Бритни Спирсийн ууган хүү Шон Престон Федерлайн эцэг Кевин Федерлайны овгийг хэрэглэхээ больсон талаар TMZ мэдээлжээ. Өдгөө 20 настай тэрээр ээжтэйгээ харилцаагаа сэргээж эхэлсэн энэ үед сошиал хуудаснууддаа өөрийгөө Спирс овгоор нэрлэх болсон байна.
Ингэснээр поп одын хүү одоо өөрийгөө Шон Престон Спирс гэж танилцуулж байгаа бөгөөд цаашлаад албан ёсны бичиг баримт дээрээ ч нэрээ өөрчлөх талаар нухацтай бодож байж магадгүй гэх таамаг гарчээ.
Бритни Спирс болон түүний хөвгүүдийн харилцаа олон жилийн турш хүйтэн, төвөгтэй байсан юм. Гэсэн ч тэр сүүлийн үед бага хүү болох 19 настай Жейден Жеймстэйгээ харилцаагаа тодорхой хэмжээнд сайжруулж чадсан байна. Хөвгүүд нь өмнө нь ээжийнхээ этгээд, дэндүү ил задгай авир болон сошиалд нийтэлдэг бичлэгүүдээс ичдэг байсан гэдгээ илэрхийлж байжээ. Харин саяхны нэгэн хэрэг явдлын дараа хоёр хүү нь хоёулаа ээждээ дэмжлэг үзүүлсэн байна.
Тодруулбал, Бритни Спирс согтуугаар жолоо барьсан хэргээр цагдаад саатуулагдсаны дараа хөвгүүд нь түүний талд зогссон аж. Үүний зэрэгцээ тэдний эцэг, дуучны хуучин нөхөр Кевин Федерлайн энэ хэрэгт өөрийн байр суурийг илэрхийлжээ. Түүний зүгээс Бритнитэй холбоотой ийм асуудал ганц удаагийн тохиолдол биш байж магадгүй хэмээн санаа зовниж байгаа гэх мэдээлэл гарсан байна.
Сошиал орчинд харин өөр нэг яриа хүчтэй өрнөж эхэлжээ. Зарим хэрэглэгч Кевин Федерлайны илэн далангүй дурсамж, нийтлэлүүд нь Бритнигийн сэтгэлзүйн байдалд сөргөөр нөлөөлж, улмаар хууль эрх зүйн асуудалд ороход нь нөлөөлсөн байж магадгүй гэж үзэж байна.
Бритни Спирс хөвгүүдээ бүжигчин Кевин Федерлайтай гэр бүл болсон үедээ төрүүлсэн. Тэд 2004 онд гэрлэж, гурван жилийн дараа буюу 2007 онд салсан юм. Үүний дараахан, 2008 онд Бритни олон нийтийн өмнө хүнд сэтгэлзүйн хямралд орж, папараццичдын машиныг эвдэж, толгойгоо хуссан явдал нь дэлхий даяар шуугиан тарьж байв.
Энэ бүхний дараа дуучин эцэг Жейми Спирсийн асран хамгаалалтад орж, харин хоёр хүү нь Кевин Федерлайны хамт амьдрах болсон. Бритни хүүхдүүдийнхээ тэтгэмжийг төлсөөр ирсэн ч тэдний харилцаа ойр байж чадсангүй. Тэрээр өмнө нь хуучин нөхөр болон түүний шинэ гэр бүл олон жилийн турш түүний мөнгөнөөс амьдарч ирсэн гэж гомдоллож байжээ. Кевин Федерлайн одоогийн эхнэр Виктория Принстэйгээ болон өмнөх харилцаануудаасаа төрсөн бусад хүүхдүүдтэйгээ том гэр бүлтэй амьдардаг юм.
Бритнигийн зүгээс Кевин яг одоо өөрийн дурсамж, яриагаа олон нийтэд гаргаж эхэлсэн нь санамсаргүй зүйл биш гэж үздэг байна. Учир нь тэдний хөвгүүд насанд хүрэх гэж байгаа энэ үед тэтгэмжийн мөнгө тасрах эрсдэл ойртож байгаа тул дахин түүний нэрээр ашиг олохыг оролдож байна гэж тэр үзэж байжээ.
2021 онд фенүүдийнхээ хүчтэй хөдөлгөөний ачаар Бритни эцгийнхээ асран хамгаалалтаас гарч чадсан. Үүнээс хойш тэр сошиал сүлжээнд олон этгээд бичлэг нийтэлж, бүр интернэтийн хошигнол, мемийн сэдэв болж эхэлсэн юм. Үүнтэй зэрэгцэн түүний сэтгэлзүйн байдалд санаа зовниж буй фенүүдийн тоо ч өссөн хэвээр байна.
Ийнхүү Бритни Спирсийн ууган хүү овгоо сольж эхэлсэн нь ээжтэйгээ дахин ойртож буйтай давхцан гарч ирсэн том дохио болж, тэдний гэр бүлийн харилцаанд шинэ үе эхэлж байж болзошгүйг олон хүн анхааралтай ажиглаж байна.
