Жүжигчин Ким У Бин олон жилийн турш дэмжиж ирсэн шүтэн бишрэгчдээ өөрийн мөнгөөр худалдаж авсан бэлгээр гэнэтийн бэлэг барьжээ. Тэрээр өмнө нь үнэртэн санал болгохыг хүсэж байсан уг шүтэн бишрэгчийнхээ ачаар тухайн брэндийн элч болсон хэмээн талархлаа илэрхийлсэн байна.
10-р сарын 6-нд Ким У Биний А гэх шүтэн бишрэгч олон нийтийн сүлжээнд:
“Олон хүн маш их хайр, дэмжлэг үзүүлсний ачаар У Бинээс үнэхээр өгөөмөр бэлэг авлаа. Дахин маш их баярлалаа” гэж бичжээ.
Тэрээр цааш нь:
“Эхэндээ энэ видеог нийтлэх эсэхээ нэлээд бодсон. Би ийм бэлэг авах хэмжээний зүйл хийсэн гэж бодохгүй байна. Гэхдээ У Биний сайхан сэтгэлд үнэхээр их талархаж, сэтгэл хөдөлсөн учраас бусадтай хуваалцахыг хүссэн” гэжээ.
Нийтэлсэн бичлэгт Ким У Бин ажлаа тараад явж байхдаа тааралдсан шүтэн бишрэгчдэдээ зогсон гарын үсэг өгч буй нь харагдана.
Гарын үсэг өгч байхдаа тэр гэнэт А-д:
“Эгч ээ, танд өгөх гэсэн нэг зүйл аваад тавьчихсан юм” гэж хэлээд машиныхаа тээшний хэсэг рүү очжээ.
Дараа нь том цаасан уут гаргаж ирээд:
“Таны ачаар би рекламын гэрээтэй болсон болохоор үнэхээр их талархсан. Тиймээс үүнийг танд өгөхийг хүссэн юм. Дахиж хэзээ уулзахаа мэдэхгүй байсан болохоор машиндаа хадгалж явлаа” гэж тайлбарласан байна.
Уутанд Ким У Биний одоо элчээр нь ажиллаж буй үнэртний брэндийн бүтээгдэхүүнүүд байжээ.
Гэнэтийн бэлэг авсан шүтэн бишрэгч илт гайхсан байна. Ким У Бин зөвхөн А-д бус, тухайн үед тэнд байсан бусад шүтэн бишрэгчдэд ч зориулан бэлэг бэлдсэн байжээ.
“Зөвхөн та ганцаараа бэлэг авбал жаахан эвгүй санагдаж магадгүй гэж бодсон. Тиймээс бусдад нь ч өгөхийг хүссэн” гэж тэр тайлбарлав.
Ким У Бин мөн бэлгүүдийн талаар:
“Эдгээрийг надад өгсөн юм биш шүү. Би өөрийнхөө мөнгөөр авсан. Буруугаар ойлгож болохгүй” гэж онцолжээ.
Өнгөрсөн жил А шүтэн бишрэгчдийн гарын үсэг зуруулах арга хэмжээний үеэр Ким У Бинээс ямар үнэртэн санал болгохыг асууж байсан аж. Тухайн үед жүжигчин өөрийн хэрэглэж байсан сүрчгээ түүнд шууд бэлэглэж, олны анхаарлыг татаж байжээ. Харин хожим Ким У Бин яг тэр үнэртний брэндийн нүүр царай болсон байна.
“Эцэст нь рекламын гэрээтэй болсон болохоор танд их талархаж байна. Үүнийг аль эрт өгөхийг хүссэн ч сая л тантай уулзлаа. Уг нь хамаагүй эрт өгөх ёстой байсан юм” гэж Ким У Бин шүтэн бишрэгчдээ дахин дахин талархан хэлжээ.
Олон нийтийн сүлжээний хэрэглэгчид энэ үйл явдалд халуун дулаан сэтгэгдэл үлдээсэн байна. Тэд “Үнэхээр чин сэтгэлтэй хүн юм”, “Ямар гайхалтай жүжигчин вэ”, “Түүний тухай сонсох тусам сэтгэл дулаацуулсан түүх улам олон гарч ирэх юм”, “У Биний сэтгэл зүгээр ч нэг дулаахан биш, дүрэлзэж байна”, “Би түүний шүтэн бишрэгч байсан бол хэзээ ч дэмжихээ болихгүй байх байсан”, “Шүтэн бишрэгчдийнхээ ачийг ингэж хариулж байгаа нь үнэхээр сайхан”, “Ямар их анхаарал халамжтай юм бэ” хэмээн бичжээ.
