10 жилийн ой дөхсөн ч фэнүүд сэтгэл дундуур байна
BLACKPINK хамтлаг дебют хийснийхээ 10 жилийн ойг угтах гэж буй энэ үед фэнүүдийн дунд бухимдал хүчтэй нэмэгдэж байна. X платформ дээр хамтлагийн ойн бэлтгэл, фэнүүдтэйгээ харилцаж буй байдалд шүүмжлэлтэй хандсан нэгэн нийтлэл бараг 3 сая үзэлт авч, цахим орчинд томоохон маргаан үүсгэжээ.
Фэнүүдийн гол бухимдал нь 10 жилийн ой шиг онцгой мөчид хамтлагийн зүгээс мэдэгдэхүйц үйл ажиллагаа, тусгай контент, фэнүүдэд зориулсан бэлтгэл бараг харагдахгүй байгаатай холбоотой байна.
“8, 9 жилийн ой биш, 10 жилийн ой шүү дээ”
X дээр нэгэн фэн BLACKPINK болон YG Entertainment-д хандан хурц шүүмжлэл бичжээ.
Тэрээр “BLACKPINK, та нар үнэхээр ухаан орооч. Энэ чинь 8 эсвэл 9 жилийн ой биш, 10 жилийн ой шүү дээ. Та нар бүгд соло карьераараа амжилттай яваа болохоор хамтлагийн үйл ажиллагаа хамгийн түрүүнд тавигдахгүй байгааг ойлгож байна. Гэхдээ та нар өнөөдрийн энэ байр сууринд BLACKPINK байсан учраас хүрсэн гэдгээ битгий мартаасай. Бусад хамтлаг 10 жилийн ойгоо тэмдэглэхдээ үнэхээр том зүйл хийдэг. Бид comeback, тоглолт, fan meeting ч шаардаагүй. Гэхдээ энэ арай хэтэрлээ. Яаж огт юу ч байхгүй байж болдог юм бэ?” хэмээн бичсэн байна.
“Хуучин зураг оруулаад дуусгах нь хангалтгүй”
Тухайн фэн цааш нь BLACKPINK-ийн сүүлийн үеийн comeback болон хамтлагийн идэвхгүй байдлыг ч шүүмжилжээ.
Тэрээр “Та нар бүжиггүй дуунуудаар comeback хийхэд бид аль хэдийн ямар нэг зүйл мэдэрсэн. Гэхдээ зүгээр нэг дуу, клип гаргахыг үнэхээр comeback гэж хэлэх үү? Тайзны нэг ч хувцас байхгүй байхад? Хамтлагийн гэрээний хугацаа одоо ч үлдсэн байгаа. Тэгэхээр ядаж фэнүүдийнхээ төлөө ажил хэрэг мэт хандаж, Instagram дээр хуучин хамтлагийн зураг оруулаад өдрийг өнгөрөөх биш 10 жилийн ойгоо тэмдэглэж байгаа мэт байж болно шүү дээ” гэжээ.
Энэхүү нийтлэл богино хугацаанд олон сая хүнд хүрч, олон улсын фэнүүдийн дунд ч ижил бухимдал үүсгэсэн байна.
Олон улсын фэнүүд ч K-BLINK-үүдийг дэмжив
Маргаан зөвхөн Солонгос фэнүүдээр хязгаарлагдсангүй. Олон улсын BLINK-үүд мөн цахим орчинд сэтгэл дундуур байгаагаа илэрхийлж, “K-BLINK-үүд энэ асуудлаар protest truck явуулах уу” гэх мэт асуулт хүртэл тавьжээ.
Зарим фэнүүдийн хувьд BLACKPINK шиг дэлхийн хэмжээний хамтлагийн 10 жилийн ой ийм нам гүм өнгөрөх гэж байгаа нь ойлгомжгүй санагдаж байна. Тэд ойн баярт зориулсан тусгай видео, фэн уулзалт, live, шинэ контент эсвэл ядаж хамтлагийн гишүүдийн хамтарсан мэндчилгээ хүлээж байсан аж.
Weverse membership шинэчлэх мэдэгдэл бухимдлыг улам нэмэв
Фэнүүдийн уур бухимдал Weverse membership шинэчлэх тухай мэдэгдэл ирсний дараа улам нэмэгджээ. Учир нь зарим фэний хэлснээр, гишүүд өөрсдөө Weverse дээр удаан хугацаанд бараг идэвхгүй байсан атлаа 10 жилийн ой нэрээр membership сунгахыг уриалж байгаа нь зохисгүй санагдсан байна.
Өөр нэг фэн “YG, та нар үнэхээр юу бодож байна вэ. Артистууд өөрсдөө бүтэн жилийн турш Weverse дээр ирээгүй байхад 10 жилийн ой гээд Weverse membership сунга гэж хэнд хэлээд байгаа юм бэ? Утгагүй юм ярихаа больж, 10 жилийн ойгоо л олигтой бэлд” хэмээн шүүмжилжээ.
K-BLINK-үүд хүртэл бухимдсан нь асуудлыг томрууллаа
Олон фэн энэ удаагийн нөхцөл байдлыг ноцтой гэж үзэж байна. Учир нь ихэвчлэн хамтлагаа хамгаалж, тайван ханддаг K-BLINK-үүд өөрсдөө ил тод бухимдаж эхэлсэн нь асуудал фэнүүдийн дунд хэр гүнзгий байгааг харуулж байна гэж үзжээ.
BLACKPINK-ийн гишүүд сүүлийн жилүүдэд соло карьер, загварын ертөнц, жүжиглэлт, олон улсын арга хэмжээнүүдээр тус тусдаа идэвхтэй ажиллаж байгаа. Гэвч фэнүүдийн хувьд хамтлагийн нэрээр бүтсэн 10 жилийн ой бол зөвхөн хувь хүний амжилтаас давсан, хамтын түүхийг тэмдэглэх ёстой онцгой мөч юм.
Фэнүүдийн хүсэж буй зүйл том comeback биш, хүндлэл
Олон фэний тайлбарлаж буйгаар, тэд заавал шинэ цомог, том концерт эсвэл fan meeting шаардаагүй. Харин BLACKPINK-ийн 10 жилийн ойг фэнүүдтэйгээ хамт тэмдэглэх гэсэн сэтгэл, бага ч гэсэн бэлтгэл, албан ёсны мессеж, онцгой контент хүссэн байна.
Одоогоор BLACKPINK болон YG Entertainment энэ шүүмжлэлд албан ёсны хариу өгөөгүй байгаа ч вирус болсон нийтлэл хамтлагийн ойг тойрсон хүлээлт, урам хугаралт, фэнүүдийн сэтгэл хөдлөлийг ил болголоо.
