Зургаадугаар сарын 1–2-ны өдрүүдэд АНУ-ын Лос Анжелес хотын SoFi цэнгэлдэх хүрээлэнд болсон Stray Kids хамтлагийн «dominATE» дэлхийг хамарсан аялан тоглолт тэднийг 4-р үеийн K-pop урлагийн түүхэнд тод мөр үлдээсэн анхны хамтлаг болголоо. Тус тоглолт анх нэг өдрийн тоглолт байхаар төлөвлөгдсөн ч үзэгчдийн асар их хүлээлт, эрэлттэй холбоотойгоор нэмэлт өдөр зарлагдсан байна.
SoFi цэнгэлдэх нь дэлхийн хамгийн нэр хүндтэй, 70,000 гаруй хүний багтаамжтай концертын тайз бөгөөд өмнө нь BTS, The Rolling Stones, TWICE зэрэг олон улсын хэмжээний уран бүтээлчид энд тоглосон байдаг. Stray Kids тус тайзнаа гарсан 4-р үеийн K-pop хамтлагийн хамгийн анхных нь болж, өөрсдийн нэрийг түүхэнд бичүүлэв.
Тэдний урьд нь 2023 онд Лос Анжелест зохион байгуулсан тоглолт BMO Stadium гэх харьцангуй бага багтаамжтай газарт болсон бол энэ удаа Stray Kids хоёрхон жилийн дотор үзэгчдийн тоог гурав дахин өсгөж, Хойд Америк дахь нөлөөгөө эрс нэмэгдүүлснээ баталсан нь энэ байлаа.
Гурван цаг үргэлжилсэн тоглолтын турш хамтлаг нийт 30 дуугаа амьд дуулсан бөгөөд анхны уран бүтээл болох “District 9”-аас эхлэн “GIANT” дууны солонгос хувилбар зэрэг олон төрлийн уран бүтээлээр фенүүдийнхээ сэтгэлийг хөдөлгөв.
Тоглолтын төгсгөлд хамтлагийн гишүүд “Өнөөдөр хүрэлцэн ирсэн бүх STAY-д чин сэтгэлээсээ талархаж байна. Та бүхнээс авсан хайрыг эргэн өгөх боломж бидэнд тохиосонд бид маш их баяртай байна” хэмээн хэлжээ.
Stray Kids-ийн «dominATE» аялан тоглолт үргэлжилсээр байгаа бөгөөд ирэх зургаадугаар сарын 6–7-нд Техасын Арлингтон хотын Globe Life Field-д, мөн 10-нд Атланта хотын Truist Park-д дараагийн тоглолтуудаа хийхээр төлөвлөсөн байна.
