Жүжигчин Hwang Jung Eum хөрөнгө завшсан гэх маргаан болон гэр бүл салалтын дараа олон нийтийн өмнө болгоомжтойгоор дахин гарч ирлээ. Тэрээр тавдугаар сарын 19-нд шинээр нээсэн албан ёсны YouTube сувгийнхаа анхны бичлэгийг нийтэлж, сүүлийн үед туулсан хүнд үеийнхээ талаар илэн далангүй ярьжээ.
Олон нийтийн өмнө удаан хугацаанд гараагүй байсан Hwang Jung Eum камерын өмнө бага зэрэг сандарсан байдалтай харагдсан бөгөөд өнгөрсөн нэг жилийг эргэн дурссан байна.
Тэрээр:
“Олон хүн мэдэж байгаа том асуудал гарсан. Би тэр бүхнийг шийдэх гэж бүх цагаа зарцуулсан. Өнгөрсөн нэг жил надад нэг сар шиг л санагдсан”
хэмээн ярьжээ.
Мөн өөрөөс нь болж бусдад хохирол учруулахгүйн тулд хариуцлага хүлээхийг хичээсэн гэдгээ хэлсэн байна.
Зар сурталчилгааны торгуулиа төлснөө мэдэгдэв
Маргааны үеэр олны анхаарал татсан нэг асуудал нь зар сурталчилгааны гэрээний торгууль байсан юм. Hwang Jung Eum энэ талаар шууд тайлбар хийж:
“Би бүх торгуулийг төлж барагдуулсан”
гэж мэдэгджээ.
Гэхдээ тэр мөнгөөр хохирлыг барагдуулсан нь алдааг нь арилгаж байгаа хэрэг биш гэдгийг онцолсон байна.
Жүжигчин бүсгүй толгой бөхийн уучлалт гуйж:
“Санхүүгийн хувьд нөхөн төлсөн гээд миний алдаа арилна гэсэн үг биш. Би үнэхээр их гэмшиж байна. Миний үйлдлээс болж продакшны ажилтнууд, сурталчлагчид, фэнүүд хохирсонд ямар их шаналж байгаагаа үгээр илэрхийлэхэд хэцүү”
хэмээн хэлжээ.
1985 онд төрсөн Hwang Jung Eum өдгөө 41 настай. Өнгөрсөн жил тэрээр хувь эзэмшдэг агентлагаасаа ойролцоогоор 4.3 тэрбум вон завшиж, уг мөнгийг криптовалютын хөрөнгө оруулалтад ашигласан гэх хэрэгт холбогдсон. Шүүхээс түүнд хоёр жилийн хорих ялыг дөрвөн жилийн тэнсэн харгалзах нөхцөлтэй оноосон байна.
Хожим тэрээр мөнгийг бүрэн буцаан төлсөн ч саяхан түүний Itaewon дахь хувийн байшинд түр битүүмжлэл тавьсан гэх мэдээлэл гарсан юм.
Үүнтэй зэрэгцэн Hwang Jung Eum есөн жил ханилсан мэргэжлийн гольфчин асан, бизнесмен Lee Young Don-оос албан ёсоор салсан. Энэ нь түүний хувийн амьдралын бас нэгэн хүнд үе болсон байна.
Хүүхдүүд нь түүнийг тэвчих хүч өгчээ
Hwang Jung Eum зарим үед өөрийгөө жүжигчнээр дахин ажиллаж чадахгүй байх гэж айж байсан гэдгээ ярьжээ. Гэсэн ч хүүхдүүд нь түүнд энэ бүхнийг даван туулах хүч өгсөн гэж хэлсэн байна.
Тэрээр:
“Миний гэрлэлт маш аз жаргалгүй байсан учраас сүүлийн үед болсон зүйлс миний бүх амьдралын аз жаргалгүй байдлыг илэрхийлж байна гэж бодоогүй”
хэмээн ярьжээ.
Мөн салалтын үйл явцтай харьцуулахад одоогийн маргаан нь өөрөө хариуцлага хүлээж, шийдэх ёстой асуудал байсан гэж тайван байдлаар тайлбарласан байна.
Жүжигчин бүсгүй өөрт нь чиглэсэн олон нийтийн шүүмжлэлийг хүлээж авахад бэлэн байгаа гэдгээ илэрхийлжээ. Ярианы үеэр тэрээр сэтгэл хөдлөлөө нуухад хэцүү болсон ч удалгүй өөрийгөө тогтоон барьж, инээмсэглэн:
“Уйлах хэрэг үнэндээ байхгүй гэж бодож байна. Нулимс гарвал би зүгээр л инээмсэглэнэ”
гэж хэлсэн байна.
Цаашид Hwang Jung Eum өөрийн YouTube сувгаар ганц бие эцэг эхчүүд болон ажил эрхэлдэг ээжүүдэд урам, тайтгарал өгөхийг хүсэж байгаагаа ярьжээ. Мөн өнгөрсөн үйлдлүүддээ шалтаг тоочихгүй, цаашид илүү хариуцлагатай амьдрахаа амласан байна.
