“Shine On Me” цувралыг Вьетнам дахь платформоос татан авчээ
Netflix Вьетнамын платформ дээрээ байршуулж байсан Хятадын романтик драм “Shine On Me” цувралыг Ханойн зүгээс албан ёсоор эсэргүүцэл илэрхийлсний дараа үзэх боломжгүй болгосон талаар мэдээлжээ. Шалтгаан нь тус цувралын нэг ангид Өмнөд Хятадын тэнгист Хятадын маргаантай нутаг дэвсгэр, “есөн зураас”-ын шугамтай газрын зураг гарсан явдал байна.
Вьетнамын зүгээс уг зураглалыг “буруу, үндэсний бүрэн эрхэд халдсан” гэж үзэж, соёлын яам нь 1-р сарын 3-нд цувралыг устгах шаардлага тавьж, 24 цагийн хугацаа өгсөн байна. Ийнхүү тус цувралыг Netflix-ийн Вьетнам дахь хувилбараас үзэх боломжгүй болжээ.
Маргаантай зураг 25-р ангид давтагдан гарсан байна
Тухайн маргаантай газрын зураг “Shine On Me” цувралын 25-р ангид хэд хэдэн удаа харагддаг гэж мэдээлэлд дурдсан. Ялангуяа Хятадын нарны эрчим хүчний боломжийн тухай лекцийн үеэр аудиториумын дэлгэц дээр Хятадын газрын зураг проекцоор гарч, тэнд “есөн зураас”-ын шугамын нэг хэсэг дүрслэгдсэн байна.
Вьетнамд татан авахын өмнө Netflix-ийн Top 10-т орж байжээ
27 ангитай “Shine On Me” цуврал нь Хятад төдийгүй Азийн бусад зах зээлд түгээмэл байсан бөгөөд Вьетнамаас буулгахаас өмнө Сингапур, Тайвань, Вьетнам дахь Netflix-ийн Top 10 жагсаалтад багтаж байсан гэжээ.
Бээжин албан ёсоор тайлбар хийгээгүй ч төрийн мэдлийн Global Times сонин мягмар гарагт нийтлэл гаргаж, Ханойг “соёлын солилцоог Өмнөд Хятадын тэнгисийн асуудлаас салгаж үзэх”-ийг уриалсан байна.
Өмнөд Хятадын тэнгисийн маргаан яагаад хурц вэ
Сүүлийн жилүүдэд Хятад улс Өмнөд Хятадын тэнгист хэд хэдэн газар нутаг, тэдгээрийн ойролцоох усан бүсэд эзэмших эрхээ илүү хүчтэй мэдэгдэж, Вьетнам, Филиппин, Тайвань, Малайз, Бруней зэрэг улсууд эсэргүүцсээр иржээ. Мөн Бээжин зарим арлуудыг тэлж, байгууламж барьсан, далайн эргүүл хийж, зарим тохиолдолд Филиппиний тэнгисийн цэргийн хүчинтэй хурц мөргөлдөөн үүсэж байсан талаар мэдээлэлд дурдсан байна.
Хятад улс түүхэн нотолгоо, тухайлбал ваар савны хэлтэрхий, Хятадын загасчдын ашиглаж байсан далайн чиглэлийн гарын авлага зэрэг нь “түүхэн бүрэн эрх”-ийг нь батална гэж тайлбарладаг. Харин 2016 онд Гааг дахь олон улсын шүүх Хятадын Өмнөд Хятадын тэнгис дэх шаардлагыг үгүйсгэсэн шийдвэр гаргасан ч Бээжин үүнийг хүлээн зөвшөөрөөгүй гэж BBC мэдээлжээ.
Бээжин, Ханойн маргаан голчлон Парасель болон Спратли арлуудын бүлэг дээр төвлөрдөг бөгөөд “есөн зураас”-ын шугам эдгээр арлуудыг тойрон татагддаг байна. Хятад эдгээр арлуудыг олон зууны өмнөөс Хятадын салшгүй хэсэг байсан гэж үздэг бол Вьетнам үүнийг эрс эсэргүүцэж, Хятад 1940-өөд оноос өмнө энэ бүсэд бүрэн эрхийн шаардлага тавьж байгаагүй гэж мэдэгддэг. Мөн Ханой 17-р зуунаас эхлэн Парасель, Спратли арлуудыг бодитоор захирч ирсэн, баримт бичигтэй гэж тайлбарладаг гэжээ.
Вьетнамын “татан буулгах” шаардлага тогтмол гардаг
Вьетнамд олон нийтийн дургүйцэл дэгдээх олон шалтгаан байдаг ч “есөн зураас”-ын шугам нь эрх баригчдын анхаарлыг тогтмол татдаг сэдэв гэж BBC тэмдэглэжээ. Ихэнх асуудлаар Вьетнамын төр Хятадын эсрэг үзлийг хязгаарлахыг хичээдэг ч Өмнөд Хятадын тэнгист Ханойн байр суурийг баталгаажуулсан шүүмжлэл нь эсэргүүцлийн “хүлээн зөвшөөрөгдөх цөөн хэлбэрийн нэг” гэж мэдээлэлд дурдсан байна.
Netflix-ийн тайлангуудаас үзвэл 2019-2024 оны хооронд Вьетнам Netflix-д нийт найман удаа бичгээр контент татан буулгах хүсэлт гаргасан гэжээ. 2023 онд мөн ижил шалтгаанаар өөр нэг Хятадын драм “Flight to You”-г устгуулахаар шаардсан байна.
Холливуд, анимэйшнд хүртэл хоригт өртөж байжээ
“Есөн зураас”-ын асуудлаар Вьетнам зөвхөн Хятадын драмд бус өөр улсын бүтээлүүдэд ч хориг тавьж байсан. Тухайлбал Warner Bros-ийн “Barbie” киног 2023 онд, DreamWorks-ийн “Abominable” хүүхэлдэйн киног 2016 онд мөн адил зураглалын улмаас хориглосон гэж BBC мэдээлэв.
Эх сурвалж: BBC
