Жүжигчин Park Hana болон сагсан бөмбөгийн тамирчин асан Kim Tae Sul нар хүүхэдтэй болохын тулд IVF буюу үр шилжүүлэн суулгах эмчилгээг дахин үргэлжлүүлж эхэлжээ.
Park Hana өмнө нь хоёр удаагийн оролдлого амжилтгүй болсны дараа хэсэг хугацаанд завсарлага авсан бөгөөд “Зуны дараа дахин оролдоно” гэж хэлж байсан юм. Одоо тэр төлөвлөснийхөө дагуу эмчилгээний дараагийн шатандаа орсон байна.
“Хоёр дахь оролдлого амжилтгүй боллоо”
Park Hana өмнө нь IVF-ийн хоёр дахь оролдлого амжилтгүй болсон тухайгаа өөрийн олон нийтийн сүлжээгээр шууд хуваалцаж байжээ.
Тэр эмчилгээнд хэрэглэсэн тариурнуудаа зүрхэн хэлбэрээр өрсөн зургийн хамт:
“Хоёр дахь оролдлого амжилтгүй боллоо”
хэмээн бичсэн байна.
Гэсэн ч жүжигчин бууж өгөөгүй бөгөөд хэдхэн хоногийн дараа:
“Гурав дахь оролдлогоо эхлүүлж байна”
гэж мэдэгдэн, фолийн хүчил, инозитол болон омега-3 тогтмол хэрэглэж, биеэ бэлтгэж байгаагаа хуваалцжээ.
Kim Tae Sul эхнэрийнхээ хажууд байсаар ирсэн
Эмчилгээний туршид Kim Tae Sul эхнэрээ дэмжиж, хамт байжээ.
Park Hana хүнд үеийг хамт туулж байгаа нөхөртөө талархаж, гар гараасаа барьсан зургаа нийтэлж байсан байна.
Гэвч IVF-ийн үйл явц түүний төсөөлж байснаас илүү хүнд болсон аж.
Зургадугаар сард SBS-ийн “Same Bed, Different Dreams 2 – You Are My Destiny” нэвтрүүлэгт оролцохдоо Park Hana өөрийн туршлагын талаар Choi Yeo Jin-д илэн далангүй ярьжээ.
Тэр ихэр хүүхэдтэй болох хүсэлдээ хөтлөгдөн IVF сонгосон ч хооллолт, биеийн бэлтгэл зэрэгт хангалттай анхааралгүйгээр эмчилгээг эхлүүлсэн нь үйл явцыг улам хүнд болгосон гэж тайлбарласан байна.
Зун эмчилгээнээс түр завсарлажээ
Park Hana бие болон сэтгэлээ амраахын тулд дулааны улиралд IVF-ээс түр завсарлахаар шийдсэн байна.
Тэр зуны дараа дахин оролдоно гэж мэдэгдэж, энэ хугацаанд аялж, өдөр тутмын амьдралдаа анхааран биеэ сэргээжээ.
Хос гэрлэснийхээ нэг жилийн ойг тохиолдуулан Сингапурт аялсан бөгөөд Kim Tae Sul эхнэрийнхээ төрсөн өдөрт зориулж өөрийн гараар хоол бэлтгэн сюрприз барьсан байна.
Хос 2025 онд гэрлэсэн
Park Hana, Kim Tae Sul нар 2025 оны зургадугаар сард гэр бүл болсон.
Тэд гэрлэхээсээ өмнө ч хүүхэдтэй болох хүсэлтэй байгаагаа олон нийтэд ярьж байсан бөгөөд Park Hana IVF-ийн явц, амжилтгүй оролдлогуудаа нуухгүйгээр фэнүүдтэйгээ хуваалцсаар ирсэн юм.
Тэр өмнө нь:
“Хэзээ нэгэн өдөр бидэн дээр ирэх сахиусан тэнгэрээ хүлээж байна”
хэмээн бичиж байжээ.
Ийнхүү хоёр удаагийн амжилтгүй оролдлого, түр завсарлагын дараа Park Hana IVF эмчилгээгээ дахин үргэлжлүүлж, хүүхэдтэй болох хүсэлдээ дахин нэг алхам хийж байна.
