Сон Жи Хё анх удаа бүрэн үзлэгт хамрагдахдаа гэнэтийн үр дүн сонсож, хавдар үүсгэх эрсдэлтэй байж болох жижиг полипоо авахуулсан талаар хуваалцлаа.
2-р сарын 26-нд тэр өөрийн YouTube сувагт “Сон Жи Хёгийн анхны эрүүл мэндийн үзлэгийн цочирдом үр дүн” нэртэй бичлэг нийтэлсэн байна.
Бичлэгийн эхэнд Сон Жи Хё сандарч, ядарсан мэдрэмжээ хөгжилтэй өнгөөр ярьжээ. “Энэ бол миний амьдралдаа хийлгэж байгаа анхны эрүүл мэндийн үзлэг. Өчигдөр шөнө унтаж чадаагүй. Маш их ядарч, тэнхэл алдаад байна. Бараг там шиг мэдрэмж төрлөө. Эм уух нь үнэхээр хэцүү байсан. Яаж хийх ‘арга’ байдгийг мэдэхгүй болохоор би урьдчилж бүтэн долоо хоног хоолны дэглэм барьчихсан. Эрүүл мэндийн үзлэг гэдэг дандаа ийм хэцүү байдаг юм уу? Үүнийг тогтмол хийлгэдэг хүмүүсийг хүндэлж байна. Би хоёр дахин хийж чадахгүй байх” гэж тэр хошигнон хэлсэн байна.
Дараа нь Сон Жи Хё бүдүүн гэдэс дурандуулах (колоноскопи) болон бусад шинжилгээнд оржээ. Үр дүнгийн ихэнх нь хэвийн гарч, ноцтой өөрчлөлт илрээгүй байна.
Гэхдээ эмч “Шархлаа байхгүй, зөвхөн хөнгөн зэргийн ходоодны үрэвсэл байна. Ерөнхийдөө эрүүл байна. Бүдүүн гэдсэнд том асуудал алга. Гэхдээ ойролцоогоор 5 мм хэмжээтэй жижиг полипийг авсан. Том биш ч хавдар болж хувирах боломжтой тул авчих нь дээр” гэж тайлбарлажээ.
Мөн эмч “Санаа зовох хэрэггүй. Та эрүүл. Үрэвслийн үзүүлэлт, цус багадалтын түвшин болон бусад үзүүлэлтүүд бүгд хэвийн. Эмчилгээ шаардлагатай ноцтой зүйл байхгүй” хэмээн тайвшруулсан байна.
