“Ноорог” медиа агентлагийн гүйцэтгэх захирал О.Уламсайханд холбогдох эрүүгийн хэргийг хүнийг амиа хорлох нөхцөл байдалд хүргэсэн гэх үндэслэлээр шүүхэд шилжүүлээд байна.
Хэргийг шүүхэд шилжүүлсэн байдал
2025 оны арванхоёрдугаар сарын 26-нд Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн тамгын газарт О.Уламсайхантай холбоотой эрүүгийн хэргийг шилжүүлжээ.
Прокурорын байгууллагаас түүнийг Эрүүгийн хуулийн тусгай ангийн 10.4 дүгээр зүйл, 1 дэх хэсэгт заасан “хүнийг амиа хорлох нөхцөл байдалд хүргэх” гэмт хэрэгт яллагдагчаар татсан байна.
Одоогоор уг хэрэгт холбогдох шүүхийн урьдчилсан хэлэлцүүлгийн тов гараагүй байна.
Яллагдагчаар татсан зүйл анги
О.Уламсайханыг Эрүүгийн хуулийн 10.4 дүгээр зүйлийн 1 дэх хэсэгт заасан бүрэлдэхүүнээр буруутгаж буй. Хууль тогтоомжид энэ хэргийн агуулгыг дараах байдлаар тодорхойлсон байдаг.
Хүнийг амиа хорлох нөхцөлд хүргэх гэмт хэргийн заалт
Эрүүгийн хуулийн 10.4 дүгээр зүйл. Хүнийг амиа хорлох нөхцөл байдалд хүргэх:
- Эд хөрөнгө, албан тушаал, гэр бүлийн хамаарал бүхий харилцаа, бусад нөхцөл байдлын улмаас эрхшээлдээ байгаа хүнийг байнга хүчирхийлсэн, доромжилсон, зодсон, тамлан зовоосон, айлган сүрдүүлсний улмаас амиа хорлоход гарцаагүй хүргэсэн бол хоёр жилээс найман жил хүртэл хугацаагаар хорих ял шийтгэнэ.
Хэрэгт ийм зүйл анги хэрэглэснээр мөрдөн шалгах байгууллага тухайн нас баралт нь тухайн хүний эсрэг байнгын дарамт, хүчирхийлэл, айлган сүрдүүлэлттэй шууд холбоотой байсан эсэхийг голлон тогтоох шаардлагатай болж байгаа гэсэн үг.
Хэргийг анх мэдээлж байсан албан мэдээлэл
Энэхүү хэргийг олон нийтэд анх 2025 оны гуравдугаар сард Хууль зүй, дотоод хэргийн сайд асан О.Алтангэрэл танилцуулж байсан. Тэр үедээ тэрээр дараах агуулгатай мэдээлэл өгч байв.
Тэрээр:
“Цагдаагийн байгууллагын 102 тусгай дугаарт 2024 оны есдүгээр сарын 6-нд “Гэртээ боомилж нас барсан байдалтай эмэгтэй байна” гэдэг дуудлага ирүүлснийг хүлээн авч Чингэлтэй дүүргийн цагдаагийн хэлтсээс 2024 оны есдүгээр сарын 24-ний өдөр хэрэг бүртгэлтийн хэрэг нээн мөрдөн шалгах ажиллагаа явуулж байна. Мөрдөн шалгах ажиллагааны явцад амь хохирогчийн хамтран амьдрагчид холбогдуулан Эрүүгийн хуулийн тусгай ангийн 10.4 дүгээр зүйлийн 1 дэх хэсэгт зааснаар шалгаж байгаа” хэмээн мэдээлж байв.
Ийнхүү урьдчилсан шатны мөрдөн шалгалт дуусаж, О.Уламсайханд холбогдох хэргийг хүнийг амиа хорлох нөхцөл байдалд хүргэсэн эсэхийг шүүхээр эцэслэн хэлэлцэх бэлтгэл шатанд шилжүүлээд байна.
