21 дэх жилийн ойгоо тэмдэглэх “Playtime” наадам долоодугаар сард болохын өмнө анхны pre-event-ээ зохион байгуулна
“Playtime” олон улсын хөгжмийн наадам 21 дэх жилийн ойгоо энэ жил тэмдэглэх бөгөөд үндсэн наадмаа ирэх долоодугаар сарын 2-4-ний өдрүүдэд зохион байгуулахаар болсон байна. Уламжлал ёсоор тус наадам Налайх дүүрэгт байрлах “Плейтайм хүрээлэн”-д болох юм.
Харин энэ жилийн эхний pre-event буюу урьдчилсан арга хэмжээг энэ ням гарагт, дөрөвдүгээр сарын 12-нд Төв талбайд зохион байгуулахаар товложээ.
Энэ удаагийн арга хэмжээнд хэд хэдэн хамтлаг, уран бүтээлч оролцохоор болсон байна. Хөтөлбөрийн дагуу 13:30-14:50 цагт La Bombé DJ сетээ толилуулах бол 15:00-15:30 цагт Crazy Sad Asians тайзнаа гарна. Үүний дараа 15:40-16:10 цагт Newborn, 16:20-16:50 цагт Starru, 17:00-17:40 цагт The Lemons тоглох бол арга хэмжээний төгсгөлд 17:50-19:00 цагийн хооронд EBA DJ сетээ хүргэхээр төлөвлөжээ.
Энэ жил 15 улсын 30 гаруй хамтлаг, уран бүтээлч оролцохоо мэдэгдээд байна
“Playtime” наадам нь соёлын аялал жуулчлалыг дэмжих, Улаанбаатар хотыг хөгжмийн хот болгон хөгжүүлэх зорилгын хүрээнд жил бүр зохион байгуулагддаг онцлогтой. Энэ жилийн хувьд тус наадамд 15 орны 30 гаруй хамтлаг, уран бүтээлчид оролцохоо албан ёсоор мэдэгдсэн байна.
Ийнхүү зуны гол хөгжмийн үйл явдлын нэг болох “Playtime” наадам үндсэн өдрүүдээсээ өмнө Төв талбайд болох эхний арга хэмжээгээрээ үзэгчидтэй эртнээс уулзаж эхлэх гэж байна.
