Солонгосын жүжигчин Ли Сан Бо 44 насандаа таалал төгссөн нь олон нийтийн анхаарлыг татаж, түүний амьдралын сүүлийн жилүүдэд тохиолдсон хүнд сорилтуудын талаар хэлэлцүүлэг өрнөхөд хүргэлээ.
Түүний цогцсыг гуравдугаар сарын 26-нд Пёнтэк хотын цагдаагийн алба илрүүлсэн бөгөөд албан ёсны мэдээллээр гэмт хэргийн шинж тэмдэг илрээгүй байна. Харин түүний сэтгэлзүйн байдал, удаан үргэлжилсэн хямрал уг явдлын гол шалтгаан байж болзошгүй гэж үзэж байна.
Гэр бүлийн гарз ба гүн хямрал
Ли Сан Бо амьдралынхаа туршид эцэг, эх, мөн эгчийгээ алдаж, гэр бүлээсээ цорын ганц үлдсэн хүн болсон нь түүнд хүндээр туссан байна. Тэрээр олон удаа хүнд хэлбэрийн сэтгэл гутралтай тэмцэж байгаагаа хүлээн зөвшөөрч, удаан хугацаанд антидепрессант болон тайвшруулах эм хэрэглэж байсан аж.
Өмнөх ярилцлагууддаа тэрээр баярын өдрүүдийг хамгийн хүнд үе гэж онцолж, ганцаардлын мэдрэмж улам хүчтэй болдгийг дурдсан байдаг. Ялангуяа Соллаль, Чхусок зэрэг гэр бүлээрээ цуглардаг баяруудын үеэр энэ мэдрэмж илүү тод мэдрэгддэг байсан гэжээ.
Нэр хүндэд нөлөөлсөн дуулиан
2022 онд түүнийг мансууруулах бодис хэрэглэсэн гэх сэжиг гарч байсан ч шинжилгээгээр энэ нь эмийн нөлөө байсныг тогтоосон. Гэсэн ч энэ хэрэг түүний нэр хүнд, сэтгэлзүйд сөргөөр нөлөөлсөн хэвээр байсан.
Жүжигчин өөрөө ч энэ талаар ярьж, өөрийг нь “эрсдэлтэй хүн” гэж үзэх хандлага салбар дотор байсаар байгааг дурдсан байдаг. Үүний улмаас ажлын санал цөөрч, санхүүгийн хүндрэл үүссэн тул тэрээр ресторан ажиллуулах зэрэг өөр салбарт хүч үзжээ.
Сүүлд тэр “Elegant Empire” цувралаар дахин дэлгэцнээ эргэн ирсэн ч ойр дотныхны мэдээлснээр түүний сэтгэлзүйн байдал тогтворгүй хэвээр байсан байна. Нас барахаасаа өмнө сошиал дахь бүх нийтлэлээ устгасан нь олон хүний анхаарлыг татсан юм.
Албан ёсны байр суурь
Жүжигчний ар гэр нас барсан шалтгааныг нийтэд дэлгэхгүй байхыг хүссэн бөгөөд энэ нь талийгаачийн нэр хүнд, гэр бүлийн мэдрэмжийг хүндэтгэх зорилготой гэж тайлбарлажээ.
Ли Сан Бод зориулсан салах ёс гүйцэтгэх ёслол гуравдугаар сарын 29-нд болох бөгөөд Пёнтэк хотоос Чхонан дахь дурсгалын цогцолборт хүргэж, гэр бүлийнх нь дэргэд нутаглуулах юм.
