Гэр бүлийн зөрчил гүнзгийрсэн ч Бекхэмийнхэн Бруклин, Николатай харилцаагаа сэргээх оролдлогоо зогсоосонгүй
Дэвид, Виктория Бекхэм нар том хүү Бруклин Бекхэм болон түүний эхнэр Никола Пельтцтэй харилцаагаа сэргээхийн тулд бүх боломжийг ашиглаж байгаа талаар гэр бүлд ойр эх сурвалжууд мэдээлжээ.
Эх сурвалжийн өгүүлснээр, Дэвид, Виктория хоёр Бруклин, Николагийн багийнханд дамжуулан, хэрэв ярилцах боломж гарвал тэдэнтэй уулзахын тулд “ямар ч үед, АНУ-ын ямар ч муж руу” очиход бэлэн байгаагаа мэдэгдсэн байна. Тэд өөрсдөө Их Британид амьдардаг ч энэ нь саад болохгүй гэж үзэж байгаа аж.
Мөн Бекхэмийнхэн Пельтцийн гэр бүлийн хуульчид, сэтгэлзүйчид, зуучлагч нарт хүртэл хандаж, том хүүтэйгээ харилцаагаа засахад туслахыг хүссэн гэх мэдээлэл байна.
Бруклины шүүмжлэлтэй постын дараа ч эцэг эх нь ухраагүй, харин ч эвлэрэх оролдлогоо нэмэгдүүлжээ
Бруклин өөрийн блогтоо аав, ээжийгээ хэт хяналттай, гэр бүлдээ хоёр нүүртэй ханддаг хэмээн буруутгасан дуулиант нийтлэл хийсний дараа ч Бекхэмийнхэн түүнийг орхисонгүй. Харин ч эсрэгээрээ эвлэрэх оролдлогоо улам нэмэгдүүлсэн гэж эх сурвалж онцолжээ.
Түүний хэлснээр, гэр бүлийнхэн энэ байдлыг маш хүндээр хүлээн авч байгаа бөгөөд Дэвид, Виктория хоёр анхны алхмыг өөрсдөө хийхэд ч бэлэн байгаа гэнэ. Тэд ямар нэгэн шалтгаан, боломж гармагц харилцаагаа сэргээх гарц хайсаар байгаа аж.
Зөрчлийн цаад шалтгаан нь олон жилийн хуримтлал байжээ
Виктория, Дэвид Бекхэм нарын Бруклин болон Никола Пельтцтэйгээ таарамжгүй харилцаатай болсон гэх яриа аль хэдийн удсан. Харин 2026 оны нэгдүгээр сард 27 настай Бруклин энэ бүхнийг өөрөө баталж, эцэг эхтэйгээ ноцтой зөрчилтэй байгаагаа ил тод ярьсан юм.
Тэрээр аав, ээжийгээ өөрийг нь үргэлж хэт хянадаг байсан, мөн Николатай харилцааг нь нэг бус удаа эвдэхийг оролдсон гэж үзэж байгаагаа илэрхийлсэн. Мөн гэр бүлийн гишүүдээ хоёр нүүртэй, хэт хамгаалдаг гэж буруутгаснаас гадна Николаг гэр бүл нь хэзээ ч бүрэн хүлээн зөвшөөрөөгүй гэж мэдэгджээ.
Бруклины хэлснээр, Виктория ирээдүйн бэрдээ хуримын даашинз сонголцохоос татгалзсан бөгөөд хуримын эхний бүжгийн үеэр ч зохисгүй авирласан гэж үздэг байна.
Олон нийтийн байр суурь хоёр хуваагдсан хэвээр байна
Гэсэн ч цахим орчинд энэ зөрчлийг өөр өнцгөөс харж байгаа хүмүүс цөөнгүй байна. Олон хэрэглэгч Никола Пельтцийг энэ маргааны гол шалтгаан гэж үзэж байгаа бөгөөд түүнтэй гэрлэхээс өмнө Бруклин эцэг эхтэйгээ сайн харилцаатай байсан гэдгийг сануулж байна.
Бруклин эцэг эхээ нийтэд ил тод шүүмжилсний дараа ч Дэвид, Виктория хоёр өнгөрсөн гуравдугаар сард түүний төрсөн өдрөөр мэндчилгээ дэвшүүлж, хайртай хэвээр байгаагаа ойлгуулсан юм. Харин гэр бүлийн бусад хүүхдүүд болох 23 настай Ромео, 21 настай Круз, 15 настай Харпер нар эцэг эхийнхээ талд орж, одоо том ахтайгаа харилцахаа больсон гэх мэдээлэл байна.
Нөгөө талаас, Бруклин эцэг эхтэйгээ муудсанаас хойш эхнэрийнхээ, тэр дундаа тэрбумтан Нельсон Пельтцийн өв залгамжлагч Николагийн хөрөнгөөр амьдарч байна гэх шүүмжлэл ч гарчээ. Тиймээс түүний хийсэн нийтлэл олон нийтийн дунд зөрүүтэй хүлээж авагдсан байна. Зарим хүн түүнийг одоогоор өөрийн хүчээр онцгой амжилтад хүрээгүй байж, эцэг эхээ буруутгаж байна гэж үзэж байгаа юм. Учир нь тэр хөгжмийн салбар, гэрэл зураг, хоол хийх чиглэлд хүч үзсэн ч одоогоор тод амжилт гаргаагүй хэвээр байна.
