BTS 2027 онд АНУ-ын хамгийн том хөгжмийн фестивалиудын нэг болох Coachella Valley Music and Arts Festival-д оролцож магадгүй байна.
HITS Daily Double-ийн мэдээлснээр, Coachella-г зохион байгуулдаг Goldenvoice компани BTS-ийг ирэх жилийн фестивальд оролцуулахын тулд идэвхтэй хэлэлцээ хийж байгаа аж. Coachella 2027 оны дөрөвдүгээр сарын 9-11 болон 16-18-ны өдрүүдэд Калифорни мужийн Indio хот дахь Empire Polo Club-д зохион байгуулагдана.
Энэ мэдээлэл BTS есдүгээр сарын 1-нээс Los Angeles дахь SoFi Stadium-д дөрвөн үдэш дараалан тоглолтоо эхлүүлж буйтай давхцаж байгаа нь тус хамтлагийн АНУ дахь дараагийн том фестивалийн оролцоотой холбоотой таамгийг улам нэмэгдүүлжээ.
Goldenvoice BTS-ийг авахын төлөө идэвхтэй ажиллаж байна
Одоогоор BTS болон Coachella-ийн хооронд албан ёсны гэрээ байгуулагдсан тухай мэдээлэл гараагүй байна.
Гэсэн ч HITS Daily Double-ийн мэдээлснээр, Goldenvoice BTS-ийг 2027 оны бүрэлдэхүүнд оруулахын төлөө маш идэвхтэй ажиллаж байгаа аж. Фестивалийн зохион байгуулагчид одоогоор ирэх жилийн гол уран бүтээлчдийн жагсаалтаа бүрдүүлэх шатандаа явж байна.
Хэрэв хэлэлцээ амжилттай болбол энэ нь BTS бүрэн бүрэлдэхүүнээрээ эргэн нэгдсэний дараах АНУ дахь хамгийн том фестивалийн оролцоонуудын нэг болох юм.
Dua Lipa, Tame Impala нар ч гол тайзны төлөө яригдаж байна
BTS-ээс гадна Coachella 2027-ийн гол уран бүтээлчдийн нэрсийн дунд Dua Lipa болон Tame Impala багтаж байгаа талаар эх сурвалжууд мэдээлжээ.
Тэднийг фестивалийн headliner буюу гол тайзны уран бүтээлчээр сонгож магадгүй байна. Харин Fred again.. электрон хөгжмийн хэсгийн томоохон нэрсийн нэгээр оролцох боломжтой аж.
Tame Impala өмнө нь 2019 онд Coachella-г тэргүүлж байсан бөгөөд тус фестивальд хэд хэдэн удаа оролцож байжээ.
Харин Dua Lipa Coachella-д бүрэн хэмжээний соло тоглолт хараахан хийж байгаагүй. Тэрээр 2017 онд Martin Garrix-ийн тоглолтод зочноор оролцож байсан юм.
SZA, Oasis, Radiohead нарын нэр мөн яригдаж байна
Coachella 2027-ийн томоохон тайзанд оролцож магадгүй бусад уран бүтээлчдийн дунд SZA, Oasis болон Radiohead нарын нэр дурдагджээ.
Гэхдээ HITS Daily Double-ийн мэдээллээр SZA фестивальд оролцох магадлал Oasis болон Radiohead-аас илүү өндөр гэж үзэж байгаа аж.
Мөн Miley Cyrus-д headliner болох санал тавьсан ч тэр татгалзсан гэх мэдээлэл гарсан байна.
BTS-ийн хувьд Coachella шинэ том алхам болж магадгүй
BTS бүрэн бүрэлдэхүүнээрээ идэвхтэй үйл ажиллагаандаа эргэн орсны дараа АНУ-ын томоохон хөгжмийн арга хэмжээнүүдэд дахин хүчтэй байр сууриа эзлэх хүлээлт өндөр байгаа юм.
Хэрэв Coachella 2027-ийн гэрээ баталгаажвал BTS дэлхийн хэмжээний K-pop хамтлагийн хувьд Америкийн фестивалийн зах зээлд дахин томоохон байр суурь эзэлж буйг харуулах чухал үйл явдал болно.
Одоогоор Coachella 2027-ийн бүрэн lineup албан ёсоор зарлагдаагүй байна.
