David Beckham болон Victoria Beckham нар гэрлэснийхээ 27 жилийн ойг тэмдэглэснээс хэдхэн хоногийн дараа Miami-д хамтдаа олны өмнө гарлаа. Хосууд Victoria Beckham брэндийн шинэ дэлгүүрийн нээлтэд оролцсон бөгөөд арга хэмжээнд тэдний гурван хүүхэд мөн хүрэлцэн иржээ.
Victoria Beckham шинэ дэлгүүрээ гэр бүлтэйгээ нээлээ
52 настай Victoria Beckham Miami дахь House of Victoria Beckham дэлгүүрийн нээлтийн зургуудаа олон нийтийн сүлжээндээ нийтэлсэн байна.
Түүнийг дэмжихээр хүү Romeo Beckham, Cruz Beckham нар найз бүсгүйчүүдийн хамт, мөн 14 настай охин Harper Beckham нь иржээ.
Гэр бүлийн хамтарсан зурагт Victoria болон David Beckham гурав хүүхдийнхээ хамт зогсож байгаа бөгөөд Romeo-ийн найз бүсгүй Kim Turnbull, Cruz-ийн найз бүсгүй Jackie Apostel нар ч хамт байсан байна. Jackie Apostel нь Cruz-ээс 10 насаар эгч гэдгээрээ өмнө нь хэвлэлүүдийн анхаарлыг татаж байв.
“Гэр бүл, найзуудтайгаа тэмдэглэж байгаадаа баяртай байна”
Victoria Beckham нээлтийн арга хэмжээний талаар сэтгэгдлээ хуваалцахдаа “Өнөө орой Miami-д байж, House of Victoria Beckham дэлгүүрийн нээлтийг гэр бүл, найзуудтайгаа хамт тэмдэглэж байгаадаа маш их баяртай байна!” хэмээн бичжээ.
Тус арга хэмжээний үеэр Victoria болон David охин Harper-тайгаа хамт зураг авахуулсан бөгөөд хосуудын гэр бүлийн халуун дулаан уур амьсгал фэнүүдийн анхаарлыг татсан байна.
Brooklyn Beckham дахин харагдсангүй
Гэр бүлийн уг арга хэмжээнд хосын том хүү, 27 настай Brooklyn Beckham оролцоогүй байна.
Тэрээр сүүлийн нэг гаруй жилийн хугацаанд гэр бүлийнхэнтэйгээ харилцахаа больсон гэж хэвлэлүүд мэдээлж байгаа. Энэ удаагийн нээлтэд ч ирээгүй нь Beckham-ийн гэр бүлийн дотоод зөрчлийн тухай яриаг дахин сөхөхөд хүргэжээ.
Beckham-ийн гэр бүлийн зөрчил үргэлжилж байна
Victoria Beckham болон 51 настай David Beckham нар нийт 29 жил хамт байгаа. Тэд хоёр жил үерхсэний дараа 1999 онд гэрлэж, дөрвөн хүүхэдтэй болсон юм.
Харин том хүү Brooklyn Beckham гэр бүлийнхэнтэйгээ харилцаагаа тасалсан тухайгаа хагас жилийн өмнө олон нийтэд ярьж байсан. Түүний тайлбарласнаар, эцэг эх нь олон нийтийн санаа бодолд хэт их анхаардаг байсан бөгөөд эхнэр Nicola Peltz-ийг нь таашаадаггүй, 2022 оны хуримыг нь ч эвгүй болгосон гэж үздэг аж.
Nicola Peltz нь тэрбумтан Nelson Peltz-ийн охин юм.
David, Victoria нар хүүгээ баяраар мэндчилсээр ирсэн
Хэдийгээр гэр бүлийн дотоод харилцаа хүйтэрсэн гэх мэдээлэл гарсаар байгаа ч David болон Victoria Beckham нар Brooklyn-ийг төрсөн өдөр болон бусад баярын үеэр олон нийтийн сүлжээгээр мэндчилсээр иржээ.
Miami дахь шинэ дэлгүүрийн нээлт Victoria Beckham-ийн хувьд брэндийнхээ хувьд чухал алхам байсан бол гэр бүлийн хувьд гурван хүүхэд, тэдний хайртай хүмүүсийн хамт олны өмнө гарсан онцгой мөч боллоо.
