“Dexter” гурав дахь спин-офф “Resurrection”-оор эргэн ирсэн нь Showtime-ийг тойрсон өөрчлөлтүүдтэй сонирхолтойгоор давхацлаа. Нэгэн цагт HBO-гийн хүчтэй өрсөлдөгч гэгдэж байсан Showtime өнөөдөр стриминг платформын дэд брэнд болж, эзэмшигч Paramount Global нь улс төр, бизнесийн дарамт дунд тогтворгүй байдалтай байна. Үүнтэй адилаар “Dexter” ч өөрийн оргил үеэс холдож, хуучин алдар нэрийнхээ сүүдэрт гацсан хэвээр харагдана.
Сэргэлт үү эсвэл ухралт уу?
“Dexter: New Blood” цуврал анхны үргэлжлэл болохдоо эцсийн цэг тавьсан мэт санагдаж байлаа. Тэрхүү төгсгөлд Декстер өөрийн хүү Харрисоны гарт амиа алдаж, хүчирхийлэл үе дамждаг мөчлөгийг нэг талаар эвдэж, нөгөө талаар төгсгөсөн билээ. Гэвч дараагийн бүтээл болох “Original Sin” энэ утгыг үгүйсгэж, Декстерийг амьд үлдсэн хэмээн тайлбарлан, бүх үйл явдлыг хагалгааны үеийн дурсамж маягаар сэргээсэн. Хэдийгээр бүтээлч талаасаа ядуу байсан ч хоёрдугаар улирлын захиалга авсан нь үзэгчдийн сонирхол байгааг илтгэнэ.
Нью-Йоркийн гудамжинд дахин цус урсана
“Resurrection” цувралын үйл явдал Нью-Йорк хотод өрнөнө. Декстер шинэ амьдрал эхлүүлж, апп-д суурилсан жолоочоор ажиллахын зэрэгцээ хуучин “шүүлтийн” аргаа дахин хэрэглэж эхэлнэ. Харин Харрисон хотын дунд зэрэглэлийн зочид буудалд зөөгчөөр ажиллаж байгаад нэгэн бэлгийн гэмт хэрэгтэнтэй тааралдан, эцгийнхээ замналыг хүсээгүй ч дагахад хүрнэ.
Гэсэн ч цувралын анхаарлын төвд Харрисон бус, Декстер хэвээр үлдэнэ. Хүүгийн дотоод зөрчил, айдас, ирээдүйн сонголтууд гүнзгийрч чадалгүй, зөвхөн арын шугамын элемент болон хоцорчээ. Харин Декстер өөрийн “Dark Passenger”-ийг дахин тэжээж эхэлнэ.
Хуучин ба шинэ дүрүүдийн уулзвар
Майкл С. Холл дахин Декстерийн дүрд тоглож, хуучин танилууд ч эргэн иржээ. Тухайлбал, Декстерийн хуучин хамтрагч Анжел Батиста (David Zayas) найз нь үхлээ хуурамчаар үйлдсэн байж болзошгүйг аажмаар ойлгож эхэлнэ. Мөн Декстерийн аав Харри (James Remar) сүнсэн дүрээр дахин гарч ирж, тэдний хуучин “код”-ын талаархи маргаан үргэлжилнэ.
Харин үзэгчдийн анхаарлыг хамгийн их татсан дүр бол Питер Динклейж байв. Тэрээр гэмт хэргийн ертөнцийг шүтдэг хөрөнгө оруулагчийн дүрд тоглож, алдарт алуурчдыг “цуглуулах” хоббитойгоор гарна. Түүний цуглуулгад багтсан алуурчдыг Neil Patrick Harris, Krysten Ritter зэрэг зочин жүжигчид амилуулж, цувралд хар бараан инээдмийн өнгө аяс оруулжээ.Мөн Ума Турман тэрбумтны гүйцэтгэгч алуурчны дүрд тоглож, “Kill Bill”-ийн үеийн домогт дүрээ санагдуулам тоглолт үзүүлсэн ч хэтрүүлэлгүй, дүрийн үнэ цэнийг хадгалж чадсан байна.
“Resurrection” — шинэчлэл биш, хуучны хөөмий
Шинэ хот, шинэ дүрүүд нэмэгдсэн ч цувралын үндсэн бүтэц өөрчлөгдсөнгүй. Харрисоныг мөрдөж буй мөрдөгч Клодет (Kadia Saraf) бага зэрэг шинэлэг санагдах ч нийт зураглал хуучны жимээрээ л явна. Декстерийн өөрийгөө шүүмжилсэн дотоод яриа, “энэ удаа би өөрөө бай болсон” гэх мэт хошигнолууд давтагдах тусам нөлөөгөө алдана.
Цувралд “шинэ амьдрал” өгөх боломж байсан. Тухайлбал, Декстерийн оронд Харрисон сүнстэй харьцаж, эцгийн дүрслэлээр дамжуулан дотоод зөрчлийг туулж болох байсан. Гэвч бүтээгчид урьдын адил Декстерийг л гол дүрд авч үлдсэн нь цувралын цаашдын замыг хязгаарлажээ.
Дүгнэлт
“Dexter: Resurrection” гаднаа шинэ зүйл туршиж буй мэт харагдавч, үнэн хэрэгтээ энэ бол фенүүдийн бичсэн, өндөр төсөвтэй фэнфикшн шиг бүтээл юм. Декстерийг эргүүлэн авчирсан нь жинхэнэ шинэчлэл бус, сэхээн амьдруулалт байсан бөгөөд харамсалтай нь энэ оролдлого өмнөх төгсгөлийн үнэ цэнийг бууруулахад хүрчээ.
