Skymedia-ийн шинэ төсөл үзэгчдийн өмнө нээгдлээ
“Skymedia” корпорацын ээлжит томоохон төсөл болох “The Trauma” нэртэй олон ангит сэтгэлзүйн уран сайхны кино албан ёсоор нээлтээ хийж, үзэгчдэд хүрч эхлээд байна. Бодит хэрэг явдлаас сэдэвлэн бүтээгдсэн уг цувралыг одоогоор “GoPlus” болон “SKYmedia”-гийн видео сангаас, түүнчлэн бямба гараг бүр “Central TV”-ээр хүлээн авч үзэх боломжтой.
Донтолт, сэтгэлийн шарх хоёрын огтлолцол
Киноны агуулгын цөм нь өнөөгийн нийгэмд хамгийн их хүндрэл дагуулж буй “донтолт” болон түүнээс урган гарах “сэтгэлзүйн гэмтэл” буюу траумад төвлөрчээ. Арван дөрвөн жилийн өмнө болсон зүрх өвтгөм нэгэн хэрэг олон хүний дотоод ертөнцөд эдгэхгүй сорви үлдээж, тэдний хувьд амьдрал нь “Траума” нэртэй урт үргэлжилсэн айдас, шаналал болон хувирсан байдаг.
Тэр хүмүүс сэтгэлийн зовлонгоосоо түрхэн ч атугай холдох ганц гарц гэж мансуурахыг сонгож, улмаар энэ нь бүрэн хэмжээний донтолт болон хувирч буй үйл явцыг уран бүтээлчид бодит түүхээс сэдэвлэн, зохиомжлон баяжуулж үзүүлсэн нь киноны онцлог болж байна.
Жүжигчид, уран бүтээлчдийн хүчтэй бүрэлдэхүүн
“The Trauma” олон ангит киноны найруулагчаар О.Цэгмэд ажилласан бөгөөд гол, голлох дүрүүдэд Ж.Жамъянсүрэн, М.Наранмөнх, Г.Алтандуулга, Г.Отгонцэцэг, Д.Бямбацогт, А.Өлзийсайхан, Б.Болд, Л.Гантулга, О.Хонгорзул, Б.Хунцэнгүүн, А.Номин-Эрдэнэ, Э.Уянга нар тогложээ.
Тэдний бүтээж буй дүрүүдийн шаналал, нууж хаасан шарх, гэр бүлийн харилцааны задрал, дотоод зөрчлийг сэтгэлзүйн драмын хэлээр харьцангуй бодит, амьд мэдрэмжтэйгээр илэрхийлэхийг зорьсон нь эхний ангиудаас ч тод мэдрэгдэж байна.
Найруулагчийн зорилго
Найруулагч О.Цэгмэд уран бүтээлийн гол санааг тайлбарлахдаа:
“Тус киногоор донтолт гэр бүл, амьдралд хэрхэн нөлөөлдгийг хөндөн харуулахыг зорьсон. Хүн бүрд жижиг, том гэлтгүй асуудал байдаг. Харин түүнийгээ нууснаар асуудал улам томорч, хуваалцсанаар шийдэл олддог. Тэгвэл “The trauma” кино танд энэ бүхнээ хуваалцах боломжийг олгоно. Киноны гол болон туслах дүрд 25 орчим уран бүтээлч, харин арын албанд 60 гаруй уран бүтээлч ажиллаж уг киног ийнхүү үзэгчдийн хүртээл болгоод байна” гэв.
гэсэн юм. Ингэснээр “The Trauma” нь зөвхөн үзвэр биш, харин дотроо нуусан асуудлаа эргэцүүлж, өөртэйгөө нүүр тулахад уриалсан сэтгэлзүйн толь мэт байхаар бүтээгдсэн нь харагдана.
Хэдэн ангитай, хаанаас үзэх вэ?
“The Trauma” олон ангит уран сайхны кино нь нийт 8 ангитайгаар төлөвлөгджээ. Одоогоор эхний дөрвөн анги нь “GoPlus” болон “SKYmedia”-гийн видео санд байршсан бөгөөд эфирийн хувьд бямба гариг бүр “Central TV”-ээр цацагдаж байна. Үлдсэн ангиудыг үзэгчид үе шаттайгаар тухайн сувгууд, платформоор хүлээн авах боломжтой.
Насны ангилал, хамтдаа үзэх зөвлөмж
Жанрын хувьд сэтгэлзүйн драмын ангилалд багтах энэ уран бүтээлийг уран бүтээлчид 18 наснаас дээш үзэгчдэд зориулагдсан гэж тодотгожээ. Харин хүүхдүүд үзэхээр бол эцэг, эх, асран хамгаалагчийн хамт гэр бүлээрээ үзэж, гарч буй сэдэв, дүрүүдийн шийдвэр, төөрөгдөл, шархыг хамт ярилцаж, тайлбарлан ойлгуулах нь зүйтэй гэж зөвлөсөн байна.
