Өмнөд Солонгосын мөрдөн байцаагчид хөрөнгийн залилан, хувьцааны хууль бус гүйлгээтэй холбоотой хэрэг шалгаж буйтай холбогдуулан шүүх HYBE-ийн дарга Банг Си Хюкийн эзэмшдэг их хэмжээний хувьцааг түр хугацаагаар царцаах шийдвэр гаргажээ.
Сөүлийн Өмнөд дүүргийн шүүхээс 11 дүгээр сарын 19-нд прокурорын байгууллагаас ирүүлсэн хүсэлтийг хүлээн авч, HYBE компанид Банг Си Хюкийн нэр дээр бүртгэлтэй, нийт 156.8 тэрбум вон буюу ойролцоогоор 106 сая ам.долларын үнэ бүхий хувьцааг царцаах захирамж гаргасан талаар 12 дугаар сарын 5-нд хууль эрх зүйн хүрээллийн эх сурвалж мэдээлсэн байна.
“Хөрөнгийн хамгаалалт” маягийн арга хэмжээ
Царцаах шийдвэр нь Банг Си Хюкийг гэм буруутайд тооцсон гэсэн үг биш, харин мөрдөн шалгалтын явцад “эрүүгийн ашиг” байж болзошгүй хөрөнгийг хамгаалах зорилготой, урьдчилсан алхам юм гэж тайлбарлаж байна.
Ийм төрлийн арга хэмжээг эрх баригчид эргэлзээтэй орлоготой хөрөнгийг шүүхийн эцсийн шийдвэр гарах хүртэл сэжигтэн өөрийн дураар захиран зарцуулах, шилжүүлэх, нуух боломжийг хаахын тулд авдаг. Хожим шүүх “ашгийг хураах” шийдвэр гаргавал тухайн хөрөнгийг бүрэн хураан авснаар, Монгол төдийгүй олон улсын жишгээр гэмт хэргийн хохирлыг нөхөн барагдуулах нөхцөл бүрдэнэ гэж үздэг.
Энэхүү хүсэлтийг Сөүл хотын цагдаагийн газрын Санхүүгийн гэмт хэрэгтэй тэмцэх хэлтэс боловсруулж, Сөүлийн Өмнөд дүүргийн прокурорын газарт шилжүүлсний үндсэн дээр шүүх ийн шийдвэрлэжээ.
HYBE компанийн зүгээс гаргасан албан тайлбарт: “хадгаламжийн захирамж нь ердийн журмын алхам бөгөөд гэм буруутай эсэхийг тогтоодоггүй” гэдгийг онцлоод, тус компани “мөрдөн байцаалтын явцад бүрэн хамтран ажилласан бөгөөд эрх баригчдын дүгнэлтийг хүлээж байна” хэмээн мэдэгджээ.
IPO-тай холбоотой боломжит залилангийн схемийг шалгаж байна
Банг Си Хюкийг 2019 онд хөрөнгө оруулагчдыг төөрөгдүүлсэн байж болзошгүй хэргээр мөрдөн байцаалтад авчээ. Тэрээр тухайн үед HYBE-ийг хөрөнгийн биржид бүртгүүлэх ямар ч төлөвлөгөөгүй гэж мэдэгдсэн атлаа, дараа нь хувийн хөрөнгө оруулалтын сантай нууц гэрээ байгуулж, хувьцаагаа тийшээ зарсан гэх мэдээлэл байна.
Үүний дараа HYBE компанийнх нь IPO албан ёсоор хийгдэж, биржид гарсны дараа Банг тус сантай байгуулсан гэрээний дагуу борлуулалтын ашгийн тодорхой хувийг авсан байж болзошгүй гэж мөрдөгчид сэжиглэж байна. Цагдаагийн байгууллагын урьдчилсан дүгнэлтээр, нууц тохиролцооны дагуу тэр IPO-оос хойш үүссэн ашгийн 30 хувийг өөр дээрээ төвлөрүүлж, нийлбэр дүнгээр ойролцоогоор 190 тэрбум вон буюу 130 сая ам.долларын хууль бус ашиг олсон байх магадлалтай гэж үзэж байгаа аж.
