Улсын Хүүхэд залуучуудын театр Уильям Шекспирийн сонгодог бүтээл “Ромео Жульетта” эмгэнэлт драмын жүжгийг энэ оны тавдугаар сарын 9-ний өдөр тайзнаа дахин тоглохоор бэлтгэж дууслаа. Анх 1966 онд Ардын жүжигчин С.Гэндэнгийн найруулгаар тус театрын тайзнаа амилж байсан энэхүү жүжиг ийнхүү 59 жилийн дараа төрөлх театртаа дахин тоглогдох гэж байна.
Жүжгийн бүтээлд 100 гаруй уран бүтээлч, техник, уран сайхны ажилтан оролцож буй бөгөөд энэ удаагийн тавилт нь үзэгчдийн хүсэн хүлээсэн, уран бүтээлчдийн ур чадварыг сорьсон томоохон бүтээл болж байгаагаараа онцлог.
Гол дүрүүд ба бүтээлч баг
- Ромео – жүжигчин Б.Түвшинбаяр
- Жульетта – жүжигчин М.Батгэрэл
- Урилгаар:
- Төрийн соёрхолт, УГЖ Ц.Төмөрбаатар
- УГЖ Н.Нармандах
- СТА Ж.Даваасамбуу
Жүжгийн ерөнхий найруулагчаар тус театрын СТА Б.Энхээ ажиллаж, ерөнхий продюсероор УГЖ Н.Ариунболд, ерөнхий зураачаар УГЗ Г.Ганбаатар нар ажиллаж байна.
Театрын шинэ эрин үе
74 жилийн түүхтэй Улсын Хүүхэд залуучуудын театр 27 жилийн дараа дахин тайзны хөшгөө нээсэн цагаасаа эхлэн олон бүтээл туурвисаар байгаа билээ. Үүнд:
- “Арслан хүлэгт баатар” – хүүхдийн жүжиг
- “Хайрыг хайрла”
- “18 дахь хаврын хайр” – драм
- “Хүүхнүүдийн хаанчлал” – инээдмийн водевиль
Эдгээр бүтээлүүдийн араас дэлхийн сонгодог зохиолын оргилуудын нэг болох “Ромео Жульетта” жүжиг дахин амилж буй нь тайзны урлагийн орчин үеийн шинэ амьсгал, мөн чанарыг илэрхийлж байна. Театрын хамт олон олон улсын болон үндэсний шилдэг тайзны бүтээлүүдээр дамжуулан үзэгчдэд урлаг, соёл, гоо зүйн боловсролыг хүргэсээр байна.
