21
«Хаан ордны хавар» хэмээх уламжлалт соёлын арга хэмжээ энэ жил тав дахь удаагаа Богд хааны ордон музейд амжилттай нээлтээ хийлээ. Энэхүү арга хэмжээний хүрээнд тус музейн үнэ цэнтэй сан хөмрөгийг олон нийтэд дэлгэн үзүүлж, ахмад настнууд болон хүүхдүүдэд үнэ төлбөргүй үйлчилж байгаагаараа онцлог болж байна.
Арга хэмжээний гол зорилго:
- Хүүхэд, залуусын түүх, соёлын мэдлэгийг нэмэгдүүлэх
- Эх оронч, үндэсний ухамсартай иргэн болгон төлөвшүүлэх
- Ховор үзмэр, бичиг үсгийн дурсгалыг нийтэд таниулах
Онцлох үйл ажиллагаанууд:
- «Бичиг үсгийн гэгээ» тусгай үзэсгэлэн:
Сан хөмрөгт хадгалагдаж байсан ховор дурсгалууд нэг дор дэлгэгдэж байна. Үүнд:- Хааны магтаал
- Зарлиг, үүтгэл
- Шар торгон өргөмжлөл зэрэг түүхэн баримт бичгүүд орсон.
- «Шар торгон өргөмжлөл», «Хүслийн таван эрдэнэ» боловсролын хөтөлбөрүүд:
Залуусыг бичиг үсгийн түүх, төрийн албан ёсны хэрэглээнд ойртуулах зорилготой хичээлүүд, хөтөлбөрүүд явагдаж байна. - Номын үзэсгэлэн, худалдаа:
Богд судлалын төвөөс гаргасан номууд хямдралтай үнээр худалдаалагдаж байна. - Нээлтийн тоглолт:
Соёмбо чуулгын бүжигчид оролцож, доктор М.Мөнгөнцэцэг зочдод “Нарны биелгээ”-г зааж танилцуулсан нь зочдын сонирхлыг татлаа. - «Хааны ордны зоог» өдөрлөг:
Тавдугаар сарын 31 болон зургаадугаар сарын 1-нд зохион байгуулагдах бөгөөд энэ удаа цагаан хоолны өдөрлөг болохоор төлөвлөгдсөн байна.
Эрдэм шинжилгээний ажилтан Г.Баярмаа “Энэ жил тэр болгон олон нийтэд дэлгэгдээд байдаггүй бичиг үсгийн дурсгалуудыг дэлгэж буйгаараа онцлогтой. Үзэсгэлэн зургадугаар сарын 1-нийг дуустал үргэлжилнэ” хэмээн онцоллоо.
