Виктория Бекхэм нөхөр Дэвид Бекхэмээ дэмжихээр гурван хүүхдийнхээ хамт Майамид болсон түүний хөлбөмбөгийн клубийн шинэ цэнгэлдэх хүрээлэнгийн нээлтэд оролцлоо. Гэр бүл энэ үеэр хамтдаа зураг авахуулсан ч том хүү Бруклин тэдэнтэй хамт байсангүй.
Дэвид Бекхэм олон нийтийн сүлжээндээ, “Шинэ цэнгэлдэх хүрээлэндээ найз нөхөд, гэр бүлийнхэнтэйгээ өнгөрүүлсэн онцгой үдэш байлаа. Энэ замд намайг дэмжсэн гайхалтай гэр бүлдээ баярлалаа” хэмээн бичжээ.
Хамтын зурагт тэрээр эхнэр Виктория, охин Харпер, хөвгүүд Ромео, Круз, мөн тэдний найз бүсгүйчүүд болох Ким Тернбулл, Жеки Апостел нарын хамт зургаа авхуулсан байна. Арга хэмжээний үеэр гэр бүлийн дотны найз, Женнифер Лопесийн экс нөхөр Марк Энтони ч мөн тайзнаа тоглосон аж.
Гэвч энэ үдэш Бекхэмийн гэр бүлийн дотоод зөрчлийн талаархи яриаг дахин сэргээв. Учир нь тэдний том хүү Бруклин дахин олны өмнө гэр бүлийнхнээсээ тусдаа үлдсэн байна.
Сүүлийн нэг жилийн турш Бекхэмийнхэн гэр бүлийн хүнд үеийг туулж байгаа тухай мэдээлэл тасраагүй. Бруклин эцэг эх, ах дүүс, дүүтэйгээ харилцахаа больсон гэх мэдээлэл удаан хугацаанд яригдсан бөгөөд түүний эхнэр Никола Пельтц ч мөн тэдэнтэй ойр биш байгаа гэж үздэг.
Олон сарын турш үргэлжилсэн цуурхлын дараа 27 настай Бруклин энэ асуудлаар өөрөө байр сууриа илэрхийлсэн юм. Тэр багаасаа эцэг эхийнхээ хяналтад байж ирсэн бөгөөд тэдэнд гэр бүлийн нэр хүнд, дүр төрх хамгийн чухал байсан гэж мэдэгджээ. Мөн Бекхэмийнхэн түүний эхнэр Никола Пельтцэд үнэхээр хайртай байгаагүй, цаашлаад 2022 онд болсон тэдний хуримыг хүртэл эвгүй болгосон гэж үзэж байгаагаа илэрхийлсэн байна.
Ийнхүү Майамид болсон энэ шинэ нээлт Бекхэмийн гэр бүлийн эв нэгдлийг харуулах мөч мэт харагдсан ч Бруклины эзгүй байдал тэдний хоорондын зөрчил дуусаагүй хэвээр байгааг дахин санууллаа.