Эдгээр баримтыг баталгаажуулах, гэрээний агуулга, мөнгөний урсгалыг нарийвчлан тогтоох мөрдөн шалгалт одоогоор үргэлжилж байна.
Жонгүк, Винтерийн болзооны цуурхал – HYBE-ийн сөрөг мэдээллийг дарж буй “маневр” уу?
Банг Си Хюкийн хөрөнгийг царцаасан мэдээ ил болоод удаагүй байхад, K-pop ертөнцөд өөр нэг том сэдэв гэнэт тэсрэв. BTS хамтлагийн гишүүн Жонгүг болон aespa хамтлагийн гишүүн Винтер хоёрын болзож буй гэх цуурхал цахим орчинд богино хугацаанд гал авалцан, олон нийтийн гол ярианы сэдэв болсон юм.
Нетизенчид болон шүтэн бишрэгчид энэ цуурхлын гарч ирсэн цаг хугацаа нь HYBE болон түүний үүсгэн байгуулагчийн эсрэг явж буй мөрдөн шалгалтын дуулиантай санаатайгаар давхцаж байна гэж хардаж байна. Тэдний хэлж байгаагаар, хэдхэн жиргээтэй, бараг идэвхгүй байсан шинэ хаягууд нэг шөнийн дотор болзооны тухай постуудаар дүүрч, сая сая хандалттай болж эхэлжээ.
Нэгэн хэрэглэгч:
“Одоо би яагаад Жонгүг, Винтер хоёрын хооронд хуурамч шивээстэй болзооны цуурхлыг тарааж байгааг ойлгож байна. Хайби, Бигхит нар Банг ПД-ийн залилангийн гэмт хэргийг нуун дарагдуулахын тулд JK-г ашиглаж байна.
Хар даа, эдгээр хаягууд өнөөдрийг хүртэл 10-аас цөөн жиргээтэй байсан”
хэмээгээд холбоос болон зургаа хавсаргасан байна.
Өөр нэгэн постод:
“Жонгүкийн тухай цуурхал үргэлж гарч ирдэг нь гайхалтай, учир битүүлэг хаягууд Банг ПД-д ноцтой зүйл тохиолдох бүрт хэдхэн цагийн дотор галзуу харилцаатай болдог.
Хайб медиаплей түүний уналтыг нуухын тулд нэг шөнийн дотор ажилладаг бөгөөд үргэлж хамгийн алдартай шүтээнээ буруутгах ямаа болгон ашиглахыг хичээдэг.”
гэж шүүмжилжээ.
Мөн өөр нэг хэрэглэгч:
“Банг ПД-ийн дуулиан гарч ирэнгүүт Винтер Жонгүгийн болзооны талаарх мэдээлэл дахин эхэлсэн. Хёнгийн шугамын талаар би ямар ч цуурхал харахгүй байгаа юм бэ. Би энэ болзооны цуурхлаас залхаж байна.”
хэмээн бухимдлаа илэрхийлсэн байна.
Ийнхүү HYBE-ийн үүсгэн байгуулагч Банг Си Хюкийн санхүүгийн хэрэгтэй холбоотой мөрдөн байцаалт гүнзгийрч, хөрөнгийг нь царцаах шийдвэр гарч байх үед, компанийн хамгийн алдартай артистуудын нэгтэй холбоотой болзооны цуурхал зэрэгцэн дэгдэж, олон нийтийн анхаарч буй гол сэдвүүд огт өөр чиглэл рүү эргэж байна. Энэ бүхний цаана мэдээллийн урсгалыг чиглүүлэх, анхаарлыг сарниулах пиар маневр байгаа эсэх нь одоогоор баттай биш ч шүтэн бишрэгчдийн дунд сэжиг улам нэмэгдсээр байна.
