58 настай жүжигчин Николь Кидман Ээжүүдийн өдөрт зориулсан нийтлэлдээ үрчилж авсан хүүхдүүдээ дурдаагүйгээс болж цахим хэрэглэгчдийн шүүмжлэлд өртжээ.
Ээжүүдийн өдрийн нийтлэл маргаан дагуулав
Өнгөрсөн ням гарагт АНУ-д Ээжүүдийн өдрийг тэмдэглэсэн байна. Энэ өдөр Кидман өөрийн охид болох Сандэй, Фэйт нартай хамт авхуулсан ховор зургаа нийтэлж, “Миний хоёр охин бол миний бүх зүйл” хэмээн бичжээ.
Гэвч баярын мэндчилгээний оронд олон дагагч түүнд Кит Урбанаас төрсөн охидоос гадна өөр хүүхдүүд байдгийг сануулсан байна.
“Би түүнийг дөрвөн хүүхэдтэй гэж бодож байсан! Энэ үнэхээр хачирхалтай”, “Нөгөө хоёр хүүхэд нь яасан юм бэ?”, “Энэ үнэхээр гунигтай. Хүүхэд үрчилж авах нь зүгээр нэг моод биш, насан туршийн үүрэг хариуцлага. Түүний ийм үйлдэл маш их гонсойлгож байна”, “Чи тэдэнтэй харилцаагүй байж болно, гэхдээ энэ нь тэдний оршин байгааг үл тоох ёстой гэсэн үг биш” хэмээн хэрэглэгчид Кидманы нийтлэлийн дор бичжээ.
Тэд жүжигчний үрчилж авсан хүүхдүүд болох 33 настай Изабелла, 31 настай Коннор нарыг хэлсэн байна.
Том Крузтай гэрлэх үедээ хоёр хүүхэд үрчилж авч байжээ
Николь Кидман 1990 онд жүжигчин Том Крузтай гэрлэсэн. Тэд хамт байх хугацаандаа хоёр хүүхэд үрчилж авсан юм. Харин салсны дараа үрчилж авсан хүүхдүүд нь Кидмантай харилцахаа больсон байна. Учир нь тэд эцэг эхийнхээ зөрчилд аавынхаа талыг барьж, Том Крузын адил сайентологийн шашны сургаалыг дагах болжээ. Харин Кидман уг урсгалыг эрс хүлээн зөвшөөрдөггүй байсан аж.
Жүжигчин бүсгүй хожим нь хүү, охин хоёртойгоо харилцаагаа сэргээхээр нэг бус удаа оролдсон гэдэг. Гэвч тэд сайентологийн дүрмийг зөрчиж чаддаггүй бөгөөд уг сургаалыг дагадаггүй хүмүүстэй харилцах ёсгүй гэж үздэг байна. Үүнээс болж Кидманы үрчилж авсан охин Изабелла 2015 онд болсон хуримдаа хүртэл түүнийг уриагүй аж.
Том Крузтай салсныхаа дараа Кидман хоёр дахь удаагаа рок хөгжимчин Кит Урбантай гэрлэсэн. Энэ гэрлэлтээс тэрээр Сандэй, Фэйт хэмээх хоёр охинтой болсон юм. Өдгөө 17 настай Сандэй загварын салбарт анхны алхмуудаа хийж эхлээд байна.
Харин охидынх нь эцэг Кит Урбантай Кидман салсан бөгөөд тэдний гэрлэлтийг 2026 оны нэгдүгээр сард албан ёсоор цуцалжээ. Хөгжимчин одоо 26 настай дуучин бүсгүйтэй шинэ харилцаа эхлүүлсэн байна.
