Үндэсний урлагийн их театрын гоцлол бүжигчин Мөнхбатын Бямбаа Монгол Улсын Гавьяат жүжигчин хэмээх нэр хүндтэй цол хүртэхээр болжээ. Урлагийн салбарт хоёр гаруй арван жилийн турш тууштай хөдөлмөрлөж, олон үзэгчийн сэтгэлийг хөдөлгөсөн түүний хөдөлмөрийг энэ удаа төр үнэлж байна.
М.Бямбаа нь 2004 оноос Үндэсний урлагийн их театрт гоцлол бүжигчнээр ажиллаж ирсэн бөгөөд 2022 онд “Хөдөлмөрийн гавьяаны улаан тугийн одон”-гоор шагнуулсан билээ. Тэрээр Улаанбаатар хотод төрж өссөн бөгөөд урлагт бага наснаасаа дуртай, бүжигчний мөрөөдөлтэй байсан гэдгээ өмнөх ярилцлагуудаараа дурсаж байв.
Түүний урлагийн замнал 1999 онд Хөгжим бүжгийн коллежид элсэн суралцсанаар эхэлсэн бөгөөд 2004 онд Ардын бүжгийн мэргэжлээр амжилттай төгссөн. Мөн тэр жилдээ Монгол Улсын их сургуульд элсэн орж, урлаг судлаач, багшийн мэргэжил эзэмшжээ.
Үндэсний их баяр наадмыг тохиолдуулан шагнал гардуулах зарлигийн хүрээнд урлагийн салбарын олон эрхэм хүндэт уран бүтээлчид төрийн дээд шагнал, цол хүртэхээр болсон. Тухайлбал, Монголын хүүхэд залуучуудын театрын жүжигчин, ахмад уран бүтээлч, Төрийн соёрхолт Ц.Төмөрбаатар болон Гавьяат жүжигчин Н.Батцэцэг нар “Ардын жүжигчин” цол хүртэнэ. Мөн уртын дуучин Б.Батцэцэглэн, эстрадын дуучин Л.Банзрагч нар “Гавьяат жүжигчин” цол хүртэх боллоо.
