Chateau Miraval-ийн маргаанд Жоли давуу тал оллоо
50 настай Анжелина Жоли Франц дахь Chateau Miraval дарсны үйлдвэрийн хувь эзэмшлээ зарсантай холбоотой олон жил үргэлжилсэн маргаанд хуучин нөхөр Брэд Питт-ийн эсрэг шүүх дээр ялалт байгуулжээ.
Page Six-ийн мэдээлснээр, Лос-Анджелесын Дээд шүүх 62 настай Брэд Питт Жолигийн хувийн цахим захидлуудыг задруулахыг шаардах боломжгүй гэж үзсэн байна. Эдгээр захидал нь Chateau Miraval дахь Жолигийн хувьцааг худалдахтай холбоотой байсан ч шүүх тэднийг нууцлалтай, хуулиар хамгаалагдсан харилцаа гэж дүгнэжээ.
Питтийн хүсэлтийг шүүх хүлээж авсангүй
Шүүгч Анжелина Жолигийн талын байр суурийг дэмжиж, тухайн захидлууд нь хууль зүйн хамгаалалттай, нууц мэдээлэлд хамаарна гэж үзсэн байна. Харин Брэд Питтийн тал эсрэг үндэслэлээ хангалттай нотолж чадаагүй тул хүсэлтийг нь хэрэгсэхгүй болгожээ.
Гэсэн ч ирээдүйд Питт энэ асуудлыг шүүх дээр дахин хөндөх боломжтой хэвээр байгаа аж.
Анжелина Жолигийн өмгөөлөгч Пол Мёрфи сэтгүүлчдэд:
“Энэ бол Жолигийн хувьд чухал ялалт. Шийдвэрээс харахад Питт өмгөөлөгчийн нууцад хамаарах баримт бичгүүдэд нэвтрэх гэж оролдохдоо бүх хил хязгаарыг илт давсан байна”
хэмээн мэдэгдсэн байна.
“Питт хяналт тогтоохыг оролдсон” гэж өмгөөлөгч мэдэгдэв
Пол Мёрфигийн мэдэгдэлд дурдсанаар, Брэд Питтийн тал анх 126 нууц баримт бичгийг ил болгохыг шаарджээ. Дараа нь уг тоог 22 болгон бууруулсан ч эцэст нь нэг ч баримт авч чадаагүй байна.
Өмгөөлөгчийн мэдэгдэлд:
“Энэ нь ноён Питтийн Анжелинатай холбоотой бүх зүйлд хяналт тогтоохыг шаарддаг зан авирын нэг хэсэг. Үүнд түүний өөрийн өмгөөлөгчидтэй харилцах харилцааг хүртэл хянах оролдлого багтана. Апелляцийн шүүх болон анхан шатны шүүх эцэст нь үүнд цэг тавьсанд бид маш их баяртай байна”
гэжээ.
Жоли Лос-Анджелес дахь харшаа зарж байна
Шүүх дээр давуу тал олсны дараахан Анжелина Жоли Лос-Анджелес дахь харшаа худалдаанд гаргасан байна. Жүжигчин уг үл хөдлөх хөрөнгөө 30 сая ам.доллароор үнэлжээ.
Тэрээр энэ байшинг 2017 онд Брэд Питтээс салсныхаа дараахан, түүний гэрийн ойролцоо худалдан авч байсан аж. Хоёр жүжигчний байшин ойрхон байсан нь зургаан хүүхдээ хамтран асрах нөхцөлтэй холбоотой байжээ.
АНУ-аас явах төлөвлөгөө нь ойртож байна
Анжелина Жоли өмнө нь ихрүүд Нокс болон Вивьен 18 нас хүрмэгц АНУ-аас явна гэж хэлж байсан. Хэвлэлүүдийн мэдээлснээр, жүжигчин тэдний төрсөн өдрийн дараа буюу долоодугаар сард улс орноо орхихоор төлөвлөж байгаа гэнэ.
Одоогоор тэр амьдрах боломжтой хоёр улсыг авч үзэж байгаа аж. Нэг нь түүний хайртай Камбож, нөгөө нь Франц юм.
Жоли, Питт нарын салалт олон жил үргэлжилсэн маргаан дагуулсан
Анжелина Жоли болон Брэд Питт нар 10 гаруй жил хамт байж, хоёр жил гэрлэсний дараа 2016 онд салсан. Харин тэдний албан ёсны гэр бүл цуцлалт олон тооны шүүхийн маргаан, хүүхдийн асрамж болон хөрөнгө хуваах асуудлаас болж зөвхөн 2024 оны сүүлээр эцэслэгдсэн байна.
2021 онд Жоли Франц дахь Chateau Miraval дарсны үйлдвэрийн өөрт ногдох хагас хувийг Оросын тэрбумтан Юрий Шефлерт заржээ. Үүний дараа Брэд Питт шүүхэд хандаж, уг хэлцлийг хүчингүй болгохыг шаардсан байна.
Питтийн тайлбарласнаар, тэдний хоорондын тохиролцоогоор аль нэг тал нь нөгөөгийн зөвшөөрөлгүйгээр өөрийн хувийг худалдах эрхгүй байсан аж.
Зургаан хүүхдийн ихэнх нь Питтийн овгоос татгалзжээ
Хуучин хос нийт зургаан хүүхэдтэй. Тэдний том гурван хүүхэд нь өргөмөл юм.
- Мэддокс — Камбожоос
- Захара — Этиопоос
- Пакс — Вьетнамаас
- Шайло — 2006 онд төрсөн анхны төрсөн охин
- Нокс — ихэр хүүхдийн нэг
- Вивьен — ихэр хүүхдийн нэг
Одоогоор Брэд Питтийн хүүхдүүдийн бараг бүгд түүний овгоос татгалзаж, түүнтэй бараг харилцахгүй байгаа талаар хэвлэлүүд мэдээлж байна.
Питт Инес де Рамонтой болзож, Жоли ганцаараа байна
Брэд Питт 2022 оноос хойш өөрөөсөө хоёр дахин залуу Инес де Рамон-той болзож байгаа. Харин Анжелина Жолиг олон хамтран ажиллагчтай нь, тэр дундаа Луи Гаррель-тэй нэр холбож байсан ч Питтээс салснаас хойш хэн нэгэнтэй албан ёсоор үерхээгүй гэх мэдээлэл давамгайлж байна.
Шүүхийн шинэ шийдвэр, Лос-Анджелес дахь харшаа худалдах алхам, АНУ-аас явах төлөвлөгөө нь Анжелина Жолигийн амьдралд шинэ үе эхэлж байгааг илтгэж байна.
