Луврын музей гадаад жуулчдад “шок” бэлдлээ: тасалбар 45 хувиар өснө

Парисын Луврын музей Европын Холбоонд багтдаггүй орнуудын иргэдэд зарах тасалбарын үнийг 2026 оноос эрс нэмэх шийдвэрээ пүрэв гарагт зарлалаа. Үүний уршгаар АНУ, Их Британи, Хятад зэрэг орноос ирэх жуулчид дэлхийд нэр хүндтэй энэхүү музейг үзэхийн тулд ойролцоогоор 37 ам.доллар төлөх болж байна.

ЕХ-ны бус иргэдэд 32 еврогийн шинэ үнэ тогтооно

Луврын удирдлагын мэдээлснээр, тасалбарын үнэ 45 хувиар нэмэгдэх бөгөөд ингэснээр музей жилийн орлогынхоо хэмжээг 23 сая ам.доллар хүртэл нь өсгөх зорилготой байна.

Шинэ тарифтай холбоотой шийдвэрийг музейн удирдах зөвлөл баталсны дараа байгууллага болон ажилтнуудын үйлдвэрчний эвлэлийн төлөөлөл хэвлэлд тайлбар өгөхдөө:

• 2026 оны нэгдүгээр сарын 14-нээс эхлэн
• ЕХ, Исланд, Лихтенштейн, Норвегийн иргэдээс бусад улсын үзэгч
• нэг удаагийн тасалбарын төлбөрөө 32 евро болгон нэмэгдүүлж, өмнөхөөсөө 10 еврогоор илүү төлөх болно гэж онцолжээ.

Өөрөөр хэлбэл, ЕХ-ны гишүүн бус орны жуулчдын хувьд Луврыг үзэх өртөг мэдэгдэхүйц өснө гэсэн үг.

Дэд бүтэц, аюулгүй байдалд жил бүр 20 сая евро босгох зорилго

Музейн захиргаа тасалбарын үнийг нэмэгдүүлэх гол шалтгаанаа “бүтцийн асуудлыг шийдвэрлэх, хамгаалалт, дэд бүтцийг шинэчлэхэд шаардагдах хөрөнгийг нэмэгдүүлэх” гэж тайлбарлаж байна. Зорилго нь жил бүр 20 сая еврогийн санхүүжилт нэмж бүрдүүлэх аж.

Энэ алхам нь зөвхөн урсгал засвар төдий бус, аюулгүй байдлын өндөр түвшний систем, хяналтын тоног төхөөрөмжийг шинэчлэхэд чиглэж байгаа гэж музейн зүгээс мэдээлжээ. Нэг талаар тасалбарын үнэ өсөж байгаа ч нөгөө талаар дэлхийн хамгийн алдартай музей өөрийн үнэт өвийг хамгаалах, хүлээн авах орчныг сайжруулах шаардлагатай байгааг хүлээн зөвшөөрсөн дохио юм.

Жуулчдын 69 хувь нь гадаадынхан

Луврын музей 2024 оны тайландаа тухайн онд 8.7 сая зочин хүлээн авсныг дурдсан бөгөөд тэдний 69 хувь нь гадаадын жуулчид байжээ.

Гадаад зочдын бүтцийг харвал:

• Америк жуулчид хамгийн их хувийг эзэлсэн,
• Хятадын жуулчид гуравдугаарт бичигдэж байгаа нь тус музей олон улсын аялал жуулчлалын гол зангилаа хэвээр байгааг харуулж байна.

Ийм нөхцөлд тасалбарын үнэ нэмэгдэх нь юуны өмнө ЕХ-ны бус орны аялагчдад илүү мэдрэгдэх бөгөөд ирээдүйн урсгалд ч тодорхой нөлөө үзүүлж болзошгүй гэж шинжээчид анхааруулж байна.

Долоон минутын дотор 102 сая ам.долларын үнэт эдлэл хулгайлагдсан хэрэг

Луврын аюулгүй байдлын системийг эргэн харахад хүргэсэн томоохон шалтгаануудын нэг нь энэ оны аравдугаар сарын 19-нд болсон онц ноцтой хулгайн хэрэг байв.

Бүлэг этгээд музейн байр руу нэвтэрч, ердөө долоон минутын дотор нийт 102 сая ам.долларын үнэлгээ бүхий үнэт эдлэл хулгайлаад скүүтер унан зугтсан байна. Албан ёсны мөрдөн шалгалтын дүнд музейн хамгаалалтын тоног төхөөрөмж, хяналтын тогтолцоо хангалтгүй, хоцрогдсон байдалтай байгааг тогтоож, аюулгүй байдлыг чангатгах шаардлагатай гэсэн анхааруулгыг холбогдох байгууллагууд гаргасан билээ.

Ийм нөхцөл байдал нь тасалбарын үнийг нэмэгдүүлж, бүтцээ шинэчлэх гэсэн шийдвэрийн нэг гол суурь болсон гэж үзэж болно.

Үйлдвэрчний эвлэл: “Ялгаварлан гадуурхсан” тариф болох эрсдэлтэй

Луврын тасалбарын үнийг ЕХ-ны иргэд болон ЕХ-ны бус улс орнуудын иргэдэд өөрөөр тогтоох шийдвэр нь даруй шүүмжлэл дагуулжээ.

Музейн ажилтнуудын үйлдвэрчний эвлэлийн төлөөлөгчид шинэ тарифыг гадаад жуулчдыг ялгаварлан хандаж буй бодлого хэмээн дүгнэж, олон улсын түвшинд маргаан үүсгэх эрсдэлтэй талаар анхааруулсан байна. Тэдний үзэж байгаагаар, дэлхийн иргэдэд нээлттэй, бүх хүнд ижил боломж олгох ёстой соёлын байгууллага гадаад, дотоодын зочдыг ялгаж, үнийн “хоёр шатлалтай систем” нэвтрүүлэх нь музейн нэр хүндэд сөргөөр нөлөөлж болзошгүй аж.

Гэсэн ч Луврын удирдлагын зүгээс аюулгүй байдлаа сайжруулах, дэд бүтцийн хөрөнгө оруулалтаа санхүүжүүлэх нь зайлшгүй хэрэгцээ болсон гэдгийг онцолж, шинэ үнийн бодлогыг дагуулахын тулд цаг хугацаа, тайлбар хэрэгтэйг харуулж байна.