Sechs Kies хамтлагийн гишүүн асан Ko Ji Yong болон түүний хуучин эхнэр, өрхийн анагаах ухааны эмч Hur Yang Im нар хүү Seung Jae-тайгаа уулзах эрх болон хүүхдийн тэтгэмжийн асуудлаар хууль эрх зүйн маргаанд оржээ.
Хоёр талын мэдэгдэл хоорондоо зөрүүтэй байгаа бөгөөд одоогоор шүүх эцсийн шийдвэр гаргаагүй байна.
Hur Yang Im шүүхийн шийдвэрийг дагана гэв
Hur Yang Im есдүгээр сарын 17-нд сошиал хуудсаараа дамжуулан байр сууриа илэрхийлжээ.
Тэрээр:
“Мэдрэмтгий насанд орж буй Seung Jae-ийн цорын ганц хууль ёсны асран хамгаалагчийн хувьд түүний сайн сайхан байдал миний нэн тэргүүний асуудал. Тиймээс өөрийн байр суурийг олон нийтэд ярихдаа маш болгоомжтой хандаж байна” гэжээ.
Мөн гэрлэлтээ цуцлуулах үед хүүхэдтэй уулзах эрхийн талаар нарийн тохиролцоо хийгээгүй байсан гэж тайлбарласан байна.
Hur Yang Im:
“Ko Ji Yong намайг хүүтэйгээ уулзахыг нь үндэслэлгүйгээр хязгаарлаж байна гэж мэдэгдэж байгаа. Би уулзалтын эрхийн асуудлаар шүүхэд хүсэлт гаргасан бөгөөд цаашид шүүхийн шийдвэрийг бүрэн дагаж мөрдөнө” гэжээ.
Ko Ji Yong уулзах эрхээ хамгаалуулахаар хүсэлт гаргажээ
Ko Ji Yong-ийн тал хүүхэдтэйгээ уулзах эрхэд саад учруулахыг зогсоох, мөн Hur Yang Im-ийг хүүгийнхээ зураг, бичлэгийг цахим орчинд нийтлэхийг хязгаарлуулах зорилгоор түр захирамж хүссэн байна.
Түүний талын мэдэгдлээр 2024 оны дөрөвдүгээр сард харилцан тохиролцож салснаас хойш хоёр жилийн хугацаанд хүүтэйгээ ердөө зургаан орчим удаа уулзсан гэжээ.
Ko Ji Yong мөн хүүхдийн тэтгэмжтэй холбоотой асуудлаар хуучин эхнэрээ шүүмжилсэн байна.
Тэрээр:
“Тэр миний банкны данс, даатгалыг битүүмжлэх шийдвэрээр хүүхдийн тэтгэмжийг албадан гаргуулсан. Би албан мэдэгдлээр төлөх хүсэлтэй байгаагаа илэрхийлсэн ч хариу аваагүй” гэж мэдэгджээ.
Мөн тогтмол тэтгэмжээ дахин төлж эхэлсэн ч хүүхэдтэйгээ уулзах боломжгүй хэвээр байсан гэж түүний тал тайлбарласан байна.
Тэтгэмжийн өр 40 сая вон хүрсэн гэх мэдээлэл гарчээ
Сэтгүүлч асан, YouTuber Lee Jin Ho есдүгээр сарын 16-нд Ko Ji Yong салалтын үеэр сар бүр 1.89 сая вон хүүхдийн тэтгэмж төлөхөөр тохиролцсон ч төлөгдөөгүй дүн нь 40 сая вон орчимд хүрсэн гэж мэдээлжээ.
Хүү, алдангийг тооцвол нийт шаардлагын хэмжээ 50 сая вон орчим буюу 36 мянган ам.доллар хүрсэн гэх мэдээлэл байна.
Ko Ji Yong-ийн агентлаг Mountain Movement Story тэтгэмжийн төлөлт хоцорсныг хүлээн зөвшөөрсөн ч эрүүл мэндийн асуудал, эмчилгээтэй холбоотой санхүүгийн хүндрэл нөлөөлсөн гэж тайлбарлажээ.
Агентлагийн мэдээлснээр өрийг үе шаттай барагдуулах хоёр албан санал илгээсэн бөгөөд Ko Ji Yong 2026 оны наймдугаар сараас хойш сар бүрийн төлбөрөө тогтмол хийж байгаа аж.
Хоёр талын тайлбар зөрж байна
Ko Ji Yong-ийн тал эрүүл мэнд нь сайжирсны дараа ч хүүтэйгээ уулзаж чадаагүй гэж мэдэгдэж байгаа.
Харин Hur Yang Im-ийн тал салалтын дараах эхний уулзалтуудыг Ko Ji Yong өөрөө хойшлуулж байсан гэж тайлбарлажээ.
Ko Ji Yong-ийн тал эхний удаа эрүүл мэндийн шалтгаанаар уулзалтыг хойшлуулсан гэдгээ зөвшөөрсөн ч үүний дараа уулзах боломж дахин олдоогүй гэж мэдэгдсэн байна.
Hur Yang Im хүүтэйгээ бичлэг нийтэлсэн нь анхаарал татав
Маргаан ид өрнөж байх үед Hur Yang Im YouTube сувагтаа Seung Jae-тай хамт хооллож, салют үзэж буй бичлэг нийтэлжээ.
Энэ нь Ko Ji Yong хүүгийн зураг, бичлэгийг олон нийтэд нийтлэхийг хязгаарлуулах хүсэлт гаргасны дараахан тавигдсан тул цахим орчинд анхаарал татсан байна.
Ko Ji Yong-ийн өмнөх үг дахин сөхөгдөв
Маргааны дараа Ko Ji Yong-ийн өнгөрсөн онд KBS 2TV-ийн “Mr. House Husband” нэвтрүүлэгт хэлсэн үг дахин яригджээ.
Тухайн үед түүнд хүүтэйгээ видео дуудлага хийхийг санал болгоход:
“Тэр ер нь утсаа авдаггүй. Хэд хэдэн зурвас овоорсон ч нэг их тоодоггүй юм шиг санагддаг” гэж хэлж байжээ.
Нэвтрүүлгийн үеэр Ko Ji Yong хүүгийнхээ хариуг нэг цаг гаруй хүлээж буй хэсэг ч гарсан байна.
Ko Ji Yong болон Hur Yang Im нар 2013 онд гэрлэж, 2014 онд Seung Jae-г өлгийдөн авсан. Гэр бүл “The Return of Superman” нэвтрүүлгээр олонд танигдсан бөгөөд хос 2024 оны дөрөвдүгээр сард харилцан тохиролцож гэрлэлтээ цуцлуулжээ.
