Ээжийнх нь үхэл амьдралынх нь чиглэлийг өөрчилсөн байна
Жүжигчин Николь Кидман амьдралынхаа шинэ замыг сонгож, нас эцэслэж буй хүмүүс болон тэдний ар гэрт сэтгэлзүйн болон практик дэмжлэг үзүүлдэг death doula болохоор шийдсэнээ мэдэгджээ.
Тэрээр Сан-Францискогийн их сургуулийн оюутнуудтай уулзах үеэрээ “Би өөрийн хүрээг тэлмээр байна. Би нас эцэслэж буй хүмүүсийг дагалдан дэмждэг доула болмоор байна” хэмээн ярьсан байна.
58 настай жүжигчний хувьд энэ шийдвэрт 2024 оны есдүгээр сард нас барсан ээж Жанель Кидманы үхэл хамгийн хүчтэй нөлөөлжээ. Николь Кидман ээжийнхээ амьдралын сүүлчийн мөчүүдийг дурсахдаа “Ээжийг минь нас эцэслэх үед тэр өөрийгөө ганцаардмал мэдэрч байсан, харин гэр бүл нь түүнд үргэлж тусалж чаддаггүй байлаа” гэж хэлсэн байна.
Тэрээр мөн өөрөө болон эгч нар нь тухайн үед гэр бүл, ажил амьдралдаа хэт завгүй байсан учраас ээжийнхээ дэргэд үргэлж байж чадаагүй гэдгээ хуваалцжээ. Энэ гарз түүний дотоод ертөнцөд гүн өөрчлөлт авчирсан бөгөөд одоо чөлөөт цагаа бусдад туслахад зориулахыг хүсэж байгаа аж.
Николь Кидман бусдын бодлыг тоохгүй гэдгээ ч илэрхийлэв
Жүжигчин бүсгүй энэ шийдвэрийнх нь талаар хүмүүс юу гэж бодох нь түүнд чухал биш гэдгийг мөн онцолсон байна. Тэрээр “Нэг өдөр хүмүүс чиний тухай юу ярьж байгаатай эвлэрэх хэрэгтэй болдог. Энэ бол чиний амьдрал, түүнийг чи өөрөө тодорхойлно. Бусад хүмүүс юу гэж бодох нь ямар хамаатай юм бэ? Өөрийн хүч, эрх мэдлээ хэнд ч бүү өг. Чи ямар хүн байхыг тэд тодорхойлох эрхгүй” хэмээн байр сууриа илэрхийлжээ.
Үүний зэрэгцээ Николь Кидманы хувийн амьдрал ч сүүлийн жилүүдэд анхаарлын төвд байсан юм. 2025 оны намар, ээжийгээ алдсанаас яг нэг жилийн дараа тэр нөхөр Кит Урбанаас 19 жилийн хамтын амьдралынхаа дараа салж байгаа нь ил болсон байна. Хэсэг хугацааны дараа Кит Урбаныг 26 настай кантри дуучин Карли Скотт Коллинзтэй дотно харилцаатай болсон гэх мэдээлэл гарчээ.
Харин Николь Кидман одоогоор уран бүтээл болон охиддоо төвлөрч, олон нийтийн арга хэмжээнд ганцаараа оролцох болсон байна. Тэрээр Кит Урбантай хамтын хоёр охинтой бөгөөд тэдний том охин Сандэй Роуз загварын салбарт хүч үзэж эхэлсэн бол бага охин Фэйт Маргарет ээжтэйгээ хамт ихэнх цагаа өнгөрөөдөг аж.
