Америкийн жүжигчин, тулааны урлагийн домог Чак Норрис 86 насандаа таалал төгссөн байна. Тэрээр Пүрэв гарагт Хавайд эмнэлэгт хүргэгдэн эмчлүүлж байсан бөгөөд маргааш өглөө нь нас барсныг гэр бүлийнхэн нь албан ёсоор мэдэгджээ.
Ар гэрийнхэн нь мэдэгдэлдээ “Бид нөхцөл байдлыг хувийн хэвээр үлдээхийг хүсэж байна. Тэр гэр бүлийнхнийхээ дунд, амар тайван байдалтай хорвоог орхисон” гэж онцолсон байна. Мөн тэд түүнийг зөвхөн дэлхийд алдартай жүжигчин, тулааны урлагийн мастер байгаад зогсохгүй халамжтай нөхөр, хайртай аав, өвөө байсан хэмээн дурджээ.
Чак Норрис олон төрлийн тулааны урлагийн өндөр зэрэгтэй мастер байсан бөгөөд Брюс Литэй хамт “The Way of the Dragon” кинонд тоглосноороо олон улсад танигдсан. Тэрээр 1970-1980-аад онд “Missing in Action”, “The Delta Force” зэрэг тулаант кинонуудаар нэрд гарч, улмаар “Walker, Texas Ranger” цувралаар телевизийн од болсон юм.
Сүүлийн жилүүдэд тэрээр кино урлагаас холдож, сурталчилгаа, ном бичих, нийгмийн байр сууриа илэрхийлэх зэрэг үйл ажиллагаанд анхаарч байв. Түүний нэр олон нийтэд хошигнол, интернет мемүүдээр дахин өргөн тархаж, соёлын нэгэн бэлгэдэл болсон юм.
