээр л сайн найзууд” аж. Сошиал орчинд тэдний талаар цуурхал хүчтэй тархсан нь ялангуяа зураг авалтын үеэр Гаррел 10 жилийн гэрлэлтээ дуусгаж, Летиция Кастатай салсан гэх мэдээлэлтэй давхцсантай холбоотой гэж үзэж байна. Харин Жолид ойр хүмүүсийн тайлбарласнаар тэр олон жилийн турш ганцаараа бөгөөд 18 нас хүрээгүй бага хүүхдүүдээ өсгөхөд анхаарлаа төвлөрүүлж, чөлөөт цагаа голчлон гэр бүлдээ зориулдаг аж.
“Энджи сүүлийн хэдэн жил маш завгүй, ажилдаа төвлөрсөн. Болзоо түүнд чухал байгаагүй. Түүнд найз залуу байгаагүй” гэж эх сурвалж хэлжээ. Мөн “салалтын дараа тэр бараг ганцаараа ээж шиг явсан болохоор анхаарлынхаа ихэнхийг хүүхдүүддээ өгсөн” гэж нэмсэн байна.
Анджелина Жоли, Брэд Питт хоёр 10 гаруй жил хамт байсан бөгөөд 2024 онд албан ёсоор салсан гэж нийтлэлд дурджээ. Тэд гурван үрчилж авсан хүүхэдтэй: 24 настай Мэддокс, 22 настай Пакс, 21 настай Захара. Мөн гурван төрсөн хүүхэдтэй: 19 настай Шайло, 17 настай ихэр Нокс, Вивьен. Нийтлэлд дурдсанаар хүүхдүүдийн ихэнх нь Питтийн овгийг хэрэглэхээс татгалзаж, түүнтэй бараг харилцахгүй болсон байна.
“Тэр ээж байхыг хайрладаг, бүгдийг аз жаргалтай байгаасай гэж үргэлж хүсдэг. Түүнд энэ нь сайн бүтдэг бололтой” гэж эх сурвалж нэмжээ.
Жоли, Питт хоёрын харилцаа 2004 онд “Мистер ба миссис Смит” киноны зураг авалтын үеэр эхэлсэн гэж сануулжээ. Тухайн үед Питт Женнифер Энистонтой гэрлэсэн байсан ч 2005 оны сүүлээр салж, 2006 оны эхээр Жоли, Питт хоёр харилцаагаа олон нийтэд баталж, жүжигчин жирэмсэн болсноо зарласан. Тэд 2014 онд гэрлэж, хоёр жилийн дараа Жоли салалтаа өгсөн байна. Хүүхдийн асрамж, хөрөнгө хуваах маргаан зэрэг олон асуудлын улмаас салалт нь 2024 оны сүүлээр л бүрэн дууссан гэж нийтлэлд дурджээ. Харин Питт сүүлийн гурван жил өөрөөсөө хоёр дахин залуу Инес де Рамонтой үерхэж байгаа гэж бичжээ.
