“Single’s Inferno 5” нэвтрүүлгийн оролцогч Kim Min Gee жүжигчин Lim Su Been-ийн тухай бичлэгтээ дурдсаны дараа түүний агентлагийн захирал олон нийтийн өмнө шууд шүүмжилжээ.
Lim Su Been-ийн харьяалагддаг IDEA агентлагийн гүйцэтгэх захирал Lee Seo Jun Instagram-аар дамжуулан Kim Min Gee-д хандсан мэдэгдэл нийтэлсэн байна. Тэрээр Min Gee-г Su Been-тэй холбоотой нэвтрүүлгийн хэсгийг урьдчилан тохиролцолгүй, агентлагт мэдэгдэлгүй ашигласан гэж буруутгажээ.
Lee Seo Jun:
“Сайн уу, Min Gee. Би IDEA-ийн гүйцэтгэх захирал Lee Seo Jun байна. Манай агентлагтай урьдчилан тохиролцоогүй, бүр мэдэгдэлгүйгээр энэ хэсгийг ашигласан чинь ямар зорилготой юм бэ? Фенүүд хэлсний дараа би сая л мэдээд нэлээд гайхлаа. Цаашид манай жүжигчин Lim Su Been-ийн талаар дурдахаас зайлсхийнэ үү”
хэмээн бичсэн байна.
Маргаан дагуулсан хэсэг нь “Single’s Inferno 5” нэвтрүүлгийн үеэр Su Been Min Gee-ийн орны хөл хэсэгт унтсан хэсэгтэй холбоотой аж. Тухайн үед тэдний хооронд ямар нэгэн зүйл болоогүй ч уг хэсэг нэвтрүүлгийн үеэр нэлээд яригдаж байсан. Харин Min Gee саяхны нэгэн бичлэгтээ энэ хэсгийг хошигнол маягаар дурдсан байна.
Фенүүд агентлагийн захирлыг шүүмжилжээ
Lee Seo Jun Kim Min Gee-г Instagram дээр шууд tag хийж, олон нийтэд ил мэдэгдэл хийсэн нь үзэгчдийн дунд өөрөө шүүмжлэл дагуулжээ.
Зарим фенүүд уг асуудлыг хувийн байдлаар шийдвэрлэх боломжтой байсан гэж үзэж, агентлагийн захирал ийм байдлаар олон нийтэд гаргасан нь зохисгүй гэж бичсэн байна.
Нэг хэрэглэгч “яагаад тэр үүнийг нийтэлсэн юм бол” гэж гайхсан бол өөр зарим нь ийм үйлдэл Lim Su Been-ийн нэр хүндэд ч сөргөөр нөлөөлж магадгүй гэж үзжээ.
Мөн зарим фенүүд агентлагийн захирлын үйлдлийг мэргэжлийн бус гэж шүүмжилж, хэрэв Su Been дүр төрхөө өөрчлөхийг хүсэж байгаа бол ийм олон нийтийн маргаан түүнд тус болохгүй гэж тайлбарласан байна.
Одоогоор Kim Min Gee уг олон нийтийн шүүмжлэлд хариу өгөөгүй байна.
