2025 оны зургаадугаар сарын 11. /Вашингтон, CNN/. Уэльсийн гүнж агсан Дианагийн хувцас, гоёл чимэглэл, гар бичмэл зэрэг 100 гаруй хосгүй үнэт эд зүйлсийг энэ сарын сүүлээр АНУ-ын Калифорни мужийн Беверли-Хиллс хотод болох “Жулиены дуудлага худалдаа”-нд танилцуулах гэж байна. “Диана гүнжийн стиль ба хааны цуглуулга” нэртэй тус дуудлага худалдаа нь хааны гэр бүлийн хувцас загварын хамгийн том цуглуулгуудын нэг хэмээн тодорхойлогджээ.
Худалдаанд гарах эд зүйлсийн дунд Диана гүнжийн өмсөж байсан цанын хувцас, АНУ-ын тэргүүн хатагтай Францинаас бэлгэнд авсан “Dior” брэндийн гар цүнх, эмнэлэгт хүүхдүүдтэй уулзах үеэр өмссөн цэцгэн хээтэй даашинз зэрэг олны танил хувцас багтаж байгаа юм. Түүнчлэн түүний өмсч байсан малгай, гутал, гар зураг, гар бичмэл захидлууд ч энэ цуглуулгад орсон байна.
Шинжээчдийн таамаглаж байгаагаар, 1988–1992 оны хооронд Испани болон Булангийн орнуудад албан ёсны айлчлал хийх үеэр өмсч байсан торгон, гоёлын хоёр даашинз хамгийн өндөр үнэд хүрэх магадлалтай. Эдгээр хувцас тус бүр 200–300 мянган ам.долларын ханштай зарагдаж магадгүй хэмээн дуудлага худалдааны байгууллага мэдээлжээ.
Диана гүнж амьд ахуй цагтаа ч хувцсаараа дамжуулан буяны ажилд хувь нэмрээ оруулж байсан нэгэн. 1997 онд “Christie’s” дуудлага худалдаагаар 80 орчим даашинзаа худалдан, хорт хавдар болон ДОХ-ын судалгаанд зориулж 3.2 сая ам.доллар босгож байв. Харин түүний хувцаснуудаас хамгийн өндөр үнээр зарагдсан нь 2023 онд “Жулиены дуудлага худалдаа”-нд гарсан хар, цэнхэр өнгийн, Мароккогийн дизайнер Жак Азагуригийн урласан гоёлын даашинз юм. Энэ хувцас 1.14 сая ам.долларын үнэ хүрч зарагдсан нь түүхэнд үлджээ.
Диана гүнжийн хувцасны загвар, гоо зүй, хувь хүний ухаалаг сонголт өнөөдөр ч дэлхийн олон хүний сонирхлыг татсан хэвээр байсаар байна.
1 comment
Эдгээр даашинзыг өөрийн биеэр харах нь сайхан байх болно