TWICE хамтлагийн Jeongyeon эрүүл мэндийн асуудлаас болж 2020 онд завсарлага авсан үеийнхээ бодит оношийг анх удаа дэлгэрэнгүй ярьж, фенүүдийн сэтгэлийг хөдөлгөлөө.
Тавдугаар сарын 18-нд “You Quiz On The Block” нэвтрүүлгийн шинэ тизер цацагдсан байна. Тавдугаар сарын 20-нд гарах тус дугаарт Jeongyeon-ий эгч, жүжигчин Seung-yeon зочноор оролцож, карьер болон гэр бүлийнхээ талаар ярилцах аж.
Шинэ бичлэгт Jeongyeon эгчийнхээ тухай халуун дулаанаар ярьжээ. Түүний хэлснээр Seung-yeon хамгийн түрүүнд дүүгийнхээ бие сайнгүй байгааг анзаарч, эмнэлэгт үзүүлэхийг зөвлөсөн байна. Мөн 2020 онд Jeongyeon эрүүл мэндийн шалтгаанаар үйл ажиллагаагаа түр зогсоох үед эгч нь түүнийг ихээр дэмжжээ.
Jeongyeon эмнэлгийн үзлэгийн дараа Кушингийн хам шинжтэй гэж оношлогдсоноо мэдсэн байна. Энэ нь хүний биед кортизол даавар хэт ихсэх үед үүсдэг эмгэг бөгөөд жин нэмэх, арьсны өөрчлөлт, ядрах, даралт ихсэх, цаашлаад чихрийн шижин үүсэх зэрэг шинж тэмдэг илэрч болдог.
Тэрээр:
“Тэр үед би өөрийн яг оношийг мэдсэн. ‘Кушин гэдэг нь миний өмнө нь огт сонсож байгаагүй үг байсан. Эгчийнхээ ачаар би эрүүл болсон, би үнэхээр их талархаж байна. Миний эгч байгаад маш их баярлалаа”
хэмээн ярьжээ.
Фенүүд өнгөрсөн шүүмжлэлийг дахин дурсав
Jeongyeon-ий энэ мэдэгдэл фенүүдийг цочирдуулсан байна. Олон хүн түүний эрүүл мэнд одоо сайжирсан гэж найдаж байгаагаа илэрхийлжээ.
Мөн зарим фен өнгөрсөн хугацаанд Jeongyeon биеийн өөрчлөлтөөсөө болж их шүүмжлэлд өртөж байсныг дурсаж, тухайн үед олон нийт түүний жин, гадаад төрхийг шүүмжилж байсан нь эмзэг сэдэв гэж бичсэн байна.
Фенүүдийн зарим нь агентлагийг оношийг олон нийтээс нуусан, мөн Jeongyeon-ийг хангалттай хамгаалаагүй байж магадгүй гэж шүүмжилжээ. Гэсэн ч одоогоор гол анхаарал Jeongyeon-ий эрүүл мэнд, эгчийнх нь дэмжлэг, мөн түүний өөрийн түүхээ хуваалцсан зориг дээр төвлөрч байна.
