Уран бүтээлч 290 буюу Мөнхбаатарын Төгөлдөр 2025 оны арванхоёрдугаар сарын 4-ний өдөр зүрхний хүнд өвчний улмаас хорвоог орхисон тухай гунигт мэдээг гэр бүл, ойр дотнынхон нь олон нийтэд хүргэж байна. Залуу насандаа урлаг, загвар, продакшны олон чиглэлд өөрийн өвөрмөц өнгөө шингээсэн түүний гэнэт байдлаар бурхны оронд дуудагдсан нь сонсогч, найз нөхөд, уран бүтээлчид, түүнийг хайрладаг бүх хүнд хүнд цохилт болж байна.
Тэрээр 2000 оны 3 дугаар сарын 28-нд Их Британийн Лондон хотод мэндэлж, бага насаа гадаад, дотоодын хоёр өөр орчин, хоёр өөр соёлын дунд өнгөрөөжээ. 2017 онд физик, математикийн гүнзгийрүүлсэн сургалттай нийслэлийн 11 дүгээр сургуулийг төгсөж, улмаар 2023 онд Санхүү, эдийн засгийн их сургуулийг амжилттай дүүргэн, мэргэжлийн боловсролоо авчээ. Сурлага, уран бүтээл хоёрыг зэрэг авч явах гэж хичээж, өөрийн үеийн залуусын хувьд үлгэрлэхүйц хөдөлмөрч байснаараа ойр дотныхныхоо бахархал нь болж байсан юм.
Төгөлдөр 16 наснаасаа шүлэг, дууны үг бичин, удалгүй тайз, стриминг платформууд дээр “Be my summer”, “Back in the business”, “Чихрийн баглаа”, “Улаанбаатар гунигтай”, “Хөнгөн” зэрэг дуунуудаараа залуусын дунд танигдсан. Тэр өөрийн дотоод ертөнц, зөөлөн гуниг, хотын шөнө, залуу насны эмзэг мэдрэмжийг үгээрээ, аялгуугаар “яридаг” уран бүтээлч байв. Сонсогчдын сайн мэдэх “0” нэртэй цомогтоо нийт 29 дуу багтаан гаргасан нь түүний богино хугацаанд үлдээсэн том бүтээлийн нэг байлаа.
Гэхдээ 290 зөвхөн уран бүтээлч бус, бүтээлч бизнес, брэндийн ертөнцөд ч идэвхтэй оролцогч байв. Тэр:
- “Noiton” брэндийн бүтээгдэхүүнүүдийн бүтээлч баг, продюсерын нэг,
- “Yasha” хувцасны брэндийн арт, концепт, бүтээгдэхүүн дээр ажилласан бүтээгч,
- “Har maf Records”-ийн артист, хамт олны нэг хэсэг байжээ.
Урлаг, загвар, хөгжим, брэндийн арт ертөнцийг хооронд нь холбож, “290” гэдэг нэрийг нэг үеийн соёлын тусгал, тодорхой цаг үеийн нүүр царай болгож чадсан нь олон залуусын хувьд онцгой дурсамж болон үлдэж байна.
Түүнийг мэдэх, хамт ажиллаж, нөхөрлөж байсан хүний хувьд Төгөлдөр бол тайван бөгөөд ухаалаг, ёжтой хэр нь хөгжилтэй, мөрөөдлөө хол тавьдаг атлаа ойр дотнынхоо төлөө чимээгүй зүтгэдэг хүн байсныг дурсдаг. Ээжийнхээ эрхэм хүү, найз нөхдийнхөө түшиг тулгуур, хамт олон, сонсогчдынхоо энерги, гэрэл гэгээг бий болгож явсан тэр зан чанар нь түүнийг үүрд дурсах шалтгаан болж үлдлээ.
Түүнийг үнэндээ “зөвхөн нэг уран бүтээлч биш, бүтэн үеийн мэдрэмжийг дуу болгон үлдээсэн залуу” гэж олон сонсогч тодорхойлж байна. Тэр өөрийн богинохон амьдралынхаа туршид хийж амжуулсан дуу бүхэн, бичиж үлдээсэн мөр үг бүрээрээ бидний дунд амьдарсаар байх болно.
Түүнийг хайрлаж, сонсож, урам зориг өгч, замыг нь гэрэлтүүлж ирсэн сонсогч, фенүүдэд нь гүн талархал илэрхийлье. Мөн гэр бүл, төрөл төрөгсөд, найз нөхөд, хамтран уран бүтээл туурвиж байсан уран бүтээлчид, түүнд хайртай бүх хүнд гүн эмгэнэл илэрхийлж байна.
Сүүлчийн ерөөл болгон: Сайн төрөлд хүрэх зам нь гэгээтэй байг.
