Blue Ivy ээж, аавынхаа хамт Met Gala-д хүрэлцэн иржээ
Beyoncé-ийн том охин Blue Ivy анх удаа Met Gala-ийн улаан хивсэн дээр гарч, олны анхаарлыг татлаа. 14 настай тэрээр уг арга хэмжээнд ээж Beyoncé болон аав, продюсер Jay-Z-ийн хамт ирсэн байна.
Камерын өмнө Blue Ivy Balenciaga брэндийн цагаан даашинзаар гоёжээ. Корсет загвартай, хөвсгөр юбкатай уг төрхөө тэрээр өнгө ижил bomber jacket, алмаазан зүүлт болон нарны шилээр гоёсон байна.
Сонирхолтой нь, Met Gala-д оролцогчид ерөнхийдөө 18-аас дээш настай байх ёстой ч Beyoncé-ийн охинд онцгой тохиолдол гаргасан бололтой. Beyoncé өөрөө орчин үеийн хамгийн нөлөө бүхий оддын нэг төдийгүй энэ удаагийн Met Gala-ийн хамтран даргалагчдын нэг учраас Blue Ivy-ийн оролцоо илүү их анхаарал татжээ.
Нас бага ч шоу бизнесийн замналаа аль хэдийн эхлүүлсэн охин
Blue Ivy залуу насандаа хэдийн шоу бизнесийн ертөнцөд өөрийн гэсэн замналыг эхлүүлээд байна. Хэдийгээр түүний “хэтэрхий том хүн шиг” хувцаслалт, дүр төрх үе үе шүүмжлэл дагуулдаг ч тэрээр хөгжмийн салбарт аль хэдийн амжилт гаргажээ.
Тэрээр есөн настайдаа “Brown Skin Girl” дууны клипээрээ шилдэг хөгжмийн видео төрөлд Grammy хүртэж, уг шагналыг авсан хамгийн залуу уран бүтээлчдийн жагсаалтын хоёрдугаарт бичигдсэн юм. Харин 2023 онд Blue Ivy ээжийнхээ “Renaissance World Tour”-ын бүжгийн бүрэлдэхүүнд орж, тайзан дээр гарсан.
Сүүлийн үед цахим орчинд Beyoncé болон Blue Ivy хоёрыг улам их харьцуулах болсон. Зарим фенүүд Blue Ivy-г ээжтэйгээ улам төстэй болж, бараг хуулбар нь мэт өсөж байна гэж үздэг.
Beyoncé болон Jay-Z нар 2008 оноос хойш гэр бүл болсон. Хосын дунд Blue Ivy-гээс гадна бага хүүхдүүд болох охин Rumi, хүү Sir бий.
Өнгөрсөн оны сүүлээр Jay-Z болон түүний найз, реппер P. Diddy нарыг 13 настай охиныг хүчирхийлсэн хэрэгт буруутгасан мэдээлэл гарч байв. P. Diddy секс гэмт хэрэгтэй холбоотойгоор хорих ял авсан талаар мэдээлэгдсэн бол Jay-Z өөрийнх нь эсрэг тавьсан бүх буруутгалыг няцаасан байна.
