Францын иргэншил тойрсон маргаан хэрхэн эхэлсэн бэ
Жүжигчин Жорж Клуни АНУ-ын Ерөнхийлөгч асан Дональд Трампын өөрийг нь болон түүний эхнэр Амал Клуниг (Аламуддин) Францын иргэн болсон талаар шоолсон мэдэгдэлд хариу өгч, Трампын алдарт уриаг ашиглан ёжтой байр сууриа илэрхийлжээ.
Трамп өөрийн Truth Social платформ дээр Жорж, Амал Клуни нар албан ёсоор Францын иргэн болсон тухайд хариу бичихдээ тэднийг “бүх цаг үеийн хамгийн муу улс төрийн урьдчилсан мэдээ гаргагчдын нэг” хэмээн тодорхойлсон. Тэр мөн Францын цагаачлалын бодлогыг Жо Байдены бодлоготой зүйрлэн, гэмт хэрэг нэмэгдэж буйтай нь холбон шүүмжилсэн байдаг.
Түүний постод:
“Сайхан мэдээ! Бүх цаг үеийн хамгийн муу улс төрийн урьдчилсан мэдээ гаргагчид болох Жорж, Амал Клуни нар албан ёсоор Францын иргэн боллоо. Харамсалтай нь энэ улс Нойрмог Жо Байденыхтой маш төстэй цагаачлалын гамшигт бодлогын улмаас ноцтой гэмт хэргийн хямралд өртөж байна” гэж бичжээ.
Клуни Трампын уриаг ёжилж эргүүлэн ашиглав
Трампын энэ дайралтын дараа Жорж Клуни The Hollywood Reporter-т өгсөн ярилцлагадаа Трампын “Make America Great Again” уриаг зориудаар иш татан, ёжтой өнгө аястай хариу барьжээ.
Тэр ярилцлагадаа:
“Би одоогийн ерөнхийлөгчтэй бүрэн санал нэг байна. Бид Америкийг дахин агуу болгох ёстой” гэж хэлсэн бөгөөд ингэхдээ Трампын уриаг ашиглан түүнд шүүмжлэлтэй, улс төрийн эсрэг байр сууриа илэрхийлсэн байна.
Мөн Клуни Трампын “Бид Америкийг дахин агуу болгох ёстой” гэсэн үгийг давтан иш татсан нь 2026 оны 11 дүгээр сарын 3-нд болох завсрын сонгуулийг шууд сануулж буй улс төрийн дохио гэж ажиглагчид үзэж байна.
Хуучин маргаанууд, өөрчлөгдсөн байр суурь
Жорж Клуни, Дональд Трамп хоёрын зөрчил өмнө нь ч олон удаа ил болсон. 2024 онд Клуни тухайн үеийн Ерөнхийлөгч Жо Байденыг ерөнхийлөгчийн сонгуульд дахин нэр дэвшихээс татгалзаж, оронд нь дэд ерөнхийлөгч Камала Харрисыг дэвшүүлэх хэрэгтэй гэж уриалж байсан. Хожим тэр энэ байр сууриа “алдаа” байсан хэмээн хүлээн зөвшөөрч, өөрийн өмнөх мэдэгдлээ буруу гэж дурдсан.
Трампын зүгээс Клуниг улс төрийн байр суурь, урьдчилсан дүгнэлтүүдийнх нь төлөө тогтмол шүүмжилж ирсэн бол Клуни ч Трампын бодлого, уриаг ёжилж, шүүмжилсэн мэдэгдэл олон удаа хийж байв. Францын иргэншлийн асуудал нь тэдний хоорондын олон жилийн улс төрийн сөргөлдөөний ээлжит “дугаар” болж байна.
Клуни нар Францын иргэншил яаж авсан бэ
Жорж Клуни, хүний эрхийн хуульч Амал Клуни хоёр олон жилийн турш Францын өмнөд хэсэгт байрлах эдлэн газартаа амьдарч, гэр бүлийн амьдралаа үндсэндээ Европт төвлөрүүлээд байсан. Өнгөрсөн оны арванхоёрдугаар сард тэд албан ёсоор Францын иргэншил авч, хоёр улсын иргэншилтэй болжээ.
Клуни нарын Францын иргэн болох шийдвэр нь тэдний олон жил амьдарч, ажиллаж ирсэн орон руу хууль ёсоор “зөөлөн нүүх” алхам гэж харагдаж байсан ч Трамп үүнийг улс төрийн өнцгөөс шүүмжилж, АНУ-д үлдэхээс “зугтсан” мэтээр дүрслэхийг оролдсон нь одоогийн маргааныг улам дэвэргэж байна.
