Анхны найруулагчид шинэ ангийг бүтээнэ
Netflix “KPop Demon Hunters” анимэйшн киноны үргэлжлэлийг бүтээх шийдвэр гаргаснаа албан ёсоор зарлалаа.
Netflix-ийн TUDUM платформ болон бусад хэвлэл мэдээллийн хэрэгслүүдийн мэдээлснээр гуравдугаар сарын 12-нд стриминг компани уг киноны хамтран найруулагчид болох Мэгги Кан болон Крис Аппелханс нартай олон жилийн онцгой хамтын ажиллагааны гэрээ байгуулжээ. Энэхүү гэрээ нь “KPop Demon Hunters” киноны дараагийн ангийг бүтээх ажлыг албан ёсоор эхлүүлэх үндэс болсон байна.
Шинэ киноны нээлтийн огноо одоогоор зарлагдаагүй бөгөөд төсөл одоогоор үйлдвэрлэлийн эхний шатандаа явж байгаа аж.
Найруулагчид үргэлжлэлд өндөр хүлээлттэй байна
Киноны хамтран найруулагч Мэгги Кан:
«Солонгос найруулагчийн хувьд үзэгчид энэ Солонгос түүх болон бидний бүтээсэн Солонгос дүрүүдийг илүү ихээр харахыг хүсэж байгаад би маш их бахархаж байна. Бидний бүтээсэн ертөнцөд харуулах зүйл маш олон бий. Энэ бол зөвхөн эхлэл» гэж хэлжээ.
Харин Крис Аппелханс:
«Эдгээр дүрүүд бидний хувьд гэр бүл шиг болсон. Тэдний ертөнц бидний хоёр дахь гэр мэт болсон. Бид тэдний дараагийн түүхийг бичиж, шинэ сорилтуудтай нүүр туулж, хэрхэн өөрчлөгдөж хөгжихийг харахдаа баяртай байна. Мөн хөгжим, анимэйшн болон түүхийг нэгтгэх шинэ боломжуудыг үргэлжлүүлэн туршихыг хүсэж байна» гэж мэдэгдсэн байна.
Киноны тухай
“KPop Demon Hunters” кино нь Huntrix нэртэй K-pop охидын хамтлаг дэлхийг муу ёрын сүнснүүдээс хамгаалдаг тухай өгүүлдэг. Кинонд K-pop соёлын элементүүд болон Солонгосын уламжлалт соёлын олон зүйлсийг харуулсан байдаг.
Үүнд:
- Солонгосын нийтийн халуун усны газар
- Уламжлалт эмнэлэг
- Кимбап
- Бэлэн гоймон зэрэг соёлын элементүүд багтдаг.
Асар их амжилт үзүүлсэн бүтээл
Кино өнгөрсөн жилийн зургаадугаар сард нээлтээ хийсэн бөгөөд дэлхий даяар 500 сая гаруй үзэлттэй болж, Netflix-ийн хамгийн их ашиг орлого олсон контент болсон байна. Ингэснээр өмнө нь энэ үзүүлэлтийг тэргүүлж байсан “Squid Game”-ийг хүртэл ардаа үлдээжээ.
Мөн киноны “Golden” нэртэй дуу Billboard Hot 100 чартыг тэргүүлсэн амжилт үзүүлсэн юм.
Олон улсын шагнал хүртсэн
“KPop Demon Hunters” кино олон улсын томоохон шагналуудыг хүртсэн байна. Үүнд:
- Golden Globe – Шилдэг анимэйшн кино, Шилдэг эх дуу
- Critics’ Choice Awards – Шилдэг бүрэн хэмжээний анимэйшн, Шилдэг эх дуу
- Grammy Awards – Дүрс бичлэгт зориулсан шилдэг дуу
Эдгээр амжилт нь уг бүтээлийг Netflix-ийн хамгийн амжилттай төслүүдийн нэг болгожээ.
