Lee Jung Eun болон Choi Sooyoung нар KBS2 сувгийн шинэ амралтын өдрийн драм “Back from School” бүтээлд ээж, охины дүрээр хамтран тоглохоор албан ёсоор батлагджээ.
2027 оны эхний хагаст цацагдахаар төлөвлөж буй энэхүү гэр бүлийн драм нь нас ахисныхаа дараа их сургуульд сурахаар шийдсэн, нийтэч зантай ээж Yoon Ok Hee-ийн түүхийг өгүүлнэ. Тэр шинэ орчинд орсноор гэр бүлийнхнээс дутахааргүй дотно хүмүүсийг олж, амьдрал нь дахин өөрчлөгдөх аж.
Тус бүтээлд Lee Jung Eun, Choi Sooyoung, Lee Sung Jae, Jeon Seong Woo болон Kang Seung Yoon нар тоглохоор батлагдсан бөгөөд продакшны бэлтгэл ажил хэдийнэ эхэлжээ. “Back from School” нь KBS2-ийн одоогийн амралтын өдрийн драм “Love on the Menu”-гийн дараа цацагдах юм.
Зохиолыг “Once Again”, “Crash Course in Romance” зэрэг бүтээлээр танигдсан Yang Hee Seung болон Kim Sun Mi нар хамтран бичиж байна. Харин “My Perfect Stranger”, “The First Night With the Duke” бүтээлүүд дээр ажиллаж байсан Lee Woong Hee, мөн Ham Young Geol нар найруулагчаар ажиллах аж.
Энэ нь зохиолч Yang Hee Seung-ийн хувьд “Once Again”-аас хойш долоон жилийн дараа KBS-ийн амралтын өдрийн гэр бүлийн драмд эргэн ирж буй төсөл болж байна.
Lee Jung Eun амьдралаа шинээр эхлүүлэх ээжийн дүр бүтээнэ
Lee Jung Eun драмд Yoon Ok Hee-ийн дүрийг бүтээнэ. Тэр хөршүүдийнхээ бүх асуудалд оролцдог, эрч хүчтэй, нийтэч ээж бөгөөд түргэн хоолны ттокбокки ресторан ажиллуулдаг нэгэн аж.
Гэвч нэг өдөр тэр их сургуульд суралцахаар шийдэж, амьдралынхаа цоо шинэ үеийг эхлүүлнэ.
Lee Jung Eun шинэ дүрийнхээ талаар:
“Би зохиолч Yang Hee Seung-ийг өдөр тутмын энгийн яриа, хөнгөн хошигнолоор дамжуулан хүмүүст дулаан тайтгарал өгдөг онцгой чадвартай гэж үргэлж боддог байсан. Бүх насны үзэгчид хамтдаа үзэж болох сайхан драм бүтээхийн тулд хичээн ажиллана” гэжээ.
Choi Sooyoung харин Ok Hee-ийн том охин Kang Eun Ho-гийн дүрд тоглоно. Тэр бодитой, хүйтэн хөндий мэт харагддаг радио продюсер бөгөөд эхэндээ егөөдөлтэй, прагматик зан гаргадаг ч ээжийнхээ хамгийн хүчтэй дэмжигчдийн нэг болдог байна.
Choi Sooyoung:
“Би бүтээлүүдийг нь үргэлж хүндэтгэж ирсэн зохиолч Yang Hee Seung болон олон жилийн турш фэн нь байсан Lee Jung Eun-тэй хамтран ажиллах гэж байгаадаа маш их догдолж, талархаж байна” гэж ярьжээ.
Lee Sung Jae, Jeon Seong Woo, Kang Seung Yoon нар мөн гол дүрүүдэд тоглоно
Lee Sung Jae Ok Hee-ийн нөхөр Kang Ji Cheol-ын дүрийг бүтээнэ. Тэр боксийн ертөнцөд домог болсон нэгэн бөгөөд “эхлээд хөдөл, дараа нь бод” гэсэн мачо зан чанартай. Гэвч эхнэр нь амьдралынхаа шинэ сорилтыг эхлүүлсний дараа түүний зан аажмаар өөрчлөгдөх аж.
Jeon Seong Woo Kang Eun Ho-гийн олон жилийн найз Han Seung Woo-гийн дүрд тоглоно. Тэр KMS Broadcasting-ийн алдартай хөтлөгч бөгөөд Eun Ho-той байнга зөрчилддөг ч санаандгүй нэгэн үйл явдлын дараа түүнд ямар сэтгэлтэйгээ дахин эргэцүүлэхэд хүрнэ.
Харин Kang Seung Yoon гэр бүлийн асуудал таригч том хүү Kang Jun-ы дүрд тоглоно. Тэр бүтэлгүйтлүүдээ өөртөө итгэлтэй дүр эсгэлт, хошигнолоор нууж явдаг нэгэн бөгөөд хэд хэдэн бизнес нь бүтэлгүйтсэний дараа аавынхаа боксын зааланд тураах хөтөлбөр эхлүүлж, дахин амжилт олохоор оролдоно.
Kang Seung Yoon:
“Ийм дулаан, хүнлэг түүхэнд тоглох боломжийг удаан хүлээсэн. Ялангуяа ээж маань энэ драмыг үзээд тодорхой хэмжээний тайтгарал авч чадна гэж бодож байгаа болохоор бүр их хүлээлттэй байна” гэжээ.
“Back from School” нь насанд хүрсэн хойноо шинэ амьдрал эхлүүлж буй ээж, түүнийг хүрээлсэн гэр бүл болон шинэ холбоодын тухай дулаан, хөгжилтэй түүхийг үзүүлэхээр байна.
Драмыг 2027 оны эхний хагаст KBS2 сувгаар цацахаар төлөвлөжээ.
